طشة خرز

البارت 1

#طشت خرز

كنوز القحطاني

البارت الأول

چلمات

المعاتب كضن وانت أعلى طبعك ذاك

لانفع بيك الوفه ولا عتب فاد وياك

****************************

الماضي

گاعده ع الدرج صار نص الليل لسه مارجع صارله فتره هيج يتأخر وتغيرت كل معاملة الي بدأ يقسى و ينفر مني وكل يوم والثاني يسمع حچي يريد يتزوج عليَّ لو عندي أهل اروح الهم ماهم گلبي ع اقل عندي بيت يحتويني

عندي سند يطلع حقي منه عصرت روحي العبره تذكرت موت ابويا ورا ماطولت سنه امي ماتت كل يوم ادعي ربي ياخذ أمانته وارجع اگول جهالي منو الهم هم يتيتمون والسدى عليَّ يسدي عليهم

مسحت دموعي من سمعت صوت سيارته والباب انفتح وانسد دخل عاقج وجه شمر مفاتيح السياره ع ميز وراح للمطبخ فتح الثلاجه طلع بطل مي شربه كله نزع سترته خلاها ع كرسي رخى الرباط وفتح اول دكمتين بقميصه

وحچه بنفور بدون يصد وجه عليَّ حتى

_ شعندج لسه گاعده ؟

نهضت من مكاني ورجعت گعدت بساع لويه حيل ابطني حسيت احشائي تتگطع ضليت ع گعدتي انتظر يخف الألم وهو ع نفس ووگفته يتابع بعيونه بس رجع شرب باقي بطل المي وگال

_ ذني السوالف مايوكلن خبز عندي إذا مسويتهن ويا غيري وعبرن عليه مايعبرن عليَّ فـ بطليهن احسلج

جريت نفس اكتم الغصه بگلبي كل وظنه امثل عليه حتى احصل ع شفقته،، حچيت احاول اسيطر ع رجفة كلامي

_معقوله اني بيوم من الايام حبيت هيج انسان اناني لو انضحك عليَّ فرشتلي الدرب ورد وفردت جناحات الملاك واني بكل غباء صدگت بيك

تقدم بخطواته لحد ما صار بوسط الصاله ظلام ملامحه الواضح عليهن الكره لمحتهن من صار عليه ضوه الاله جر الكرسي مخلف صوت مزعج خلى ع جيهتين و گعد

_ اي وبعدين وين تريدين توصلين بكلامج هذا

_ ما اريد اوصل لاي مكان بس اريد اعرف انت لاي مرحله بالحقاره واصل

حگ لحته عيونه تناظر الخارج من الشباك هز راسه أكثر من مره ع كلامي ونطق

_ يعني هسه اني حقير بنظرج

_ اي حقير واناني وهذني الكلمات قليلات بحقك ماكو كلمه اگدر اوصفلك بيها حجم الدمار السببته الي هدمت كلشي بنيته

ارتسمت ابتسامة ساخره ع ثغره و ردّ بكل برود

_ ليش شنو گدرتي تبنين انتِ هذا البيت اني بنيته كلشي موجود هنا من فلوسي كل هذا الخير العايشه بي من لحم اكتافي