طشت خرز

اعلان 🔗

لفيت عباتي عليّ حيل الجو كلما تعمق الليل يبرد أكثر رفعت رأسي اباوع لسماء نهاية الشهر الگمر عرجون،،، خفضت بصري اباوع على الأشجار تلفظ أوراقها الاخيره،،، أواخر شهر الحدعش آخر ساعات بفصل الخريف نهاية السنه،،،

منين مادور وجهي اشوف نهاية محيطي عبارة عن نهايات،،، ابتسمت بمرارة بيني وبين نفسي نهايتي اني هم نهاية زواج دام سنين عجاف انتهت نهاية مأساوية من دون ماتخضر سنابلي،،

نهاية علاقة سامه انتهت وتركت ندبة بوسط روحي ماينمحي أثرها بيوم تركت جرح مايندمل أبد وشلون يبره جرح المفارگ ضناه يمكن اسامحه على كل شيء سواه بيه على ثقتي الخانها على سنين عمري الهدرها

على اللوعات العشتهن وياه بس ماسامحه على أخذ أولادي مني على اخذ قطع گلبي و روحي مني راح اضل طول عمري كلما اذكره و أحن لأولادي اگول " حسبي الله ونعم الوكيل"

صح ماعندي سند بالحياة بس كلي ثقة ان الله تعالى ماراح يضيع حقي ماراح يعوف دمعتي المانشفت و لوعة گلبي من دون عقاب اله واذا حقي ماخذته منه بهالدنيا وماتگحلت عيني بشوفة أولادي مرة ثانية بالآخرة اخذة " وعند الله تلتقي الخصوم "

جريت نفسي بحسرة تهد جبال گعدت على رصيف احس بعد ماگدر امشي خطوة وحده أكثر باوعت على طريق الچنت امشي بي طويل وحشة يصفر ضوه اصفر ومو كل الاعمدة مشتغل ضواها

بعدت هواي عن البيت بس لسه اكو شي بداخلي اسمه الخوف يدفعني اگوم وامشي أكثر ابتعد لازم ابتعد على گد ما أگدر عن البيت حطيت أيدي على بطني البدت تنتفخ وتبين أكثر يوم عن يوم لازم ابتعد حتى احافظ على اخر قطعه من گلبي لان اذا سلبها مني تنسلب روحي وياها اخر أمل الي حتى اكمل حياتي،،،،

حطيت اديه على رصيف البارد اتوچه بيه حتى أگدر اگوم ورجعت امشي

صار الليل أكثر ظلمة احس هالليلة مظلمة أكثر من باقي اليالي سوده محملة بنيران الهجر التلهب بصدري كل شيء صار رماد كأنه لم يكن سرق أيام عمري الچانت تنبض روحي بيها هدر كل تعبي هدم كل ذكرة بنيتها

دون سابق إنذار تحول كل شي رماد حملتَه أجنحة الريح بعيد ماكو اي سبيل للعوده بعد بقت روحي اسيرة لذكريات بائسة ذكريات سرقت أجمل أيام عمري،،،،

رفعت اديه انفخ عليهن بخار البركان المشتعل بريتي عسى ولعل يدفن شويه احس عظامي تتراجف البرد دگ بيها مثل دگ البسامير اسمع اصطكاك أسناني من شدة البرد بعد مابيه اي حيل ظهري انفصم بالنص رجعت گعدت على رصيف امسح دموعي بقهر على روحي أصعب شعور ممكن تحس بي هو شعور العجز،،

انك عاجز تساعد نفسك مثل الغركان المالگه حتى سِباحه يجلب بيها،، ربعت اديه على رگبي وحطيت راسي عليهن بتعب جسدي وأكبر منه تعب روحي احس روحي تايهه ضايعه يادرب اريد امشي بي الگاه مسدود الك بيها أراده يالله ولا اعتراض على حكمك اني تحت سماك ورحمتك واحن من أمي عليّ سلمتك أمري بعد وراضية بحكمك مهما كان..

عيوني بعد ماطاوعني گامت تسلهم النعس بدا يغلبني

فزيت مرعوبه على صوت

________________________________________

رجعت امشي الجو حار لهيب يلفح بوجهي احس الشمس تمشي فوگ راسي وتدمغ بيه،،

الشارع فارغ دنيا ظهريه والشمس تصگع منو يطلع بهلوگت بس المثل حالي يدور لگمة يومه حسيت ريگي نشف من الحر طلعت بطل المي من جنطتي صاير جمر فتحت وشريته كله من العطش ماكو محل قريب عليّ ولابيه اتحمل العطش اكثر سديت البطل ورجعت البطل لجنطه حتى اترسه واجمده لباجر هم،،

حطيت فايلي على راسي وگصتي من شمس وامشي اباوع على قصور اتذكر من جنت صغيره ونطلع اني وخواني ونشوف بيوت حلوه نگوم نقسمهن بينا كلمن يختارله بيت ويگول هذا بيتي،،

كبرت وتغيرت نظرتي لناس ولكل شي من اشوف بيتنه صح مو ذاك القصر بس حلو مرتب وكامل من اشوفه احس بي كل الأمان والدفوا ويمكن اي واحد يشوفه تكون فكرته نفس فكرتي عنه بس داخله يختلف بهواي عن شكله الخارجي داخله مليان قصص،،

قصص حزينه وسعيده ويمكن كفة الحزن رجحت أكثر،، قصة أطفال تيتموا ورحل سندهم قصة ام مريضه وتعاني ألم المرض كل يوم قصة ابن تخلى عن امه و اخوته وراح ورا مرته...

من يومها وصرت من اباوع ع بيوت اگول بداخلي مهما كان الهدوء والسكون يحيط بهاي البيوت بس لكل بيت قصة يمكن منهم الفاگد عزيز منهم اليصارع المرض منهم التخلوا عنه احبابه وبعد هالدنيا كون كل واحد همه لون

ومثل مايگلون اليشوف مصيبة غيره تهون عليه مصيبته وصلت فرعنه تنهدت بحسرة مثل كل يوم اطلع ادور على شغل وراجع اجر اذيال الخيبة من دون مالگه شغل....

طبيت امشي بفرعنه انداريت على صوت ابو المحل ابو احمد رجال جبير قديم بالمنطقه ::
هاا بويا بشري مالگيتي شغل

هزيت راسي لا بأسى على نفسي ::

لا والله عمي لسه

ابو احمد : الله كريم بويا ماتدرين على يا ساعه الفرج... سكت شويه وگال مثل التذكر شي ::
صدك سمعت فاتحين عقود ماتشوفين بلگي تحصليلج وياهم عقد .. بس

تهللت اساريري من كلامه دائما اخباره صحيحه بس تلاشت ابتسامتي من كال *بس * عگدت حاجبي وسئلته بريبه ::

بش شنو عمي

تنهد ابو احمد وگال ::

بويا مو سمعت يردون عمال خدمه وانتِ مهندسه ماعتقد توالمج هيج شغله

هزيت راسي بلا معني وصفنت بكلامه ليش احنا عامة الشعب يحق النا نختار الشغل النريده ونشوف نفسنه بي مالنا نصيب بين جشعهم وضاخمة بطونهم،،

خليت ورحت اكمل طريقي وكلام ابو احمد يرن براسي شغل واني رايده شغل بس شلون عاملة خدمه مو قصة تكبر لا استنكف بس استحي مامشتغله هيج شغل قبل ولا حاطه بحسابي هيج شي

دفعت السلايت مال الباب فتحتها وطبيت نزعت حذائي وسمعت صوت اخويا الجبير يصيح انخمش گلبي طبيت اركض شفته واگف بنص الصاله گبال امي ويهد وينفلت و

اعزائي ومتابعي حسابي انتظروني بقصتي الجديدة *طشت خرز *في مطلع شهر حزيران المقبل ان شاء الله

# ولا تنسوا رفع الإعلان وابداء ارائكم والتصويت عليه مع تمنياتي متابعتكم لحسابي @knonuz313
ليصلكم كل جديد يتعلق بالقصة

مع خالص محبتي وودي لكم

# الكاتبة كنوز