مجنــ🤣ـــٌونتي ... الحلقه 29
كوثر كانت مع رويدا تساعد فيها في ظيافه .. جاتها زمرد : كوثر ممكن شويه
كوثر انشغلت من وجهها : خير في شيء ؟
زمرد بخوف عليها : ااا يبيك رائد في سور
كوثر حطت الحجاب علي شعرها : خير ان شاء الله .. توا نعدي نشوفه لان انشغلت
زمرد غمضت اعيونها وخافت واجد عليها
اول ما وصلت كوثر في السور انصدمت هي ما شافتش رائد ، لكن شافت شخص اخر له فتره طويله جدا ما شفاته ، قعدت تبحت فيه بحنين ولكن لما اذكرت شنو صار .. لفت تبي تمشي ولكن مسكها مع مرفق يدها بترجي : كوثر اسمعيني شويه
كوثر رقيتلها بحتت فيه بحقد : حول يدك ما تلمسني يا غلطة حياتي ... انا خلاص كرهتك ماعش نبيك ولا نبي انشوفك وتوا طلقني وريحني احسن ما تندم اقسم بالله
معاذ مصدوم : للهدرجه تبي تتخلصي مني
كوثر فكت يدها منه : اكتر مما تتصور والله
خلاص يلي بينا انتهاء .. مافيش نصيب والغلط مني هضا اختياري من الاول طلبت النجاة منك لما كان خويا ناوي يضربني عشان خايف عليا بشكل مش طبيعي .. عارف خوف الاخ ما يتقارن مع زواجي من عيل شلتوت زيك .. نزلت من عيني خلاص
كملت كلامها علي كف قوي جدا ، لدرجة دموعها نزلو شلال وخدها قعد احمر
بحتت فيه بقهر ورفعت يدها ناويه تضربه كف بس هو حضنها بالقوة : كوثر خلاص توا نريحك مني وبصوت نادم قال وهو حاضنها ويرعش : أنتي طالق توا توصلك ورقة طلاقك قريبا .. تباعد من عليها
وطلع من الحوش دغري ، لقاه رائد قدامه وقفه : وين ماشي شن صار معاك يا معاذ
بس هو ماردش عليه وركب في سيارته عدا
رائد خش لأخته ولقاها تبكي بدون صوت قرب منها بخوف : كنك شن صار ، دار فيك شيء الحقير ؟ جاوبيني والله نقتله والله
كان يبي يلحقه بس مسكت يده : خلاص وافق يطلقني وحاتوصلني ورقة الطلاق
رائد بحت فيها وانتبه لخدها الحمر : هو يلي ضاربك صح .. صدقيني مش حانرحمه
كوثر : عشان خاطري خلاص وانا ماعش نبيه نهائيا ولا طايقه انشوفه ، سامحني يا خويا بسببي انا تزوجت من صاحبك انا ندمانه وياريت ما وافقت عليه ، انا حانرضى بطلاقي ماعش نبيه ولا يهمني
رائد زعل واجد علي وضع اخته كان سيء
بعد ايام وصلت ورقة طلاق لرائد ويلي وصلها لهم محامي معاذ يلي رافض يشوف رائد وكوثر مره تانيه .. لما رد لعيلته تغير عليهم وحبس روحه في شقته مايبي يشوف حد اذكر لحظاته الحلوه معاها
مسح دموعه يلي نزلو ، كان ندمان ومش قادر يتحمل قصة طلاقه منها ، تمنى يعيش معاها طول العمر بس كوثر رافضه ومش طايقته والكلام يلي يوجع وأنقال في حقه ماقدرش ينساه أو يستوعبه ⚔️
------------
رحمه زارت هلها كانت مشغوله علي كوثر لأنها اطلقت خلاص وتغيرت 180 درجه كانت تسحبها ندمانه بس هي كرهت اليوم يلي طلقت لسانها وسمعها معاذ .. من طفولتها تتمنى راجل يكون سندها لكن معاذ ما شفاته يدافع عليها وعلي طول قاللها هيا نشيلك لرائد بنبرة صوت وجعتها اكتر مما سمعاته منه .. بس رائد قرر يغير نفسية اخته بعد تفك عدتها وكان مشغول عليها جدا .. بدا يفتح في محله ويستقبل في زبائن بشكل طبيعي رغم انشغاله علي خواته .. نساه زوجته زمرد يلي فقداته واجد بس ماتبيش تضغط عليه وهي حاسه بوضعه وخوفه علي خواته الاتنين يلي يحبهم وهما امانه عنده .. كان الحمل متعبها وبطنها بدت تكبر في الشهر الخامس حاليا وكانت بروحها توا .. وكوثر خلتها راقده علي راحتها لأن جوها مش تمام والبنت متغيره وتبي تكون ابروحها ماحبتش تزعجها او تضايقها .. زمرد دارت بسبوسه وتبي تعطي منها كوثر ، اتصلت بيها اختها رويدا يلي كانت علي طول تتطمن عليها واحيانا اتزورها في الحوش زي توا : انا في الطريق مش تفتحيلي
زمرد فرحت : اهلا وسهلا والله فرحت
رويدا : عارفه هههه انك فرحتي هيا اشويه ونوصل مش تفتحولي الباب يا حلوه
زمرد ابتسمت : حاضر ياعمري هيا تعالي
بعد وقت رن الجرس من تحت كانت تبي تنزل زمرد لان ما قدرت تخلي بسبوسه في كوشه توا تنحرق .. بس كوثر كانت نايضه وتشرب في اميه اول ما سمعت الباب عدت .. فتحاته بعد شافت من العدسه انها رويدا : السلام عليكم يا حلوه كيف حالك
كوثر سلمت عليها : وعليكم السلام ، انا الحمدلله كويسه خشي تفضلي ، نورتينا
رويدا بحتت في زمرد يلي كانت عالدروج قالت : وقفي خلاص ما تنزليش توا نجوك نحنا .. شن رايك كوثر تجي وتغيري جو ؟
كوثر : مانبيش نجعزكم انتو خوات خودو راحتكم مع بعضكم .. اعذروني وما تزعلو
زمرد : لا عاد انتي اختي وما تجعزي فينا بس الواضح انك ماتبيش تكوني معانا 🥺
رويدا : مزبوط ولازم تركبي معايا توااااا
كوثر ضحكت : خلاص تمام هيا نركبو
زمرد فرحت وطار عقلها .. ردت لشقتها والبنات وراها ، استقبلتهم وفرحت واجد علي جيت كوثر واخيرا وكانت تضحك معاهم وبدو يهدرزو ويغيرو جو مع بعضهم
