طشة خرز

البارت 23

#طشت خرز

كنوز القحطاني

رايه

لملمني اعله كيفك لاتجيس الروح
واعزلهن عدل لو ردت تحسبهن
ينباعن شلع اجروحي للشراي
واذا رايد بعد انطيك توزعهن
مثل ملجئ يتامه الگلب بالحسرات
هنه هواي عفيه شلون ماخذهن
ادوس اعله روحي وما اگلك اخ
خايف من اصيح بصوت افززهن
***********************************

شاهين

_ هسه راح اطلعه حتى يساعدنا

_ هالايام ارتب الإجراءات إفراج شرطي بحجة حسن السلوك حتى محد يشك بخروجه

_ اكو افراج شرطي بالمصح خاف زيدان يضل يبحوش و يعرف انت مطلعه ويروح يغرد يم خليل همَ واحد تافل بحلگ الثاني

_ ما عليك اني ارتبها انت شغلك من يطلع

_ ما اعتقد راح يقبل يكمل شغل ويا خليل و ترى مو غشيم هو اكيد عرف الشرطه ويا خليل منو يگول يثق بيَّ

حگ لحيته بطرف الجداحه يباوع عليَّ وهو رافع حاجبه بحده

_ ومنو گلك گوله انت بالشرطه

قاطع حديثنا الحچي من اجه گعد يصب چاي النا اخذ صدام الأستكان شرب منه و استفهم حتى يتأكد

_ گتلي امه ماتت بسببهم هم مو

_ نعم سيدي سئلت بالمنطقه جايبين الها خبر كاذب

رجع يگلب بالملف بتركيز ركز ع صورته النجار و ضرب عليه باظفر اصبعه بتفكير

_ ما راح يترك خليل يعيش براحه ابد

نطق كلامه بثقه عبالك متأكد منه

_ واذا رجع يبحوش ورا خليل وهم وكعه بورطه

_ حتى ادوس بطنه غير اذا ما فتح عيونه

_ شجاك سيدي حامي ع ولد چا يشم گفه ايده قابل

_ يعرف كلش زين إعرفه ذكي من كشف خليل لاتخاف عليه يوگع عشره مثلك بس خليل كلب وگعه بربعه

سكتت وهو رجع يگلب بالملف طلع ورقه منه طبگها وحطها بجيبه،، حگيت موخرة راسي بتوتر

_ سيدي

همهم كـ رد حتى احچي

_ عمي صار عنده علم ويمكن بدا يدور ورا خليل

رفع راسه بملامح حاده راص ع أسنانه

_ شاهين

_ نعم سيدي

_ تشتغل عندي لو عد عمك

_ عندك سيدي

_ چا شعندك تغرد يم عمك

_ شوف سيدي والله هو جرني بالحچي گال تعال نشرب چاي مادري شحطلي خرطت الأكو و الماكو

شمر الملف بعصبيه