تجمعوا فياض وعياله بالمجلس كان الكل الموجود بدون استثناء حتى الاحفاد الشباب ناظرهم فياض وهم يسولفون ويضحكون طق بعصاه الارض والتفتوا له تنحنح واردف
فياض:ظنكم اني مسافر ماراح اعرف بالسوالف الي تصير هنا
عم الصمت بالمكان وناظرهم بحده وخصوصا علوان:قطيتوا هالبنت اليتيمه الضعيفه بدون والي وخليتوها بين نارين ليه انتم مانتم رجال تفكون اخوكم من المصيبه الي هو به تضحون بحفيداتي عشان مصالحكم انا حي للحين مامت تسمعون سكت عن الي صار للمى عشان هي سكتتني عنكم بس العنود ماهي فيه تسكتني عنكم
التفتوا يناظرون ابوهم بصدمه وكيف وصله علم العنود
فياض:وصلني علمها من عياد ظنه انه بيهدمني بس ناسي اني فياض وانتم شلون ترضون على نفسكم وتقطون العنود عليه
علوان:يبه حامل
فياض احتد سوته:قطعه وخسوه كل الي يصير من تحت راسك اصلا انت لو ماحرثت بالناس وفضحتهم عند العربان ماكانت هذي حالنا احارب من كان لي اخو مافرق بيني وبين محسن غيرك
رفع عيونه علوان لابوه من الطاري تنهد :تتنهد ولا لا هذا الي صار والكل هنا كل من بالمجلس يتحمل اغلاطك الكل تحمل اغلاطك الا انت
ناظره علوان بصمت محد حاس فيه ولا الي يمر فيه حتى هو جالس يدفع ثمن اخطاءه بس يعيش اوجاعه بصمت نزل راسه يناظر الارض بهدوء بدون لا يرد والتفت لحاكم
فياض:ماكانت عندك وش وداها لمشعل
حاكم:قرارها يبه ماقدرت امنعها هذا قرارها وقرار ابوها ما اقدر اتدخل
فياض وهو يدور بعيونه على صالح :صالح وينه
تركي:رجع هو وحنين للشرقيه
هز رأسه فياض بهدوء وناظرهم :الي صار هنا يضل هنا بحدود هالمكان لا حسيت ان واحد منكم فادع بالبنات عشان الي صار لا تلومون الا نفسكم
هزوا راسهم بالايجاب وطلعوا وتنهد فياض وفكره يجيبه ويوديه الي صار بغيابه مو شي هين هو غاب فتره بسيطه وصار كل هذا انتبه للزول الي واقف ابتسم واردف
فياض:اقلطي اقلطي
دخلت ومعها القهوه اتسعت ابتسامة فياض وهو يشوف البنات يدخلون خلفها سمر وريم واسراء جلسوا بجانبه وحوله واردف
فياض:هالله انا قلت اقلطي ماقلت اقلطن
سمر :شدعوه يبه هذي طرده ولا وشو
ابتسم فياض وحاوط اكتافها؛افا اطرد شيخة البنات
ريم : شيخة البنات جدو انا ساكته من اليوم ماسمعت لي مدحه كله للمى وسمر مالي حق انا
فياض :انتي لك الافعال مو الكلام
ضحكت بخفه وباست راسه:الله لا يخليني
اسراء قلبت عيونها:ايه ناس تتهنى وناس تتمنى
فياض ضحك من قلبه :وش تتمنين انتي تعالي جنبي مدري وش مقعدك بعيد عني
اتسعت ابتسامتها وجلست بجانبه كان ناقصهم العنود بس...
-
بعد ماطلعوا الكل كان واقف تركي ومستند على باب الصاله التفت على جيت مصعب تقدم له مصعب ويدينه بجيوبه ناظر بتركي ومسح على رقبته بتوتر لاحظه تركي واردف باستغراب
تركي:شفيك
مصعب رفع عيونه واخذ نفس عميق:تركي بقول لك شي بس حافظ على اعصابك
عبد حواجبه تركي وزاد الاستغراب بداخله وصابه قلق:تكلم انتي وش مسوي وش بلاك
مصعب:ماني مسوي شي يارجال
سكت لثواني ورفع عيونه يناظر بتركي:ابي اخذ لمى
اعتدل تركي وهو يناظره:مافهمت
مصعب:يعني ابيها لي بتزوجها انت
اتسعت عيون تركي بصدمه وهو يناظره:وش تقول انت وش الي غير رايك
مصعب:اعجبتني وغيرت رايي
تركي:لانها لعبه هي متى ماتبي تاخذها صحصح البنت مابقى على عرسها شي وانت تقول ابيها بمخك شي انت
مصعب تنهد وهو يتذكر منظرها بالفستان وكم مره لمحها من قبل بثت بداخله شعور اقترب من تركي واردف بهدوء
مصعب:ابيها تركي حبيتها ابيها لي انا عبدالعزيز مايستاهلها
تركي قطب حواجبه بغضب:اجل من يستاهلها انت،انت ناسي وش قلت لمن جيتك اترجاك تاخذها ولا نعطيها لعبدالعزيز ،انا صدق ما اواطن عبدالعزيز ولا اشتهيه بس والله ان مايستاهل لمى الا رجال مثله ماهو انت يامصعب
مصعب بغضب:وش قصدك
تركي:قصدي واضح ان شفتك تجيب الطاري والله ماتسلم يامصعب صك الموضوع احسن لك لا يصير شي مايعجبك
مشى من عنده قبل لا يكمل كلامه كانت جايه تدخل للداخل عشان جوالها الي نسته بس وقفت وهي تسمع كل شي اوجعها قلبها بقوه حست انها بدون قيمه انها سلعه متى مايبي يرميها ويكسر قلبها ومتى مايبي ياخذها عضت على شفايفها بقوه والقهر طغى عليها ماتقدر تتحمل اكثر من كذا طول هالسنين وهي تكتم بداخلها طول هالسنين وهي تتحمل الجروح الي يتسبب فيها هو جاي بارده مبرده يبي يقلب كل شي بحياتها من جد وجديد بعد ما استقرت وتقبلت وضعها ومستقبلها مع عبدالعزيز جاي يهدم اتزانها صعب انها تسكت وهي طول هالسنين ساكته تقدمت له ووقفت قدامه رفع راسه مصعب بصدمه لها وشد على يده وقرر بانه يتكلم كلام تركي ان باقي لعرسها اسبوعين خلاه يندفع بقراراته خذا نفس ومسك يدينها بسرعه واردف
مصعب:ادري الي بقوله بيكون غريب عليك وبيشتتك كثير وبتحسين نفسك ضايعه
سكت لثواني ثم اكمل:بس انا ابيك انا راح اتزوجك لا تتزوجين عبدالعزيز
عض شفايفه وخذا نفس عميق وهو يناظر عيونها :لمى انا حبيتك مدري شلون ومتى بس ابيك لي اتركي عبدالعزيز
سحبت يدينها بهدوء استغربه فار داخلها وفاض جدا اخذت نفس عميق عميق جدا لان الكلام الي بتقوله الحين ماهو عباره عن جمله ولا جملتين الي بتقوله الحين عن عذاب نفسي استمر معها لمدة ١٦ سنه ولاول مره تطيح عيونها بعيونه وتشوف هالكم الهائل من المشاعر نفس المشاعر الي كانت تشوفها بعيونها نفسها بالضبط:تحبني!؟ انت جربت الحب من طرف واحد تعرف وش يعني انك تحتفظ بمشاعر تأذي داخلك وتفرحك بنفس الوقت تعرف وش يعني انك تدور تحت كل جمله اعتراف لمدة ١٦ سنه تعرف وش يعني ان قلبك يفز كل ماتسمع صوت او حتى تشوف ضل الي تحبه تعرف وش يعني انك تكبر ومعك ذكرى تافهه بعيون الناس بس بعيونك سببت لك جرح عميق جرح ماقدرت تمحيه الايام بالعكس صار ندبه تدوم معك لباقي الحياه ندبه حتى لو تجاهلتها بتضل فيك ومكشوفه لنفسك انت ماتعرف ولا شعور من هالمشاعر ...
سكتت حست بسكاكين تنغرز بقلبها ماقدرت تكمل كلامها بسبب المشاعر الي انهلت عليها مره وحده مشاعر كانت تتهرب منها وتتجاهلها بكل مره رفعت راسها لفوق تبي تمنع دموعها من انها تنزل قدامه ،هو بالذات ماتبي دموعها تنزل قدامه صدرها يعلو ويهبط بسبب ضيق التنفس الي اجتاحها الغصه لعبت ببلاعيمها ومو قادره تتحكم بأي شي من الي يصير فيها حاليا نزلت راسها ورجعت تقابل وجهه واردفت بقهر:انت تعرف انا كل ليله وش كنت ادعي فيه،كنت ادعي انك تحس بالمشاعر الي حسيت فيها انا تجاهك لو مدة خمس دقايق بس ابيك تذوق الي انا ذقته تحس بالي انا حسيته وانا اشوفك منتبه للكل وانا الي على طرف اهدابك ماشفتني خبيت حبي لك داخلي ١٦ سنه وانا كاتمه هالمشاعر ومابحت فيها لأحد انا ما اذكر اني قد اعترفت لك بمشاعري او لا بس الي متأكده منه اني مابي اعرف وش بتكون ردة فعلك وقتها،حتى كلامي حاليا ماراح تفهمه لانك انسان اذا حبيت الطرف الثاني يبادلك عندك القدره بأنك تحب وتنحب
عضت على شفايفها بقوه واردفت بغصه:انا بس بسألك سؤال....عمرك مافكرت فيني كل هالسنين ولا انتبهت لي ولا بمقدار الحب الي اكنه لك
شافته يشتت انظارها عنها ونزل عيونه للأرض هزت رأسها بابتسامه سخريه :انا عارفه اني ماكنت حتى بزوايا رفوفك لا تجي ترتجي مني ارجع لك بنفس الشغف والمشاعر لاني أكد لك ان كل هالمشاعر تبدلت لمشاعر ماودك تسمع فيها
تراجعت خطوتين لورا وهي تشوف نظره الانكسار بعيونه ماهزت فيها شعره ياما انكسرت ومالقت من يلملمها ،بيجي الي يلملم انكسارها وشتاته كلها يومين وتطيب جروحه مهما كان مقدار الجرح الي يحس فيه هي متأكده انه مستحيل يجي ربع الجرح الي صابها وكانت هذي لحظة الانفجار الي ماتدري هل راح تندم عليها ولا لا
