#طشت خرز
كنوز القحطاني
وَلي
الما شاف راحه بروحه شله
طاحت عليه مالحگ يگوم
ويطيح فد يوم ع عله
ماعشت ياربي عمري مرتاح
خليني انام العمر كله
من يسير اضيعه الگرايب
عشرين بس الوجه شايب
ماگول گلبي لهسه ما طايب
بس ع سگاطه الگلب طايب
*************************************
وقبل لا تحچي امي فزينا ع باب الحوش اندفع بكل قوة وطبت غفران تركض وتلطم ع راسها وتخرمش بوجها وتصيح بصوت يشعب الگلب
غفران :- قتلهم قتلهم يبووو
تصرخ وتلطم ع وجها نريد نفتهم منها ماكو امي من الهبطه تريد تنهض بعد ماتگدر زمخت بيها بذعر
زينب :- ولج احچي شكو من مات شبي اخوج
ضربت ع راسها وحچت وياريتها ما حچت
غفران :- ابنج گتل الياس وبلال گتلهم خلاص ذابهم من الطابق الثالث
يبست بدمي بعد لا اخذ ولا انطي شتحچي منو نقتل ومنو القاتل اريد تستوعب كلامها الياس و بلال اخوه لـ وَلي الله شلون قتلهم
فزيت ع صوت امي تصيح باسمي تريد اعينها تگوم رحت الها بلا وعي سندتها طلعنا برا الصياح والنسوان تلطم و الزلم تتراكض وكلها تردد نفس كلام غفران
اجتنا صفيه هي و مُهره ركضت ع امي سندتها وياي تحاول اطمنها رحنا للمستشفى هوسه وأهل الياس و بلال تارسين المستشفى المكان انقلب مناحه الغريب والقريب واگف يتفرج الخبر مثل الصاقعه و وگع ع روسنا
امي ادور بالوجوه ع وحيدها تريد تلمح اله أثر ماكو تروح وترد بالمكان مثل طير مذبوح تنده باسمه بلوعه صارت أقصى أمنياتنا شوفته كأنها تريد تضمه بين ضلوعها حتى تخفي عن الظلم المنتظره
ضليت واگفه بمكاني رجليّ تسمرت گلبي يرجف احسه ع لحظه يوگف عيوني تنتقل وياهم بفزع و رعب من مكان لمكان عويل و نحيب ملئ ممر الطوارئ صوت نغيط بإسم وَلي الله يصيحون هو الـ قتلهم
امي عيونها مفتوحه بذعر و رعب تريد احد ينطق بكلمه ويرد جواب سؤالها ماكو و چلماتهم صارت مثل نار تحرگ
عقلي احسه وكف عن التفكير اريد استوعب الصار بهذه الدقائق ما گدر
ركضت ع امي من وگعت بعد ما نفذت كل طاقتها افترشت الأرض تتوسل بالرايح والجاي
زينب :- ابني وين ابوس رجليكم بس گول الي ابني وينه وين وديتوا
_ ولج رايه عينين اخوج راح يروح من بين اديه
سندتها اني و صفيه رادت تگوم ارتخى جسمها بين ادينا تحچي بصوت مبحوح
زينب :- عيوني عيوني بعد ماشوف عيوني ولج رايه اخوج اخوج شوفي وين
أنت تقرأ
طشة خرز
Mystery / Thrillerطشت سنين المحبّة و من بگاياهن شلمّ ؟ مرّة تغفى جروحي بيّه و مرّة أحنّ وانلچم
