#طشت خرز
كنوز القحطاني
وَلي يگول
كسرت عظم و تهون واحسبها بالريش
شو عندي ثلث اخواني مابينوا ليش
رد عليه حمزه يگول
خاف يشح عليك فزع الگرابه
نفزعلك مكيفين شر والله جابه
***********************************
حچيت بصوت عالي حتى يسمعني
رايه :- حمزه كافي أمي نايمه لا تخرعها
رد بكل برود مبتسم وهو يرمي
حمزه :- لا راح تگعد تهلهل من الفرحه
_ قصدك من الهبطة
باوعت ع شارع لان التيغة مالتنه ناصيه شفت واحد ملثم بالفرع گدام بيت عمي مباشر يرمي
رجعت ليورا اباوع عليه يبدل الشاجور ويحچي مستمتع
_ يول بيت عمج تصرگعوا دحگي عمج يوايگ من الشباج مثل النعامه ضم راسه
عاينت اله بغيظ من يگوم يخبط باللهجه اصير مثل الأطرش بالزفه كلمه افتهمها وكلمة لا بس من سياق الكلام فهمت عليه
درت راسي ع مُهره تاشر بيدها ع بيت عمي و تحچي
مُهره :- ذاك ذاك أنمار
سمعت صوت امي نزلت اركض صاحت
زينب :-شكو ولج شنو هالرمي
بلعت ريگي نشف من الهبطة ومن الركض ع درج و جاوبتها
رايه :- هذا حمزه دا يرمي ع بيت عمي
تبسم ثغرها و دمعت عيونها
زينب :- بعد ايدي ايده حيل وبابو زايد بيهم
طلع كلامه صح امي بعد شويه وتهلهل
شويه وصارت صنته وگب العياط من بيت عمي
طلع ابويه يشوف حطت امي ربطتها ع راسها وراحت ورا واني وراهم هم اريد اشوف منو فطس
مديت راسي من ورا ابويا طلع عمي ساند حمار ع گولت حمزه يمكن جايه الطلقه برجله تجري دم و صفاء لازم ايده مخلي عليها وصله
طلع حمزه من بيتهم يلف بالجراويه وچتف اديه ورا ظهره يفر بالسبحه لو اني اسويها اخلي بالسبحه كل دقيقه طايره بمكان ،، ويردد بصوت عالي
حمزه :- وين يروح المطلوب النا والله نجيبه لو طار الحگ
ابتسم حمزه بوجه عمي شماته وعمي گام يگمز نوب هد أنمار خلى وگع بالگاع وضل يصيح
محي :- هاي انت مو اي انت منو غيرك يسويها
هز حمزه راسه اي وجاوب بكل برود
