مجنــ🤣ـــٌونتي ... الحلقه 31
كوثر عدت للجامعه لها ايام تمشي بس تتجنب في الاستاذ وسيم يلي مهتم بحضورها عكس الباقي كان يغيب او يهرب من المحاضره .. بس كوثر اتجي وتقعد اخر وحده ومهتمه بدراستها بشكل ملفت ، لما قرر يدير امتحان يختبر فيه الطلاب .. كان عدد قليل ناجح ودرجته نهائيه بس رقم 1 في نجاحهم كانت كوثر حتي خطها ونضامها جذبه .. قعد يبحت في ورقتها واجد حطها علي جنب ، اما باقي الاوراق صلحهم ببرود .. كل اشويه يبحت في ورقة كوثر هالورقه بذات مايبيش يعطيها ، قرر يعطيهم الدرجات فقط لكن الورقه يبيها يبي يتأملها طول الوقت مش عارف ليش بس كانت مميزه عن البنات كلهم .. غمض اعيونه ورقد بس جاته طفله صغيره خشت عليه وقعدت تلعب علي الاوراق لقت مقص علي طاولة الاستاذ وسيم خداته وقعدت تلعب وتقص في الاوراق .. حس بحركه اول ما فتح اعيونه شافها قدامه تلعب علي اوراق الطلاب انصدم : ملك شنو درتي حي علي امك يلي جباتك .. الاوراق راحن فيها
جات امه تجري : كنك شنو في بسم الله ؟
وسيم يبحت في ملك يلي خافت ووخرت بعيد علي باتها ترعش : شوفي شنو درات
انا بجديات معصب توا نشيلها لأمها تقعد عندها خليها تربيها اكويس وماعش تلمس حاجة غيرها احسن ما ندمرها الوسخه
امه : عيب يا وسيم ماعش تحكي علي طليقتك هك وبعدين البنت صغيره ماتعرفش عمرها 5 سنوات ، هيا ملوكه عدي ألعبي في غرفتك توا نجيك تمام
عدت ملك زعلانه وهي تبكي بقهر من باتها
يلي رافضها عشان امها .. وحتي امها ما تبيها كانت زعلانه وفاقده حنان الام والاب
وسيم يلم في الاوراق : هذي حيوانه رافضه تربي بنتها وتمسكها .. وتمشي مع صديقاتها 24 ساعه طالقينها هلها هي اصلا مش متربيه لو كانت متربيه راه تقمعز وتمسك بنتها .. يا خساره وخلاص ندمت اني خديتها وتزوجتها قتيلي خودها حرام خاطري اناسب اختي .. لما خديتها شفتها علي حقيقتها ، حتي الحوش نخش نلقاه ريحته معفنه ومش دايره غذاء غمتلي منها ولما درت حادث .. قعدت شهور نمشي علي عكوس نسمع فيها تحكي لخالتي وتقوللها انا ماعش نبي نكمل عمري مع واحد مش قادر يمشي كويس شوفي سبحان الله اول ما تخلصت منها وطلقت بنت اختك .. درت المستحيل عشان نتعالج ونمشي علي كرعي احسن من قبل وحضرت في الماجستير الحمدلله ليا سنه نعطي ونقري في الطلاب .. بس بنتها ماعش نبيها ولا نبي انشوفهااااااا
امه عصبت : وهي بنتك في نفس الوقت
وسيم : انا مش ملزوم انربيها مانعرفش حتي ندوشها او نمشط شعرها ، البنت مكانها عند امها افهميني وحسي فيا حتي انتي كبيره مش حاتقدري عليها نهائيا
امه : انا نعترف اني غلطت في اختياري
بس لو تبي الربح مني وتبي رضايا بنتك ما تخليها زي ما خلتها امها .. لازم تتقرب منها وتعلمها الصح من الخطأ وبعدين ليش ما تفكر تتزوج من جديد شنو فيها مزلت صغير راه عمرك 35 .. تزوج بلكي تطلع بنت كويسه تربي بنتك وتجيبلها خوات
وسيم : قتلك ماعش تحكيلي عالزواج
انا جربته مره وحده وشعفت عليه
امه : مش كل البنات زي بعضهم انت بروحك ديما اتقول في هالكلام .. يعني مستحيل يكون في زوجات مهملات اكتر من المهتمات .. انا مش قاعدتلك طول العمر حتي اختك متزوجه وراجلها مستحيل يوافق ياخد بنتك ايربيها وانت عايش وامها عايشه .. الحل عندك فكر كويس لو فعلا تخاف ربي شوف في اعيون بنتك المسكينه يلي ضاعت لا باتها يبيها ولا امها تبيها .. تزوج وجيبلها ام
وسيم نزل راسه وهو يلصق في الاوراق وماردش علي امه يلي قعدت تبكي بقهر
انصدم وبحت فيها : معقوله تبكي ؟؟؟
امه طلعت وماردتش عليه حضنت الطفله وقعدت تبكي : لو باتك يبي يقعد هك ان شاء الله ربي ياخدني انا وياكي وينحرم مني ومنك توا يندم وقتها علي تصرفاته
وسيم انصدم : بعيد الشر ماعش تقولي هالكلام .. الله يربحك سامحيني بس ارجوك عطيني مهله بس انفكر لان موضوع الزواج مش ساهل ولا لعب انا كبير ونبي انسانه تفهمني وتكون متربيه وبنت عالم وناس .. بنت اختك كرهتني في البنات وحده باير معفنه وانتي عارفتيني نحب النضافه وزدت كرهتها بعد شفت العفن يلي من وراها .. حتي بنتها ملك ريحتها مش حلوه لما ناخدها من امها تجيني وكأنها لها شهر مش مدوشه اسأليها بالله عليك : من يدوش فيك يا بنت ؟؟
