#طشت خرز
كنوز القحطاني
الحنظـل
لينجرع مرات لو اقيسه بسوالفهم
ومرات البعد مريود للموزينه عشرتهم
**********************************
زينب :: عيوني بعد ماطاوعني گامت تسلهم النعس بدا يغلبني
فزيت مرعوبه على صوت
_محتاجة شي خيتي !؟؟
رفعت راسي برعب احتل كل ذرة بيَّ الخوف من أن لحگني وراح يرجعني حتى يسحب اخر نفس بيَّ
هدأت روحي الملتاعه من شفته شاب واگف قريب مني حاني ظهره و مدنگ راسه عليّ يسئلني عاگد حواجبه منتظر مني جواب بعد ما كرر سؤاله أكثر من مره واني ساكته بلعت لساني من الخرعه ...
حچيت بتعب وصوتي مخنوگ من البچي
_ لاخويه مامحتاجه رحم الله والديك
هز راسه أكثر من مره عدل وگفته ورجع گال
_ چا شمگعدج بنص الليل بالشارع خيتي
سؤاله فزز جروحي نترسن عيوني بدمعهن المالح الحرگ خدي غصة بلعومي تخنگني... گعدني ضيمي وقهري گعدني زوج جاحد نكر كل جميل قدمته اله نسف كل عطائي وحبي اله نسى الموده البينا ونكث العهد العاهدني بي امام الله تعالى بس الله ماينسى
مسح وجهه بضيق من ماحصل على جواب شافي مني التفت يباوع على شارع الفارغ ورجع عاينلي ونطق بهدوء
_ خيتي ترى الوضع مو أمان وهاي گعدتج بالشارع تالي الليل غلط و مو كل اليمر منا ابن حلال وخايف الله احچيلي مشكلتج بلگي أگدر اساعدج
هو يحچي واني تزيد بواچي مثل طفل مستهظم ويسئلوا شبيك گبل يبچي
تنهد بقوة حتى سمعت صوته حط اديه على خصره يباوعلي بحيرة تقرب شويه گمبص گدامي وگال
_ خيتي بروح موتاج سكتي وفهميني علتج،، شنو گعدتج بالشارع على شنو رجلج طاردج واهلج مو منا؟ ..... سكت منتظرني انطي جواب
واني ساكته بس ابچي... رجع گال بتردد واضح بنبرته
_اعتذر ع سؤالي بس ضاحك عليج أحد ؟؟ بس احچي خل نتفاهم
رفعت رأسي موسعه عيوني على آخر كلامه هزيت راسي بـ لا وگوه طلع الكلام من حنجرتي
_ لا لا خويه محد ضاحك عليّ، اني متزوجه الحمد لله
سمعت صوت زفرة انفاسه براحه من جوابي گام على حيله وحچه
_چا گومي خيتي الليلة نظيفج إبيتنا ونفهم سالفتج شنو وان شاء الله محلوله
هزيت راسي،، لا،، شلون اروح ويا شاب ماعرفها هو العاشرته عمر غدر بيَّ نوب الغريب، مسحت دموعي و رديت بصوت مكسور
أنت تقرأ
طشة خرز
Mystery / Thrillerطشت سنين المحبّة و من بگاياهن شلمّ ؟ مرّة تغفى جروحي بيّه و مرّة أحنّ وانلچم
