طشة خرز

البارت 14

#طشت خرز

كنوز القحطاني

زينب

نطفه بنص خمر
و شويه دم خنزير
ذنب گتلة طفل
و الفوگهن أخرس
روس چلاب ميته
والسحر والعين

چبتهن يم عملتك طلعت انگس

**********************************

ضليت واگفه بينهم ابويا نزل من عيني من هذا كلامه و طعنه بشرف امي و نسب وَلي،، رد بكل برود

محمد :- عبالج ما سويت تحليل بس ابنج شيصير يروح لحمزه يحجي و طبعا عجيد عرف و ايده واصله اله معارف بكل مكان اكيد زوره

تسمرت مكاني يعني هو حتى مو شك متأكد وَلي الله مو ابنه انتبهت ع امي بدون ما تحجي اي كلمه لبست عبايتها و طلعت من البيت كله اخذت شالي اريد اطلع وراها اعترض

طريقي ابويا و سد الباب حاولت اطلع

رايه :- بويا امي طلعت خل اروح وراها لا تتخربط يصير بيها شي

رد بلا مبالاة و هو يأشر بيده ان ادخل

محمد :- هسه ترجع ماعدها مكان تروح لا أهل لا اخوه بي خير

استهضمت و غروگت عيوني يعني ابويا دايس هيج وياها بالحچي و وصلت يطعن بيها لان مالها احد يدافع عنها

ضليت گاعده بالحوش روحي تلوب اريد اطلع اشوف امي وهو ما يخليني گاعد يدخن بكل برود الدقائق دگ موبايله طلع يرد واني ع نار اريد بس يطلع

سد الموبايل طب ليجوا شويه و طلع من البيت رحت اركض طلعت ادور بعيوني عليها ماكو طلعت لراس الشارع عاينت منا منا ماكو نزلت دموعي حسيت روحي طفل ضيع امه

اجه ع بالي بيت خاله صفيه رجعت عليهم اول ما طبيت تلكتني مُهره تسئل بقلق.

مُهره :- شكو شبيج ليش تبچين

_ امي يمكم ؟؟

طلعت خاله صفيه من المطبخ بيدها الچفچير عاگده حواجبها

صفيه :- لا ما اجت شكو شبيها زينب

_ تعارك وياها ابويا و طلعت من البيت

شمرت الچفچير من ايدها بعصبيه طاح برجل مُهره خلتها تگمز ع تگ رجل و عاطت بوجع

مُهره :- اني شعليه يمه ترى اني بنتج مو محمد مرمد

صدت الها صفيه تطمن عليها شافتها مابيها شي

صفيه :- هذا إشايف روحه فد بندله اله اخلي عجيد يمده بالشارع ياله يجوز منها

لگفت عبايتها حطتها ع راسها و شمرتها ورا ظهرها و طلعت،، طلعت وراها دفعت باب بيتنا ادور ع ابويا و صاحت

صفيه :- وينه هذا أبوج

_ ما دري طلع قبل شويه

_ بسيطه خل يجي اريد اعرف ماله رداد ابن طوعه