مجنــ🤣ـــٌونتي
الحلقة 5
--—---------
طارق قاعد في غرفته يتابع في برنامجه المفضل بس أمه خشت عليه فجأه دغري فهم شن الموضوع وتضايق : قتلك ماعش تفتحيلي سيرة البنت لأن مش حانتزوجها
أمه بزعل : باهي يا وليدي والله زعلتني وماعش تحكي معايا لأنك ماتبيش تتزوج وتخليني نفرح بيك .. ودارت روحها تبكي أنصدم : شن صايرلك يا أمي ماعمرك درتيه هالخبر وبعدين أنا في بنت شفتها وخشت لراسي .. نبي نتعرف عليها أكتر ونتزوجها
أمه بحتت فيه : من البنت هذي نعرفوها ؟
طارق أبتسم : لا أنا شفتها في المستشفى هي مريضه عندي وطلع عندها السكر والله واجعتني شكلها كويسه البنت ما شاء الله
أمه بصدمه : لا والله ما تاخد وحده مريضه تقعد تعاني فيها طول عمرك
طارق عصب : شن هالكلام يلي تقولي فيه
راه أنا دكتور ومافيها شيء لو خديتها
أمه : ومش شرط إذا أنت دكتور تاخدها مريضه وتقعد تعاني فيها توا الأقارب يهبلوني ويقولو له زمان يرفض في الزواج وتوا يبي يتزوج وحده مريضة سكر اخرا
طارق خداه مفتاحه : أنا طالع مع السلامه
أمه لحقاته : إذا تبي تاخد البنت يلي أخترتها ماعش نبي نشوفك ولا أنت ولدي ولا أنا نعرفك وأمشي أرقد في المستشفى
طارق بحت فيها بحزن وطلع سيب الحوش
جاتها بنتها حنان يلي أنصدمت : مش كأنك قسيتي عليه وأنا ماتوقعتش يكون في بنت شايفها وعاجبته كان هضا ما عرفتك علي زمرد أخت صاحبتي رويدا ولا صار يلي صار توا لأن بجديات زعلني منضره
أمها قالت : عشان مصلحته تصرفت هك
توا يفكر كويس في الموضوع وأكيد حايختار رضاه أمه في الأخير ومش حايفكر في مريضة السكر لأنه حايتعب
حنان : بس هو راضي ويبيها حرام عليك
أمه : سكري فمك وما تزعليني منك خيرلك
حنان عصبت : معناها أنا لو مريضة سكر أم العريس حاترفض زيك مع الأسف وخشت لدارها وسكرت الباب بالقوة
كانت زعلانه علي طارق وتصرف أمها ماعجبهش بكل ولا عارفه كيف تفهمها
-------
رائد هضا وين فتح المحل كان خايف علي أخته واجد بعد أطمن عليها أنها مستمره تاخد في الأدويه عالوقت .. طلع من الحوش دغري وتفكيره فيها وفي نفس الوقت أطمن علي كوثر يلي واضح تبتسم وراضيه بخطبتها كان خايف يضلمها بالزواج من واحد هي رافضته وماتبيش
قمعز عالكرسي وأعيونه عالباب دغري أذكر خشت زمرد عليه أبتسم وعلي طول فتح تليفونه ولقاه رسائل واجد منها أنصدم وكتب : أنا أسف صدقيني أختي مرضت
بعد ساعتين شافتها زمرد وردت عليه ببرود : صح معاك حق مريضه وسمعنا أنكم خطبتولها أمس .. الف مبروك عقبالك
رائد : انا عندي اختين علي فكره والمريضه ماحبتش تخرب علي التانيه المهم وصلت ؟
زمرد أنحرجت وماردتش عليه وطلعت من المحادثه .. بس رائد كتب دغري : تعالي
ردت من جديد : نعم في شيء مستعجله ؟
رائد : كنك مضايقه وماتبيش تتفهميني ؟
زمرد : أنا متفهمه بس عندي مشاكل حاليا سامحني لازم نمشي وسكرت بسرعه بعد خشت زوجة خوها يلي تبحت فيها بحقد
قربت منها : عليش سكرتي تليفونك لما خشيت ، أكيده مزلتي تحكي مع رائد
زمرد عصبت : شن تبي مني فهميني ؟
بيان : مانبي منك شيء لكن أركحي وفكينا من الفضايح وخليكي مطيعه وأحترميني
زمرد : من الأخير شن تبي مني أحكي ؟
بيان : إذا تبيني نسكت ما تتزوجيش رائد وإذا جاك واحد تاني وافقي عليه دغري
زمرد أنصدمت : لا أنتي أكيد جنيتي صح
بيان : لا الحمدلله مزلت بعقلي وقريب حاتشوفي جنوني كيف شكله لو وافقتي علي رائد وتزوجتيه لأن حانفضح بيكي
زمرد عصبت : يلي يسمعك يقول دايره علاقه غير شرعيه معاه .. شن هالتصرفات
بيان تضحك : هك مانبيكش تاخديه وبس
عاجبني وضعك تاخدي واحد ماتحبيش ولا تبيه ههههه واشرت لها بيدها وطلعت دغري من دارها وهي تضحك بصوت عالي
زمرد همست : بنت الحرام شن قصتها معايا
بعدها بحتت في الباب يلي أنفتح مره تانيه وكان حسن ولد أختها يلي ماتت بعد جباته عالدنيا ( اسفه كتبت في بارت 4 حسن ولد أخ زمرد وهو ولده اسمه أيهم يعني معليش عالخطأ راجعته متأخر )
حسن بحت فيها : عادي نخش اشويه
زمرد رغم جوها المتنكد بس اشرتله يخش فهضا من ريحة الغالية : تعال هيا لعندي
حسن قرب منها وقمعز جنبها : عمتي بيان توا كانت تضحك بطريقه غريبه كنها ؟
زمرد : هي هك فوتها وماتفكرش فيها وتوا لازم تفكر في قرايتك والأمتحانات تمام
حسن هز راسه : حاضر وجدي مزال ما جاه
زمرد : توا يجي ما تخافش عليه هو في الجامع .. لو تبي أمشيله بس دير بالك باهي
حسن : حاضر توا نمشيله وباس خدها وطلع يجري لعند جده في الجامع يلي وراهم .. تلاقا بأيهم برا ولكن هالمره طنشه
تعود حسن عليه لأن بيان ماتحبش وتزن علي ولدها أيهم مايحكش معاه وهو يخاف منها .. عدا لجده وقمعز معاه بدون صوت
جده كان يقرا في المصحف وقف وبحث فيه : كنك يا وليدي في شيء عليش ساكت
حسن أبتسم : لأنك تقرا نبحت فيك ونسمع
جده سليمان حط يده علي كتفه : ربي يحفظك وعدي توضا عشان تقرا معايا ونصلو الظهر مع بعضنا لأن قريب يأذن
حسن باس راسه : حاضر يا جدي وعدا
همس سليمان : ربي يحفظك ويرحمك يا بنتي لو كنتي عايشه راه فرحانه بيه حتى باته مش معدل عليه ولا مدوره عدا تزوج غيرك ومراته ماتبيش حسن ولا تحبه وهو يسمع في كلامها ولا حن عليه المسكين
