مجنــ🤣ـــٌونتي
الحلقه 12
طارق أول واحد ناض في حوش خاله كان فرحان وحاسس أن في أمل اليوم وحتوافق أمه .. صلى الفجر حاضر وقعد يدعي اتكون رحمه من نصيبه لوقت طويل وهو ساجد ويدعي .. خش عليه خاله ولقاه ساجد وبعد سلم وصبا جات عينه علي خاله قال بأبتسامه : صباح الخير
خاله ابتسم : نشاط اليوم وشكلك تبيها البنت شوقتني نشوفها ونتعرف عليها
طارق : لو شفتها حاتفهمني طول أنا مانبيش غيرها وميت موت عليها .. الحب مش حرام يا خالي وأنا جاد ونبيها حلالي
خاله : نوعدك ما نطلع من حوش امك ألا وهي راضيه عالبنت وما قلت شنو أسمها
طارق أبتسم : رحمه أسمها بس ما رحمتني مع الأسف ، طيرت عقلي وقلبي من مكانهم
خاله : الله يجمعكم مع بعضكم يارب
هيا توا نفطرو مع بعضنا ونمشو دغري
طارق قرب ومسك يد خاله وباسها : ربي يطولنا بعمرك وما يحرمنا منك يا غالي
خاله مفتاح : الله يربحك يا وليدي ونشوف أحفاد أحفادك أن شاء الله
انت غالي عليا واجد ودايرك زي ولدي
طارق كان فرحان ويبتسم ويراجي في الطلعه بفارغ الصبر عشان يشوفو أمه ويقنعوها علي رحمه يلي رافضتها تماما
رائد كان راقد بس حركة زمرد نوضاته
كانت تاخد في بدلة الصلاه بس تعترت وحستها .. رائد يبحت فيها وتمنى لو يقدر يصبي بس هو مصاب حاليا : يا بنت ؟
زمرد بحتت فيه : اه اسفه اسفه مش قصدي أنوضك بس تعترت وطحت
رائد : عارف يلي صار بس انتي كويسه ؟
زمرد بلعت ريقها وخدت بدلة الصلاه حضنتها وصبت طلعت من الغرفه وهي تعرج من كرعها يلي توجع فيها من طيحه
رائد أبتسم : انا فعلا واحد اعمى برائتها قتلتني من جمالها .. قعد يراجي فيها اتجي
بس زمرد بعد كملت صلاتها تسطحت عالكنبه متع الصاله .. خافت تمشي لعنده وكلامه يزيد يوترها زي وجوده جنبها 🥺
سمعاته ينادي فيها : يا زمرد لك وقت طويل ماشيه تصلي .. تعالي ساعديني يعني معقوله مافكرتيش أني نبي نصلي ؟
زمرد قعدت ترعش وهو مابش يسكت ومزال ينادي .. صبت تمشي ببطء وقلبها يدق بالقوة ، أول ما قربت من الغرفه شفاته يبي يصبي عشان مابتش تجي لعنده
قربت بخطوات سريعه رغم الم كرعها ووقفاته : لا ما تتحركش وخليك متريح
رائد يبحت فيها : والصلاه يا بنت ؟؟
زمرد : انت مصاب متأكد تقدر تصبي ؟
رائد : متأكد لأنك معايا ❤ حتى لو صار شيء .. أنتي جنبي فأرجوك خليني نصبي
زمرد أرتبكت وقربت مسكت يديه هو شد عليها : علي فكره خوك هو يلي طعني
زمرد من الصدمه نست وطلقت يده ، طاح ماقدرش يمسك في حاشية السرير : اااه
زمرد قربت منه : اسفه والله اسفه مش قصدي 😭 انا انصدمت بعد قلت خويا هو يلي ضربك ماقدرتش نستوعب وليش صار هك فهمني ليش ضربك خويا ليش
رائد : زوجة خوك يلي كاذبه وقايله ان بينا علاقه امك امس حكتلي وفهمتني شن حكت تبي تعرفي شنو قالت ؟
زمرد هزت راسها ودموعها شلال
رائد : قالت ان نحنا علي علاقه ببعضنا من قبل الزواج وان الدكتور نحنا حكينا معاه وخليناه يسيبك ووجودي في الجامع كانت مخطط بيني وبينك عشان الحاج سليمان يطلب مني نتزوجك وانا كنت نصلي وندعى ربي يصبرني علي زواجك من غيري
زمرد قعدت تبكي وماعش عرفت شن اتقول .. قمعزت حداه كانت ترعش
رائد حط يده علي يدها : خلاص ماعش تبكي وأنا كويس .. إذا كان هالشيء يهمك
زمرد بحتت فيه وبدموع قالت : أكيد يهمني أنت ماتعرف شيء .. انا ماكنتش راضيه علي الدكتور ولا فكرت فيه لأن عقلي وقلبي معاك أنت .. بس زوجة خويا كانت تهدد فيا وناويه تكذب علينا لعيلتي
رائد قاطعها بعد مسح دموعها : يعني أنتي تحبيني وفعلا يلي حسيت بيه كان حقيقي
زمرد هزت راسها : اها انا مانبيش غيرك
رائد أبتسم : باهي ساعديني نصبي نصلي
زمرد صبت ومسكت يده .. تمسك فيها بالقوة وعيونه عليها كان يبتسم وفرحان
