طشة خرز

البارت 17

#طشت خرز

كنوز القحطاني

وَلي

انه منين اريد افهم ؟
انه الغمض عيونه و مالحگ يحلم
أنه المبيوگ حيله و حيل ما مهتم
انه المحبوس نسمة برية الغرگان
انه المطشوش عمره بماي ما ينلم.

*********************************

لنهاية الدوام اريد اطلع اجاني واحد منهم گال المسؤول يريدج نزليله

نزلت اله دگيت الباب و دخلت سلمت وهو گال رئسن بدون مقدمات

_ هو چان الفروض اكتب بيج معاقبه بس لانج جديده راح اتغاضى هذه المره

عگدت حاجبي مستغربه اندافعه سئلته اريد اعرف شنو الموضوع حتى يكتب معاقبه

ولايه :- ليش بشنو قصرت حتى تكتب معاقبه شنو سويت

_ هنا اني مسؤول الشؤون مال عاملين يعني اي شكو عندج تجين الي مو تروحين للمدير او النائب

هزيت راسي بـ اي من دون كلام رجع ظهره ليورا مترهي و گال

_ هذا تنبيه الج مرة الثانيه اي شي تجين الي واني احله

_ تمام

گلتها وطلعت من كلامه عرفت هو وياهم بنفس المركب يعني لان حچيت ع تقصيرهم يريد يكتب معاقبه بيَّ لعد ما شافهم من گاعدين رجل ع رجل و عاقبهم

سمعته الكلام الـ يريده بعدني جديده ما اريد اسوي عدوات ويا الكل والظاهر هنا مطبقين لا اسمع لا أرى لا اتكلم

اخذت جنطتي و طلعت ردت اعبر حتى اصعد شفت طيف گاعده ع دراجه ينتظرني استغربت شطلعه بهالحر نوب عايف دراسته من شافني وگف يضحك وصلت يمه

ولايه :- شكو صاير شي

طيف :- ماكو شي گعدت اقرا واجه ع بالي مشروع بدل ما تروحين و ترجعين بالكيات و ازدحام و صاعد نازل اني اوديج و اجيبج

_ مقابل شنو انت ماتهد طيرك بضباب

_ الله عليج تعجبيني من تلگفيها هي طايره

فرگ اديه وحده بالثانيه بحماس

_ المقابل هي الكروه نفسها بدل ما تنطيها للغريب اخوج أولى بيها

صعد و گعدت صفح ورا

_ هاا يعني طلع مشروعك براسي

_ اي والله دا أحضر روحي خاف ابنجر بالسادس اشتغل خط عليكم بالدوام أول شي اوصل نهروان للكليه نوب سيف واخر شي انتِ

_ مو دراجه كوستر هذه

_ ما تشوفيها شكدها تأخذنا و امي ويانا هم

_ رايتك بيضه تريد تصعد امي ع دراجه

_ چا شلون شوفي اني رتبت وقتي من اوصلكم ارجع عليها وين تريد تروح لسوك محل اوصلها