#طشت خرز
كنوز القحطاني
زينب
منو
مثلي واني الضيم تارس شليلي
محني الظهر ضليت وسفه ع حيلي
*********************************
ولايه
وصلت نهاية الدرج اباوع ع الگاع كلها تراب وخاصة ويا الحياطين گلت يله يجوز بعدهم مامنظفين وخاصة هذا الطابق للمرضى اكيد شغله أكثر يوميه يتوسخ.... مشيت شفت ثنين واگفين حچه واحد سئلني
_ عاملة جديده ؟
طبعا عرفني من سطلي و ماسحتي هزيت راسي اله اي عاقجه وجهي بوجه مانطي مجال من ابتسامته ماتراحيت اله
رجع گال مبتسم
_ احسن مكان تتوظفين بي هو هنا وعلي
عگدت حاجبي مافهمت كلامه
ولايه :- ليش !!
_ فول راحه لا شغل ولا عمل گاعدين نتثاوب منا لمن نطلع يعني باختصار راح ترتاحين وراتبج يوصل ليمج
ضليت صافنه عليه هذا صدك يحچي شارب شي من الصبح ولا يگولها بكل صراحه عادي
ولايه :- شنو لا شغل ولا عمل انت متشوف شلون المكان كله تراب
رد بكل بجاحه
_اي چا شنسويله
_ شنو شتسوي انت هنا تشتغل عامل يعني غصباً ماعليك تشتغل وتسوي واجبك وتحلل خبزتك
ضحك وضرب صاحبه على كتفه وگال
_ لك هاي من جماعة خبزه راح تضل تاكل بروسنه
ضحك صاحبه هم وحچه
_ وعليمن نتعب رواحنا همَّ مخابيل ليل نهار شاخطين مايدرون طشت لو رشت نوب ترديهم يدرون بالمكان الگاعدين بي نظيف لو وصخ
_ واذا مايدرون هذا ماينطك الحق تقلل منهم وتخلي مكانهم بهالقذاره و اكو شي اسمه امانة المهنه
_ يا امانه رحمه لربج هو احنا فراشين قابل وزراء حتى أمانة
ابتسمت من گال ع نفسه فراش
ولايه :- مايفيد النقاش وياكم لان انتوا نفسكم مامقدريها ومحترميها ما انتظر منكم تحترمون الغير
عفتهم وحدهم يدردمون ورحت امشي اشوف المكان حتى ابدي انظفه طلعت بنيه من من احد الغراف لبسها كله ضيق ومطلعه نص شعرها من الشال تعوج بحلگها واطگ بعلجها راحت يمهم تتمضحك و تسولف
وگفت بنص الممر تخوصرت المكان كله تراب و وسخ مبين عليه مامنظف من زمان التفت اكو حمام وراي طبيت ترست السطل وطلعت حتى ابدي انظف رحت ع
اول ردهه خاصة لنساء اول مافتحتها گفختني ريحة البوخه و العفن باب مسدوده شبابيك هم فوگ تنظيف ماكو وصيف فوگ مرضهم النفسي ع هذا الوضع حتى أمراض جسديه وتنفسيه تصيبهم
أنت تقرأ
طشة خرز
Mystery / Thrillerطشت سنين المحبّة و من بگاياهن شلمّ ؟ مرّة تغفى جروحي بيّه و مرّة أحنّ وانلچم
