# طشت خرز
كنوز القحطاني
زينب
ادري
الصبر مريود بس لشوكت عود
ربي البقى من الحال مايشبع الدود
**********************************
مُهره
نهض وَلي الله يباوع عليها من دون كلام او رد فعل ع كلامها وهي دموعها تجري وعيونها بعيونه كأنها تعتذر عن كلامها او تتوسله ان ما يصدگ كلامها
ماحس اله صوت أنمار عاط شايغه روحه من ضربه وَلي الله دفره ع خاصرته بكل قوته خلى يتمرغل بالگاع
اجت خاله زينب هي و رايه هم و رابحه گامت تردح بصوتها،،
جر وَلي الله روز أخذها وياه غصب وهي تبچي تتوسل بي يعوفها وهو ولا يمه
رحت وراهم اني هم روز معانده تريد ترجع هد ايدها وَلي الله گال وهو يأشر ع باب بمعنى روحي
وَلي :- تردين تروحين مو، روحيله بس وحق لا إله إلا الله اليوم ما يطلع عليه صبح اگتله والله ابتلي بي وخل اروح اعدم عود
گعدت روز بالگاع تبچي وتلطم ع وجها بقهر وتصيح
روز :- ليش ماتفهم أنمار حقير كلشي يسوي والله يأذيك يذبك بالانكس منها
ضلينا واحد صافن بوجه الثاني كلامها و خوفها مو طبيعي مو خالي ورا شي وخصوصا من گالت بالانكس منها يعني مسوي شي و روز تعرف شي مانعرفه لو مهددها اكيد
فزيت ع صوت رايه من صاحت و ركضت ع امها ركضت عليها سندتها وياها گعدناها خطيه ورايه جابت الها مي ماترضى تشرب عينها ع روز بعجز
رفع راسه وَلي الله ع امه كأنه توه انتبه الها و روز ملخت وجها ادگ وتلطم تريد ترجع گمبص گدامها بعد اديها عن وجها و مسح دموعها والدم الترس اخدودها وحچه مستنكر طلب روز
وَلي :- شوفي حالج شلونه شوفي وجهج كله ازرگ كله هذا وتدرين ترجعين اله روز ليش بشنو مقصر وياج حتى تفضلين تگعدين يم واحد حيوان ع گعدتج هنا!!
بچت روز أكثر وغصت ابچيها لزمت چف ايده إلازم بيها اديها وباستها تترجى بي
روز :- ما اضل والله بس خليني ارجع وبعدين ورا ما اجيب اني اجي واطلب الطلاگ من ذاتي من دون ما تدخل انت حتى لا يگول اخوج حرضج ويحطگ براسه
غمض عيونه جر نفس قوي وزفره يهدا نفسه وگال
وَلي :- يعني ترديني اعوفج يم واحد يضرب ويهين بيج ومخليج گاتلج الجوع تاكلين خبز يابس حتى لا يحطني براسه هلگد اني واحد جبان و عار بنضرج حتى اخاف منه
_ مو جبان والله ماكو عار غيره بس خوفك من الماعنده مخافة الله كلشي مستعد يسوي ما اريد اخسرك وَلي اذا تحبني من صدگ خليني ارجع
