طشت خرز

البارت 21

#طشت خرز

كنوز القحطاني

رايه

طشيتهن وتلملمن
ولميتهِن و أطشّرَن
يوم الردتهِن ما لفَن
يوم العفتهن چودرن
يمي و عليَّ تراشدن
شنهو السَبب بس ما حچن
جروحِي حيل أستهترن
رگصن رگص مثل الغَجر
هَزّن خصر ما يستحَن

************************************
رايه

شفت وَلي و اگفه وثاني رجله مرجيها ع حايط يدخن منتظر روز بدد سكون الليل صرخة روز شمر وَلي الجگاره من ايده ودخل يركض رحت اركض وصلت الباب طلع أنمار يركض مرتبك دفعني عن طريقه وگعت ليورا

راح يركض شرد نهضت بسرعه دخلت ورا وَلي تسمرت بمكاني من شفت روز بالگاع تنزف وَلي يريد يشيلها وهي مجلبه بي و ترجف و تبچي بألم شالها طلع يركض واني
وراهم مشدوه صوت رابحه رج المنطقه الناس كلها التمت

رابحه :- يبوو لحگولنا گتلها گتل اخته لان شهدت عليه

مثل الغراب تنغط هنا و هناك تلگانا حيدره بالباب صاح بي وَلي

_ سياره بساع

ركض حيدره جاب سيارته صعد وَلي ورا و راس روز بحضنه واني صعدت يم حيدره حچت روز تشهگ بالكلام

_ سامحتني مو

بچى وَلي دموعه تصب يمسح الدم من خدها

_ ما زعلان منج حتى اسامحج بنيتي انتِ

الشهگه بصدرها گوه تسحب النفس

_ بنتي امانه عندك ا

قاطع كلامها بوجع

_ اشش مابيج شي راح تصيرين زينه وانتِ تربيها ما اخلي بعد يلمح ضلج والله

ابتسمت بألم عصرت ايده بچفها حيل تكتم وجعها اعاين عليهم احس گلبي راح يوگف من هَول الموقف زاد حيدره السرعه وهو يمسح دمعة عينه

اخذناها ع أقرب مستشفى دخلوها لصالة الولاده لان تنزف شويه و طلعوها رفضوا استقبالها لان مو من ضمن المنطقه العليهم صاح وَلي عليهم

وَلي :- شنو مو عليكم دا تنزف شوفها

_ اخي لاتصيح هنا هذه مستشفى

_ شنو ما اصيح اختي دا تموت وانتِ حايره بالمنطقه ما عندج رحمه

_ اذا ضليت تصيح بهالهمجيه انادي الأمن يطلعوك برا

راد يتعارك وياها سحبه حيدره

_ وَلي ماعدنا وقت بسرعه خل ناخذه لغير مستشفى

هز راسه وَلي أكثر من مره بتشتت طلعوا روز ع كرسي متحرك ترجف راسها مضروب سايل الدم ع جبينها وجها اصفر و شفايفها بيض ماخذه الرجف شالها بساع و طلعنا
لغير مستشفى دخلوها بسرعه شويه و طلعت الدكتوره