طشت خرز

البارت 12

#طشت خرز

كنوز القحطاني

شلون تريدني ارضاها ؟
المره من ينكسر يمها الكزاز تخاف
شنو يكسرون يمها ضلوع موتاهه!

‏عْظَمَ اللهُ اُجُورَنا بِمُصابِنا بِالْحُسَيْنِ عَلَيْهِ
السَّلامُ وَجَعَلَنا وَاِيّاكُمْ مِنَ الطّالِبينَ بِثارِهِ
مع وَلِيِّهِ الاِْمامِ الْمَهْدِيِّ مِنْ آلِ مُحَمَّد عَلَيْهِمُ السَّلامُ.
__________________________

وَلي

فشله من يوگفلك غريب بديره متروسه عرف

************'***********************
رايه

ضليت اراقب بعيون تكسيها الرهبه وگلب ينتفض بفزع بين ضلوعي كلمات المحامي ادگ بگلبي مو بس براسي اعدم،، مؤبد.. فتحت حلگي ازفر انفاسي مثل الزقوم اختنگ الهوى بصدري صرت احس روحي تلتف بحبل المشنقه

تحركت حدقت عيوني ع امي صايره تراب بالجذب واگفه ع رجليها اذا تنفذت وحده من هذه الاحتمالات مو بس اخسر اخويا لا اخسر امي قبله

امي اذا تأخر عن جية البيت ادزني ورا ومن نرجع الگاها لابسه عبايتها و واگفه بالباب والف فكره وفكره سوده جايه ع بالها من تأخير ساعه ساعتين شلون هسه

صمت ثقيل و همسات مقتضبه ما مفهومه بين حمزه وياسر انفتح الباب لمحت القاضي الي يقلب بأوراق ملف القضيه بجبين معگود المحامي يحچي وياه وهو مستمر بالقراءه يهز راسه بس

صدت عيوني ع غفران و يقين روز واگفه تبچي بسكوت ذني الراهنت عليهن وَلي ذني الچنت تخاف عليهن وخرة الإبره اليوم اسمع صليل سيوفهن يغرس بگلبك

دقائق و طلع المحامي بدأت الهواجس ترفس بروحي من شفته منكس رأسه بأسى وهمس لحمزه بكلمة واحده لقطتها مسامعي چن واحد وصب رصاص بإذني

_ مؤبد

كلمه خلتني احس روحي فرت من بين ضلوعي،، حسيتها وگعت ع گلبي چن حجاره من سجيل

طلعوا مگلبج اعترضت طريقهم امي حضنته بكل مابيها من قوة تبوسه منا وتشمه منا تبچي وتنحب بعويل يفطر الگلب

رحت اركض ع غفران اتوسل بيها الحجر لاَّن وهي لا

رايه :- غفران عليج الله والله مو هو،، هذا اخوج غفران
راح تضيعي كل السويتي بي وهو يحبج ما مر يوم عليه إذا مافكر بيج وشلون يعالجج ولج دا يجمع فلوس يگول اذا ماكو هنا اطلعها برا

غصيت بدموعي هديتها لزمت أدين روز بستهن واحچي بدموع من دم

_ روز انتِ مو تحبي روز شغيرج هيج يگول عليج بنتي مو اختي بس عليج الله غيري شهادتج لاتضيعي روز

انهارت بالگاع تبچي تلطم ع وجها لمحت حيدره واگف بعيد رحت عليه لزمته من ايده اتوسل بي

_ حيدره والله العظيم والحسين الشهيد مو هو الياس اخوه شلون يگتله انت مو تدري بي شكد يحبه ويعزه انت مو عايش ويانا سنين ماتعرفه شنو ماتعرفه اذا يقتل لو لا