طشت خرز

البارت 22

#طشت خرز

كنوز القحطاني

رايه... وَلي

يا عود اعزف صبا راحً أيام الصبى
واحد يعذبه الزمن واحد هله تعذبه
يا عود ما خالفت بس خالفوا خلتي
زرعوني وسط الجمر و اتنطروا شجرتي
من كل گتر مشتعل يالغرتك ضحكتي
يا عود كلك حزن ؟! ما للفرح حصه ؟
ويصير نقضي العمر غصة بأثر غصه
أنا گلبي نضج موسمه .. خذ منجل وگصه

***********************************

رايه

رجعت مكسوره يمه من بعدج ولوني و نهشوني نهش رحت ع رقيه شلتها اخفف من نار گلبي من احضنها ع صدري ضليت بغرفتي ما اريد اشوف و جوهم

لليل اجتني غفران بيدها فستان اسود و گالت

_ هاج بدلي بسرعه ممنوع تحچين حرف ولا تصيحين ترى ابويه محمل عليج

عاينت ع فستان و عليه بعدم فهم

_ شسوي بالفستان شبيكم تخبلتوا عليَّ انتِ و أبوج من الصبح لسه

حچت بكل برود

_ بيت عمي راح يجون يطلبوج لصفاء

وسعت عيوني بصدمه من طلبها ومنها تراب أمي بعد مانشف تريد تزوجني

_ روحي عني غفران انتِ تخبلتي عليَّ و جماله المن لـ صفاء لو تنحروني هنا هسه ما أخذه

ردت ما راضيه ما اعرف شبيها معقوله وصلت لهدرجه كلما احچي وياها اريدها توعى ع نفسها تغرگ مستنقع الكره أكثر

_ شبي صفاء حتى متقلبين بي شاب و يشتغل و..

قاطعت كلامها المنمق بضحكة ساخره

_ وبشنو يشتغل ياترى تعرفين ومغلسه لو هيج عميان عود تردين تشمريني وبس

نترت بصوت هامس بحده رافعه اصبعها السبابه بوجهي بتحذير

_ لسانج طولان كلش اذا تجاوزين بعد اگصه الج حتى تعرفين ويامن تحجين

سكتت عاگده مابين حواجبها بتسائل

_ و شنو قصدج بشنو يشتغل مو عنده محل عقارات و هذه المنطقه كلها تشهد

_ عقارات لو مخدرات غفران لا عبالج گدامج زعطوطه ترى بيت عمي ناخلتهم نخل واعرف كلشي عنهم

_ محد زرع براسج أفكار الحقد والكره عليهم غيره يعني لو مثل ماتگولين يشتغلون بهيج اشياء الشرطه وين عنهم قانون ماكو

_ من تشوف المظلوم ينسجن والظالم عايش براحه أي قانون ماكو

_ ضلي اتمنطقي انتِ راح يجون بعد شويه يطلبوج توافقين ورجلج فوك راسج

_ وشعدهم مستعجلين هيج مو تربة چنتهم العزيز الي ماتوا عليها مانشفت لسه هاي هيج الناس صارت تدفن الصبح تنسى العصر