مجنــ🤣ـــٌونتي ... الحلقه 30
آلَنـــــــٌصـــيب أقــــــوى من الحًـب ❤️🩹
_______________________
كوثر طلعت من عدتها وتفاجأت من خوها رائد انه مسجلها في الكليه يلي تحلم بيها والتخصص يلي ميته عليه يلي هو القانون ومش بس هك .. شالها لمدرسة تعليم السواقه وجابلها سياره صغيره تناسبها من الفرحه قعدت تبكي : والله حاسه روحي نحلم .. مش قادره نصدق يا خويا 😭
رائد بأبتسامه : لا مش حلم والله حقيقه
كوثر مسحت دموعها : ربي يخليك لنا وما يحرمنا منك يا اجمل اخ في العالم
رائد : ولا يحرمني منك .. انتي من قبل قلتيلي انك ماتحبيش الخمار صح ؟ خلاص ماعش تلبسيه يكفي حجابك وعبايتك يا بنت وماتنسيش انك مطلقه !!
كوثر من اخر كلمه نطقها زادو دموعها شلال .. ورائد حضنها وقعد يهدي فيها بقهر قال : ما تزعليش توا يجي يلي احسن منه .. انا متأكد وربي يرزقك بولد الحلال
كوثر ماردتش كانت تبكي وبس .. ماعمرها فكرت انها حاتكون لغير معاذ بس الواضح ان النصيب كاتبلها تكمل حياتها من دونه
بدت كوثر في الجامعه بشكل رسمي اول مره وصلها رائد كان وراها بسيارته يبي يطمن انها تعلمت السواقه كويس اول ما اطمن عليها عدا عند بوابة الجامعه وهو يتمنى التوفيق والسعاده لها .. طبعا البنت كانت فرحانه ونفسيتها تحسنت احسن من قبل .. كانت ملفته للنضر بشكل ازعجها لان عبايتها وحجابها كان محتشم عكس الباقي يلي شعرها باين والمكياج والجو هضا ويلي لابسه بلوزه اقصيره كانت الجامعه فوضى .. كانت متوتره بكل وهي تمشي عالدروج وخوها رائد باعتلها جدولها وشرالها كل شيء تحتاجله من كتب واقلام وحقيبه تجنن خاصه للجامعات وبعمرها
اول ما خشت للقاعه المحدده لقتها فاضيه ترددت اتخش بس في النهايه خشت وقمعزت .. قعدت تلعب علي صوابع يدها بتوتر وخوف ، لها زمان علي اجواء الدراسه
المهم تدريجيا بدت القاعه تتعبا طلاب منهم اكبار في العمر .. كل اشويه يخش حد وفوضى وهدرزه بصوت عالي هي اضايقت وطلعت اشويه عند الباب علي جيت الاستاذ كان يلعب علي مفاتيحه ويمشي بدون ما ينتبه قدامه خبط في كوثر يلي كانت تقرا في الكلمات المعلقه عالساس قدام القاعه .. هي عيطت وقريب طاحت بس مسكت نفسها في اخر لحظه
اما الاستاذ مصدوم ماقدرش يمسكها لان واضح محجبه ومحافظه علي نفسها قال بأسف : معليش انا اسف ما شفتك والله
كوثر شدت علي يدها وبحتت فيه بقهر قالت : معليش ليش الاسف يبي يردني لمكاني الاول وما ايطيحني ثور زيك ؟
رفع حاجبه : له له ثور ليش نحنا في حديقة حيوانات يا بطريقه هههههههههه
كوثر شهقت : انا بطريقه يلي ما اتحشم
ضحك الاستاذ : مع الاسف عندي محاضره ماعنديش جو نتناقش ونلعب مع البطاريق
وعدا بدون ما يرجاها اترد عليه ، خش للقاعه قدام اعيونها تسحبه طالب معاها لعند ما جمعت كويس ولحقاته لقاته يحط في حقيبته عالطاوله الخاصه بالاستاذ حطت يدها علي قلبها من الصدمه : حي عليا كيف حانخش توا .. اكيد حايلزني
كان حايسكر الباب لقاها قدامه منزله راسها زي الاطفال : عفوا تبي تقولي شيء ؟
كوثر : انااا اسفه وعندي محاضره هنا
الاستاذ بأبتسامه فتح الباب : تفضلي !
خشت كوثر وهي خلاص منحرجه ماقدرتش تبحت فيه او في الطلاب
قمعزت اخر وحده هالمره وطلعت ذفترها وهي ترعش .. بعد وقت تكلم الاستاذ قال بأبتسامه يرحب في نفسه : اول شيء السلام عليكم يا طلاب انا الاستاذ وسيم حانعطيكم بأذن الله مادة قانون التجاره
كل سنه وانتم طيبين علي عيد الاضحى وركزو معايا + مانبيش كلام جانبي وكل حد يكتبلي اسمه في الورقه هذي . طلع ورقة طلب ومدها للطلاب الجالسين في اول صفه .. هما ردو عليه : وعليكم السلام
تشرفنا بيك وفي يلي قال : ان شاء الله اتكون الماده ساهله ومش صعبه عليهم
وسيم قال : خلاص عاد مانبيش ناخد ونعطي معاكم لان عارفكم انا معطي من قبل وبعد يفتحو فمهم ماعش يسكروه
لذالك اكتبو اساميكم بسرعه لعند ما نكتب عالسبوره .. وياريت بدون كلام جانبي
كوثر تعايب عليه في نفسها : ياريت بدون كلام جانبي .. اوف عليك بارد حاصل في نفسه ما ابرده ، ربي يصبرني علي هالشكل
وسيم اول ما كمل الكتابه وصلت لعنده قائمة الطلاب كانو 30 .. اتكأ عالطاوله وبداه يقرا في الاسماء : محمد
قال بأبتسامه : هنا
وسيم تجاهله : مالك
قال : نعم
وسيم : زينب
قالت بدلع : نعم يا استاذ
وسيم بحت فيها بتقزز : كوثر
ما سمعاته كانت اتخربش في ذفترها
هو عصب بزياده : تي وين كوثر ؟؟؟؟
نطت مفجوعه وصبت دغري : نعم
كلهم بحتو فيها لأنها صبت وانفجعت
وسيم يهزب : وانتي معليش طرشه ولا تستهبلي عليا ؟ .. امبدري عارفه نفسك شنو حكيتي ومشيتها لك ، وتوا ماترديش عليا لما انادي علي اسمك شنو ملكه انتي ؟
كوثر خدت دفترها وكل شيء وهي خانقتها العبره وعدت تجري عزقت قدام كرعيه الذفتر قدام الكل : اول واخر مره نحضر معاك .. انت واحد مش محترم
وطلعت تجري خشت للحمام وقعدت تبكي بقهر .. انصدم وسيم والطلاب بعض منهم يضحكو عليه وفي يلي معاود معاه وهاللقطه ماعمرها صارت في حياته
خداه الذفتر وطلع من المحاضره يدور عليها .. اول ما خطم من عند الحمامات سمعها تبكي ، حس روحه غلط في حقها
قعد يراجي بعيد اشويه اول ما طلعت جاها يجري : يا كوثر استني اشويه
كوثر تمشي بسرعه ماتبيش تحكي معاه
قاطع عليها الطريق : يا بنت انا اسف معليش كنت مضايق وجات فيك انا اسف
كوثر : انا مش اختك عشان تعاملني هك وبعدين عليش تلحق فيا هك احترم نفسك
معاذ لحقها اخرا : الذفتر يا طالبه خوديه
كوثر خداته بقهر : عشان من خويا بس
كان هضا ما ناخده من يدك المعفنه
وسيم ابتسم : تمام اهدي وخودي نفس
العصبيه مش كويسه عارف اني غلطت معاك .. بس مش كأنك انفعلتي واجد عليا
كوثر ماردتش عليه وخدت قهوه قدامه وقبل ما تدفع حقها هو دفع بسرعه
هي عصبت وسيبتها له .. وخدت فنجان اخر وحطت فلوس دغري عالطاوله
وسيم خداه القهوه يلي مسكتها كوثر بأبتسامه : اووف البنت هذي فضيعه
لحقها : تعالي للقاعه توا يقولو جبانه
علي الاقل لو جيتي حايقولو ردت بكرامتها وراسها مرفوع وفوقها وراها الاستاذ
كوثر ماردتش عليه وهو عنيد بالغصب يبيها اترد ومحاضرته مخليها مفتوحه
الطلاب يراقبو من بعيد وفي يلي يضحك وعاجبه الجو .. عشان يهدرزو ووسيم رافض يمشي : علي فكره الطلاب يراجو
كوثر بأستفزاز وهي تشرب : انا ما قتلك ألحقني .. يعني امشي لمحاضرتك احسن
وسيم تأفف : يا بنت الحلال تعالي اول واخر مره معليش مش حاتتكرر مع حد
كوثر : لو رديت توا صدقني مش حانرحمك لو زودتها معايا بالكلام او النضارات .. انا كوثر يلي يهزني نهزه
وسيم بأنبهار : تمام يا شخصيه انتي
هيا للقاعه للأمام دور ههههههههههههه
كوثر بسخريه : هههه بايخ ولليسار دور
وسيم ضحك : ينعن جد راسك ضحكتيني
كوثر ماردتش عليه وعدت للقاعه وهالمره كانت اقوى بواجد ورافعه راسها بثقه
قمعزت في مكانها .. خش بعدها وسيم وكمل قراءة الاسماء تعرف عليهم كلهم في يلي حفظهم وفي يلي لا .. بس كوثر كانت مميزه بشكل مش طبيعي فحفظها دغري
