مجنــ🤣ـــٌونتي
الحلقه 7
----------
جاه معاذ ولقاه رائد يراجي فيه عند السياره : هيا تعال معايا نبي نحكي معاك
معاذ مستغرب وحس أن الموضوع كبير
ركب معاه : صباح الخير كيف حالك
رائد : والله صباحي مظلم له أيام وحالي معفن بكل توا نفهمك شن صاير معايا
وقعد يسوق في السيارة وساكت ماقدرش يحكي أو يرد علي معاذ لعند ما وصل للحديقه : خلينا نتمشو اشويه لأني مخنوق
معاذ نزل ولحقه : يا راجل أحكيلي كنك
رائد بحت فيه بقهر : البنت يلي طاير عقلي فيها يا راجل حاتتزوج خلاص صدقني من لما سمعت هالخبر وأنا مش طايق روحي ومخنوق مش معقوله بنت أدير فيا هك
معاذ مصدوم : أنت وبنت مستحيل لأنك مستحيل تفكر حتى مجرد تفكير أديرها
رائد : يلي يسمعك يقول أني طلعت معاها يا راجل ... البنت محترمه وخشت لقلبي بدون أستئذان أقسم بالله حبيتها والله حبيتها قعدت تحكي معايا عالماسنجر بس هي حضرتني فجأه بدون ماتفهمني السبب والله حاسس بأحساس شين ولا نتمناه حتى لعدوي ... والله قريب نبكي ماسك روحي بالغصب ، حايتزوجها دكتور ههههه من تبي ترضى وتاخد مهندس عنده محل تافه زي محلي ههههه والله شيء يضحك يخليني أنقول معناها يلي صار بيني وبينها شعور كله وهم ... لأن حسيت أنها رايدتني
وموافقه عليا بس طلعت غلطان وحاتتزوج
معاذ : تي أنت راجل ألف بنت تتمناك خليها هي الخسرانه تتزوج تنحرق طريق جدي
بس أنك تنهار عشان بنت والله فضيحه
رائد : نبيك تساعدني نبي نهدأ حاسس أني حاننفجر ومرات يخطرلي نمشي نفضح بيها بس نقول لا حرام وأنت عندك خوات
معاذ : أيوا صح أنت راجل وتخاف ربي مستحيل أضرها توا ربي ينسيها لك وبعدين في الأخير أنا وياك زي الخوت ومش حانلاقي أحسن منك لأختي
رائد قاطعه : لالا مانبيش نتزوج بكل
معاذ رقيتله : ردينا نفس القصه والبنت ؟
رائد عصب : أنت مش فاهم شيء وأنا مش قادر نتزوج وناخد بنت وأنا حاسس روحي كرهتهم بكل ومش طايقهم كلهم
معاذ : باهي توعدني تفكر بالموضوع ؟
رائد : خليني نهدأ بعد كم شهر أو سنه
معاذ دفه : تي شنو كم سنه جنيت أنت
راك كبرت 30 سنه خلاص تزوج ودير عيله حلوه وزوج خواتك لكن أدبالك تحبس روحك وتقول مانبيش نتزوج وكرهت بنات
رائد ماردش عليه لأنه حاسس روحه مش قادر يتزوج غيرها أو يبحت في غيرها
حاسس روحه مجنون في زمرد وميت عليها ... رايف عليها وعلي حروفها وحشمها
أتكأ عالسياره بدون مايقول شيء أما معاذ يحاول يهديه بس رائد أضايق من أصراره
عالزواج في وقت غلط ومتسرع كيف حايتزوج وتفكيره في زمرد وخايف يفكر فيها وهي عند راجلها وهالشيء حرام 💔
---------
زمرد كلما يمر الوقت ويقرب بسرعه تزيد تتعب كل اشويه تخش للصفحه بحساب أختها رويدا كانت أتشوف حروفه ومناشيره بحزن ياما علقت عنده وكان تعليقها مميز لرائد ويرد عليها أكتر وحده
بدون ما يشوفها أو يتعرف عليها بس لقائهم في المحل خلاهم يتواصلو بعد شوفته لها وجه لوجه ... سكرت التليفون ومسحت دموعها بقهر كانت زعلانه بكل تمنت يصير شيء يخرب مخططات بيان
قبل يوم الفاتحه بيوم واحد عدا الدكتور طارق عند الحاج سليمان ولقاه في الجامع بعد سأل عليه حمزه أخ زمرد ، خش وقمعز يبحت فيه بتردد كان متحشم واجد منه
الحاج سكر المصحف وبحت فيه بهدوء
طارق قال بأرتباك : السلام عليكم يا عمي
سليمان : وعليكم السلام يا وليدي خير كنك في شيء ... أو صايره حاجه عندكم
طارق يلعب علي يده بتوتر : أنا والله متحشم منك بس مش عارف كيف نخش ونفتح معاك هالموضوع والله خايف بكل
سليمان : أحكي وما تخافش حانسمعك ونفهمك صدقني أنت ماتعرفنيش والله
علي خشت رائد قعد يصلي وبعدها دعاه لربي يصبره علي مصيبة بكرا حاتكون زمرد لغيره ما أنتبهش للحاج ولا للدكتور نهائيا ولكن بعد كمل الصلاه وناوي يطلع راسه كان نازل تحت سمع الحاج يكح وكحته كانت شديدة بكل ومضايق أما الطفل يلي كان قاعد في الجامع جابله أميه بسرعه شربها الحاج وطلب يكون بروحه رغم ضيقته وصدمته من الحوار يلي صار قبل لحظات من خطيب بنته يلي كان يحكي بحزن : أنا بصراحه والله مش راضي علي الزواج مش عيبه فيكم لا والله ما صارت بس أنا عقلي مع بنت تانيـــــــّه وفكرت واجد ليا فتره نفكر بس ماقدرتش نتزوج بنتك لأن حانضلمها معايا أكيد فاهمني ويلي أختار بنتك أمي وأختي هما مدحوها ربي يحفظها ويستر عليها لكن أنا مانقدرش نتزوجها ... فيك تقول أي حاجه في حقي أو أقــــــتلني لو تتريح بس مانقدرش نتزوجها أبدا حتى لو كانت هي الوحيده في الكوكب هضا بنتك تحرم عليا
لأن نبي يلي واخده عقلي وقلبي مني 😔
سليمان رغم حزنه وضيقته قال : عدي يا وليدي مسامحك ربي ينور طريقك ويسعدك أن شاء الله ... أنا فاهم عليك بس مفروض جيتني من البدايه وحكيتلي
طارق بعيون حمر من القهر قال : والله ماقدرتش وأمي فرحانه بكل وتبي بنتك
بس أنا يلي نبي نتزوج ونعيش معاها هي ماتبيش تتفهم هالشيء وذابحتني برفضها
سليمان حط يده علي كتفه : عدي قتلك وأنا مسامحك وأمك فهمها يلي صار توا
طارق : لا توا ندزلها خالي أفضل يحكي معاها لأني مش حانقدر نوريها وجهي توا
سليمان هز راسه وبعد عدا طارق قعد يكح ويده علي قلبه وصدره جابله الطفل أميه يشربها تلاقت عيونه علي رائد يلي كان يبي يطلع من الجامع ... بس رائد جاه لعنده بخوف وبحت فيه : كنك يا حاج خير أن شاء الله مش قتلي أنا زي ولدك
سليمان مسك يده وهو يرعش : أولدي
رائد بحت في يديه بصدمه : نعم نسمع فيك والله خوفتني ماعمريش شفتك هك
سليمان : تزوج بنتي لو تعزني فعلا تزوجها
رائد قعد يرعش وفتح عيونه بصدمه : شنو
سليمان : بنتي زمرد يا رائد فاتحتها بكرا والعريس قال أنا مجبور عليها مانقدرش ناخدها ... الناس معزومه شن نقوللهم ساعدني الله يربحك وقعد يبكي قدام رائد يلي مصدوم وحاس روحه يحلم بس حط يده علي وجه الحاج ومسحله دمِــــــوعه وبرجوله قال : أسمعني كويس يا عمي أنا حانتزوجها بس عندي شروط لازم تتنفد
الحاج : أطلب ويتنفد دغري بس ساعدني والله قلبي حايوقف وهي حاتزعل أكيد مش حاندعي عليه لأن مضلوم بسبب أمه
رائد بهدوء قال : أول شرط العريس يلي سيب بنتك نبي رقمه عشان نحكي معاه ونبي ندفع كل التكاليف يلي دفعها لبنتك وتاني شيء مانبيش حد يعرف بالموضوع وقوللهم أنك ملخبط وصايرلك زاهيمر وحايتزوجها جاركم المهندس مش الدكتور وأهم شيء زمرد عشان بنتك ماتنفجع بالخبر ما تبلغها توا نفهمها بعد نتزوجها وتكون في حوشي نحكيـــــلها كل شيء
الحاج سليمان : أعتبر الموضوع صار الله يربحك يا وليدي وتوا نبلغ ولدي حمزه عشان ما يقولها لحد لأنه خوها في الأخير
هز راسه رائد : تمام وعطيني رقم الدكتور
الحاج عطاه الرقم ودغري رائد طلع من الجامع وأتصل بيه ماردش عليه دزله مسج طويل : رد عليا يا حيوان يلي ما أتحشم
طارق شاف المسج وكتب : احترم نفسك
رائد : قولي مكان نبي نجيك توا الوقت
طارق عصب واتصل بيه : من حضرتك
رائد : نبي نحكي معاك بموضوع مهم لما نتلاقو توا نفهمك كل حاجه هيا بسرعه
طارق : أنا عندي شاليه في البحر تعال حاندزلك الموقع مع اني ماتريحتش بس تعال نبي نعرف شن تبي مني وليش تهزب
رائد سكر في وجه وعدا يجري للحوش فتح خزنته وخداه كل شيء فيها وحتى المسدس خداه وطلع يجري نزل شور سيارته واعيونه عالمسج بعد عرف المكان عدا بسرعه والشر يطلع من أعيونه اول ما وصل واتصل بيه : تعال انا عند الشط لابس جاكه كريميه نراجي فيك ومستعجل
طارق طلع وعدا لعند الشاب لكن انصدم لما لقاه اخ رحمه ورائد حتى هو انصدم بس ماقدرش يمشي بدون مايضربه هد عليه وقعد يضرب فيه علي وجهه من راس المسدس : شن رايك نقتلك توا احكي
دايرلي فيها دكتور وفي الاخير تسيب خطيبتك في أيام عرسها ترضاها لأختك
طارق وجه كله دم بصعوبه قال : أنا كنت مجبور أمي هي يلي جبّـــــرتني أفهمني
رائد حط المسدس علي راسه وهو يرعش كان ناوي يقتله بس وخر بسرعه : اسمع توا الوقت قولي كم دفعت للحاج نبي نعرف كل التكاليف يلي حطيتهم عليها
طارق صبا وبحت فيه : مش مذكر والله
رائد بصوت عالي : تي احكي قتلك توا
ما تخليني نقتلك بلكي تذكر وقتها يا وسخ
طارق بغضب : تي افهمني كنك تعيط وتضرب ... حط نفسك مكاني لو أمك جبراتك تتزوج بوحده تانيه انت ما تبيها شن ادير حاتمشي علي كلامها او ترفض
رائد قرب منه وحط المسدس علي راسه وبصوت حاد قال : مانـــتصرف زيك يا دكتور بالعكس نقنعها نحاول معآها تي اندير المستحيل لكن مانكونــــش حقير زيك ونسيبها قبل عرسها ونخلي الناس يحكو عليها وعلي شرفها يا واطي وضربه بوكس علي وجه بالقوة خلاه مغرق بدمه ويـــــــنزف واجد خشـــــــمه وفك الوجه
الناس بدت تحز بعد شافوهم هك ولكن رائد طلع كل الفلوس يلي جابهم وعزقهم علي وجه : خود عفنك يلي دفعته عليهم وعدا بسرعه ضرب دومان سيارته وهو معصب ومقهور : اااااااااااااااااه حيوان
طارق ساعدوه الناس كانت حالته صعبه والضرب يلي حصله كسره تكسير ولكن زاد انصدم المبلغ يلي عزقه عليه كان واجد بكل بحت فيه وسيبّـــــهم عالأرض كانو فلوس حلال ورزق .. الحلال طب عند راجل يلي ساعد طارق كان فقيــــر ومايقـــدرش يتزوج البنت يلي يبيها لأن ماعندش فلوس ومش قادر يطلبها بكل
طارق مسح دمه وبحت فيه : شكرا يا خويا خلاص توا نعدي للشاليه امتعي بس الله يربحك قبل ما تمشي خود هالمبلغ دير فيه يلي تبيه وعدا سيبه ... انصدم الشاب وقعد يرعش ومصدوم بس خداهم ولحقه لعند الشاليه : يا خويا شن تقول انت هضا مبلغ كبير بكل مستحيل نقدر ناخده منك
طارق حط يده علي كتفــــــه : خودهم وادعيلي ناخد يلي نبيها مانبي منك شيء أكتر من دعائك هيا اربح انا مسامحك فيهم
الشاب دموعه نزلو : أنت عارف أنك فتحت في وجهي طريق كان مسكر وكنت يائس ومضايق لأن الفقر والله يذبح يا خويا بارك الله فيك ربي يفتحها في وجهك أنا بسببك حانتزوج بالبنت يلي حبيتها ومش حاضيع مني ... الحمدلله يارب وسجد لربي وبحت في السماء وهو يبكي : الحمدلله الحمدلله
شكرا ياربي وخداه الفــــلوس يلي قعدن يطيحن منه بس طارق وقفه : تعال تفضل عندي شنطه توا نعطيها لك ما تشيلهم هك
خش الشاب معاه وضيفه طارق ورحب بيه وتريح واجد معاه حتى رقمه خداه : والله مش عارف شن انقول بس لما نعزمك علي عرسي تعال لأن مانقدر ننسى شن درتلي
طارق أبتسم : أن شاء الله بس توا نحكيلك قصة هالفــــــلوس لأن أنا بروحي مزلت مصدوم البنت يلي نحبها خوها ضربني توا
أنصدم ياسين : معقوله قصدك يلي توا ؟
وعليش ضربك هالحيوان كان معآه مسدس
اشكي فيه ما تسكتله لأن مرات يــــقتلك
طارق : لا أنت مش فاهم شيء توا نفهمك شن صار بالضبط والغلط مني هو يدافع علي عرض بنت جيرانهم والله راجل وأرجل مني اخرا عشان هك مسامحه
وقعد يحكيله شن صار بالضبط بينهمِ
ياسين انصدم : لا حول ولا قوة الا بالله
بس فرحتلك لأنك ما تزوجتها وأن شاء الله ربي يستر عليها البنت يلي سيبتها وتسامحك لأن لقطه مش حلوه الصراحه ربي يصبرها والله هالشــــــعور مؤلم جدا
طارق : أن شاء الله تسامحني ويستر عليها
_______
في الحلقة القــــــآدمِــــــــهِ ...
بيان لما عرفت أنها حاتتزوج من رائد مابتش تبلغها بس طلبت فلوس منها
زمرد عصبت وبحتت فيها : بالله عليك خاطيني يلي فيا مكفيني شن تبي مني بعد يلي عطيته بك مزلتي جعانة فلوس
بيان تمد في يدها بدون أي كلام وتهز فيها
زمرد رقيتلها فتحت الدلاب وعطتها هدية باتها لها كانت سلسلة ذهب : أطلعي برا لأن بجديات مش طايقه أنحقك ولا نشوفك
كرهتك عليما الله حاسه روحي كرهتك
الله يسامحك ذبحتيني وقهرتيني 😭
----
رائد شاف تليفون زمرد بعد خشت للحمام وأنصـــدم من الرًسًـــاله وصورتها المكشوفه
قعد يقرا في الكلام : حرام عليك تتزوجي واحد تاني بعد سيبك الأول لو رجيتي أشويه كنت تزوجتك انا يا سمحه 😜
والصوره تهبل علي فكره ناعليا نا وخلاص عليك فستان وجمال ورشاقه طيرتي عقلي
رائد أنصدم حط التليفون في مكانه وهو يحاول يهدأ بس ماقدرش أول ما طلعت دار روحه راقد بعد تليفونها قعد يهز ويهز
شافت التليفون بأًسًـــــتغراب ولما قرت الرساله قعدت ترعش وطلعت برا الغرفه
لحقها رائد بسرعه وكرها مع شعرها !!!
خوات رائد سمعن العياط والضرب يلي نزل عليهم لعند تحت وواضح أنه رائد يضرب في زوجته من تاني يوم عرسها !!!
#يتبع
