مجنــ🤣ـــٌونتي .. الحلقه 22
صباح 30 مايو : 2024
اليوم زفة العرسان والبنات توترهم زاد
بيان محبوسه في غرفتها علي يد حمزه عشان ما تطلعش أو ادير مشكله جديده
وأجل موضوعها بعد يفض العرس ويشوفها
زمرد بالها مع بيان وخايفه حمزه يضرها كانت تتصل بيه وهو مابش يرد عليها
حاولت معاه اكتر من مره لعند ما جاها الرد من أمل : ايوا زمرد وحمزه في الحمام توا
زمرد تنهدت : باهي بيان وينها شنو صار ؟
أمل : يا حنه قعد معاها للصبح وسكر عليها يعني هي محبوسه والمفتاح عنده توا
زمرد انشغلت : يستر الله يا خوفي يضرها
امل : انعنها ماتروح عليش تفكري فيها وهي تعامل فيك بحقاره وتضرب فيك
زمرد : تمام الكلام مش حايجيب نتيجه
وسكرت الخط وقعدت تفكر فيها اكتر
كوثر ورحمه يجهزو رواحهم عشان حايمشو الكوافيره ويلي حاتمشي معاهم هي رويدا .. لأن زمرد قررت تقعد مع الظيوف ورائد يبيها تكون موجوده افضل
نجوى سلفة كوثر طلعت فستان حلو بكل قعدت تهمس بروحها : توا نلبس هضا واكيد توا نطلع احلى منها هذي يلي يحكو بجمالها .. مزلت ما شفتها ولكن مستحيل نخليها اتغطي عليا لو مهما صار 😒
سند جاها : هيا مش قلتي تبي كوافيره ؟
نجوى لبست عبايتها وخذت فستانها حطاته في كيس : هيا واتيه كنك مستعجل
سند : مش فاضي عندنا ظيوف حانرد اخرا
نجوى تأففت ولحقاته شور السياره
كوثر ورحمه وصلو لعند كوافيره مشهوره ومعروفه في المدينه والكل يمشيلها
بالصدفه خشت نجوى وهي ماتعرفش كوثر ولا هي تعرفها اساسا بس الكلام يلي صار خلا نجوى تشك .. كانت مقمعزه اقريب منهم والكوافيره تسأل في كوثر
قالت : ما شاء الله لون شعرك حلو بكل
طبيعي صح يعني ماعمرك صبغتيه ؟
كوثر : اولا شكرا واجد .. تانيا لا والله ماعمري صبغته ، ومش ناويه نصبغه
ردت : يا فرحة عريسك فيك هههههه
كيف تعرفتو علي بعضكم احكيلي فضوليه
رحمه كانت رافضه ان كوثر تحكي بس اختها عنيده وحكت الأخضر واليابس لها
الكوافيره بأنبهار : ما شاء الله بجد فضيعه انتي .. ان شاء الله الف مبروك ربي يهنيك
كوثر ابتسمت : شكرا .. علي وصلت رساله لتليفونها وكانت من العريس : شوفو شنو كتبلي معاذ حبيب قلبي ( آخِر لَحًظُآتٌ آلَعٌزٍوٌبًيَةّ تٌنِتٌهّيَ آلَلَيَلَهّ .. بًعٌدٍ آمًسِآکْ يَدٍيَکْ يَآ زٍوٌجّتٌيَ آلَعٌزٍيَزٍةّ سِنِکْوٌنِ لَبًعٌضنِآ )
رحمه مسكت ضحكتها وما قالت ولا حرف
الكوافيره بأنبهار : ياعيني انا عالعاشق ههه
نجوى كانت البنت اديرلها في مناكير بحتت في كوثر : العريس اسمه معاذ ال #
كوثر بحتت فيها : اها وشنو عرفك بيه ؟
نجوى بنضرة خبيثه : انا سلفتك يا ماما
كوثر ارتبكت بعد اذكرت الكلام يلي حكاته كله هما مايعرفوش اصلا : اها اهلا وسهلا
رحمه قرصتها : هضا يلي يفتح فمه
يخش فيه الذبان يا غبيه .. شفتي سلفتك
كوثر انقلب وجهها والقط كلاه لسانها
نجوى بأستمتاع : وين كنك ماعش حكيتي
كوثر : شنو نبي نقول مثلا ، وضحيلي ؟
نجوى : عمتي ماتعرفش ان لسانك طويل
ومعاذ ما عرفك ألا بعد سمعك تعيطي
كوثر عصبت : شن قصدك معليش ؟
نجوى : ماقصدي شيء بس نوضحلك
كوثر شدت علي يدها ومابتش اترد
علي جيت رويدا كانت تجيب في قهوه مع زوجها عطاها وماعدش ألا بعد شافها خشت : هلا جيتكم معليش تأخرت
رحمه تغير في موضوع : عارفه راسي وجعني .. القهوه جات في وقتها
كوثر : فعلا اصلا في ناس توجع الراس
نجوى ماردتش عليهم وكانت تبتسم
الكوافيره بعد هما شربو القهوه بدت تكمل في شغلها معاهم وانعجبت بيهم واجد وتمنت لهم السعاده علي طول .. بس كانت ملاحظه ان سلفة كوثر حقوديه بكل واعيونها تحرق حرق ولكن كوثر متجاهلتها
