لو درينا عن هوانا وش مصيره..كان قبل الحب صلينا استخاره .

البارت ٣٧

مازن : خييير أحد غصبكم تجوا معي ولف لبندر والله ياخوك الصراحه أنه قلنا نرجع ذكريات الصغر عندكم كنا نسرق كذا ويشهد الله ما ودنا بالفواكه كثر ما ودنا التجربه وبس والله ما قصدنا شي ثاني
حسين : ايي والله وغلطنا ونعتذر منك بس مثل ما قال مازن ما قصدنا إلا نتذكر الماضي
بندر : تدروا وش اللي شفع لكم
نواف : إن ظهري انكسر
نايف : لا يا خبل وش له بظهرك
بندر : إن البيت بعيد عن الحوش والا والله كان صارت مذبحه حرمة البيت لها حق
عزيز : ايي بالله غلطنا ولك حق باللي تقوله
فهد : واللي تبيه يصير يصير ونعتذر مره ثانية
مشعل : الحين خلينا نأكل منها عشان نعتذر زين
بندر : هههههههههههههه خلاص اعتذاركم مقبول وفواكه بتاكلون ما عليكم واليوم عندي ضيوف
حسين : تسلم بس والله ما نقدر
بندر : علي يمين
نايف يقاطعه : لا تكمل يرحم والدينك لنا اسبوع ما رحنا البيت
نواف : ايي وفوق ذا ظهري انكسر
مشعل : اسكت أنت الحين ينتظرنا موشح من ابوي بالبيت لا تنسى الثلاثه طالعين والله ليطلع عيوننا
نواف : اسكت احس ظهري من هالسيرة يزيد
طارق باستهبال : الحمد لله المهم ما طاح الولد
الشباب : هههههههههههههههههههههههههههههههه
وبعد سوالف وحلف من بندر يجلسون بس رفضوا وحلف بندر ما يعطيهم الحذيان وراحوا حفيان وطول الطريق يتذمرون بعبد الله ويهاوشونه الين بكوه ورجعوا يسكتونه وكل ما تذكروا شكلهم وشكله نواف يوم طلح ينفجرون ضحك وكان شكلهم وهم يتمشون بالديرة بدون حذيان يضحك وكل من شافهم ضحك عليهم

    ••••••••••••••••••••••
مازن : يالله صبحهم خير
الكل : يصبحك بالنور
أبو ماجد : تأخرت بالنوم والله عبد العزيز أنشط منك قايم بدري وجلس يفطر معانا وانت ولا شرفتنا
مازن ويحك راسه ابتسم : اي يبه تراه ينام أكثر مني بس هنا يبي بعلمكم أنه أحسن ويحسن صورته
عزيز : لا يشيخ متأخر وتشوه صورتي فوقها
ماجد : ههههههه مازن حاول تبلع العافيه ولا تزيد بالكلام عشان ابوي ما يجلدك تعال افطر
مازن : وش افطر وانتم بلعتم كل الشي أكل الصحون يعني
أبو ماجد : أجل مافي أكل لا تاكل والا أدخل لداخل وشوف لك شي من عند امك ولا تتأخر بالنوم مره ثانية عشان ما بخليك تجلس على لحم بطنك
مازن بمزح : طيب يبه وش فيك معصب علي
أبو ماجد : ماني معصب
مازن : إلا معصب قول قول وش فيك
أبو ماجد شاف له : اقولك ماني معصب خير
مازن كاتم ضحكته : ياخي أنت معصب أعترف
أبو ماجد عصب صدق : قلت ماني معععصب طيب ماني معصصصب ورماه بالكأس اللي بيده لكن مازن تفاداه وراح وهو يضحك
ماجد وعزيز ما قدروا يصبرون : هههههههههههههههه
أبو ماجد فصل عليهم : انقلعوا من عندي لا اكفر فيكم
              •••••••••••••••••
ببيت مهند الفيصل يسولفون على الفطور
سديم : تخيلوا أن الدراسة بتبدأ من الأسبوع الجاي يااااي والله حلو
غدير بنص عين : اللي يسمعك يقول دافورة ما شاء الله
سارة : اي والله صدق واصلا هي بس مشتاقه لصديقاتها ومياعتهم
أم سارة لسديم : بلا مياعه بلا بطيخ ما ودي اسمع عنك كلمه ياسديم والبنات المايعات خليني اسمع بس انك تماشينهم والله لا اخليك تشوفين شي ماشفتيه مني يا سديم
سديم بنرفزة : وش مياعه ترا البنات مؤدبات إلا أنه سارة كالعادة ودها تصير الاخت العاقلة اللي ما تغلط بإختيارتها انتي تحرضين امي على فكرة وياليت انك تقولين الصدق على الأقل
أم سديم : الظاهر انك مدلعه بزيادة وتكذبين اختك بعد وانا بقولك من الحين ترا اي شي تسوينه بالمدرسه اختك بتوصله لي وأنا أكيد بصدقها وبدون شك ويكفي طيش
سارة : ترا يا سديم مو حركات مثل ما تقولين لكن سمعتك لا تتوصخ ولا تحسبين انك إذا ما سويتي غلط ما يطلع عنك كلام لا حبيبتي ترا اي شي ينقال عن الشله اللي تماشينهم بينقال عنك وبيضيفونك لهم بكل سالفه حتى لو ما كنتي موجودة ولا لك دخل وانتي أكيد ما تحبي يقولون بنت مهند الفيصل المايعه وغيره
سديم وقفت وبصراخ : انتو ليش مكبرين الموضوع وش من مياعه وش من كلام والله مافيهم شي غير أنه يحبون يطلعون ويونسون روحهم واعتقد هذا مو حرام ولا عيب أنه البنت تطلع تغير جو وتشم هوا وضحكاتهم واصواتهم كبيره وهذا شي مو بيدهم من الله هم كذا وش يسون يعني وترا اللي تسوينه عيب يا سارة ما غير مايعات ومايعات وش هالكلام خلي بنات الناس بحالهم ويكفي كذب وتلفيق يكفي أنا متحملة تعصبون الواحد من صباح رب العالمين استغفر الله وراحت
غدير باستغراب : بسم الله الرحمن الرحيم هذا وش فيها هبت كذا
أم سارة بغضب : والله لو ما تتأدب آني لربيها ولو ما تصير محترمة وما تلعلع بصوتها آني لضربها وأنا ما سويتها بوحده منكم قبلها قليلة الحيا اللي ما تستحي أحنا اللي نعصب الواحد والا هي اللي تخرجني طوري
سارة بهدوء : اهدي يمه لا يرتفع ضغطك على شي سخيف أنا معها بالمدرسه ومراقبه لها لا تخافي وبعدين هي بيجي يوم وتفهم لحالها أنه معنا حق والبنات حتى لو ما يسون شي عيب لكن اصواتهم بالطريق وضحكاتهم كبيرة وترن بإذن كل من يمشي جنبهم وهذا عيب وهي للحين ما تفهم بس صديقيني يمه بتفهم مع الايام
أم سارة هديت شوي : والله آني أخاف عليها يمه احسها ما تعرف الصح من الخطا واحسها يمه بعيدة عن ربها لو كان بصديقاتها هذوا خير ما كانت بهذا الانحراف كانوا سحبوها معاهم للطاعات والخير وانتي يمه مثل ما قلتي بتعرف ان معك حق مع الايام عشان خاطري لا تزعلين من اختك ولا تتضايقين من كلامها ترا والله أنها كذا تجيب الكلام ولا تتدري عنه الف مرره أقول لها تحسب الكلمه اللي تقولها وما كانت تفهم
سارة بابتسامه تطمنها : لا يمه شدعوه أنا ما ازعل من خواتي خصوصا سديم لانها بس ترمي كلام ولا تفكر فيه . أم سارة بادلتها الابتسامة

لا تبخلون بنجمه فديتكم 🌚💚