طشة خرز

البارت 13

#طشت خرز

كنوز القحطاني

وَلي

هلي رحموني شويه
هلي ليش الأذيه
هلي اني مو شاعر
ولا يم الشعر حيل
بس من ضيمكم گمت اكتب البيَّ
هلي خوان يوسف ارحم شويه

************************************

قبل لا يرد ابويا دگ موبايل حمزه فتح خط رد تغيرت ملامح وجه سكت ثواني وگال

_ وَلي

نهى الاتصال وطلع بخطوات مستعجله گامت امي ورا

زينب :- شبي وَلي حمزه شصار حاجيني

بيده الموبايل يتصل ماعرف ع منو وگف جاوبها

حمزه :- مابي يمه هذا المحامي اتصل عليَّ علمود القضيه

_ گلت وَلي حمزه گلي بي شي لا تضم عليَّ

صاح بإسم مُهره من باب بيتهم تجيب اله سويج السياره و رد ع امي

حمزه :- ما ضل عقل براسي گمت اخرط بالاسماء ...و لو بي شي تشوفيني هيج واكف لسه

رفع الموبايل ع اذانه يحچي وصعد سيارته وراح

رجعنا ليجوا ابويا وخليل يسولفون سوه گام خليل وگال

خليل :- زينب بين ما يجي موعد المحكمه مال تميز اني محضر التقرير و راح اخلي العمال يشهدون هم ان حالته مو مستقره

هزت راسها امي اله طلع ابويا ويا

رحت حطيت القوري ع نار وهم ماگدر احچي كلمة أواسيها بيها من شفنه حال وَلي الكافر يبچي ع حاله أصدقائه ينقتلون گدامه ويموتون بين اديه المفروض الناس تعزي بيهم بس بدل ما يعزوا وجهوا أصابع الاتهام بقتلهم اله

نظرات الخيبة والخذلان بعيونه من غفران و روز و حيدره شهدوا ضدوه اااخ والف اااخ شعوره ماينوصف أربعين ألف عام من لغة الإنسان ثمانية وعشرين حرف ولا حرف

يگدر شعور العجز الحسيته هناك واني عاجزه اساعده رغم شهدت لصالحه اني وحمزه وامي بس أخذوا بالاغلبية متأكده امي وحمزه حسوا نفس احساسي وگفنه عاجزين مثل الأديه مربطه وشمروا بالنهر هيج احنا وگفنه بالمحكمة واحنا نسمع الحكم....

رفعت أيدي امسح دموعي صرت حتى ماحس بيها من تجري فار المي حطيت الچاي وانتظرت يتخدر صبيت وطلعت عاينت ابويا ماكو يمكن طلع لشغل حطيت الريوگ و صحت امي

رايه :- يمه ياله تعالي اكليلج لگمه

ذبت حسره تهد جبال وگالت بهم

زينب :- ماريد يمه شبعانه قهر

عفتها طبيت للمطبخ وسويت لفة جبن مثلثات بلگي تقبل تاكل شلتها بيدي وطلعت

گعدت يمها ومديتهن الها وحچيت اقنع بيها

رايه :- يمه هاج اگلي لگمه من البارحه لسه انتِ بدون اكل