لو درينا عن هوانا وش مصيره..كان قبل الحب صلينا استخاره .

البارت ٣٣

طبعاً بعد هالسالفه جوا البنات وعرفوا وقعدوا بديوان الحريم إلا ميلاف وريفان اللي متأخريين
،،،،،،
ببيت أبو نايف
ميلاف بحلطمه : يمه هذولا وشلون راحوا الحين كيف أروح عند ميثا من بيوديني
أبو ميلاف بتعب بعد الشغل وبمزح : اسكتي يا بزر ارجعي وروحوا مرة ثانية
ميلاف بقهر : اففف ليش مرة ثانية كنت متجهزة يمه تعرفين راح أروح ليش ما قلتي لهم ينتظروون
أم نايف بصدق : يمه والله نسيت وش اسوي لك
ميلاف سكتت وفيها البكيه لأنها كانت متجهزة ولابسه الغبية لو مو متجهزة بسيطة أبو نايف شافها وحن عليها هذي البزر وحيدته ودايما مشاغبه ما يرضى زعلها ولا يرضى أحد عليها اصلا
أبو نايف بتعب : قومي بوديك وش اسوي لو انك سنعه وبنت عاقلة تركتك لاكن ادري بزعلك بيقلب البيت الله يكفينا شرك
ميلاف بفرح : يبه ادري بك تعبان بس والله مالي غيرك
وبدلع عفوي  يا غناااتي يا بعد رأسي أنت ورسلت له بوسة على الهواء يالله يالله بسرعه تأخرت

ببيت مهند الفيصل وتحديدا بغرفة أم سارة قاعدة تكلم على التلفون أخت أبو سارة (أم صقر ) وتبكي
أم سارة :آه يا خيه والله بعد أبو سارة انذلييت وصرت الواجهه لكل شي شين

فلاش بااك

  (نرجع لقبل ثلاث ايام ،، طلعت أم سارة من البيت بتروح لبيت أبو ياسر تزورهم وبالطريق شافت رجال دايخ وجنبه اغراضه والواضح أنه يبيع فراحت له بسرعه تكلمه ولقته يتمتم ورجعت على البيت وجابت ماء وأكل  ورشته ووسألته إذا محتاج شي وضلت جنبه الين ما حست أنه أحسن وبهالوقت شافوها بعض حريم الديرة وصالوا وجالوا بالديرة كلها أنه أم سارة جالسه تكلم واحد وهذا يزيد حرف وهذي تزيد كلمه وقال وقالت وسمعنا وضلوا يرددون أم سارة معها عشيق أم سارة معها صويحب أم سارة كذا وكذا ولليوم ما سكت الكلام وام سارة زعلت كثير وقالت لو أن أبو سارة موجود وعايش ما كان أحد تجرا عليها بكلمه وش هالدنيا وش حال هالناس الحشرية اللي تعبث بأعراض الناس بعض الناس ما تعرف أنه هالكلام عليه حد شرعي وأن اتهام الناس بعرضها كبير عند الله جريمةويعاقب عليه إذا ما تاب اللي ارتكبها ما يعتبرون من قصة أم المؤمنين عائشة رضى الله عنها الناس صاروا يتهاونون بهالاشياء ويشوفونها عادية ونسوا أنها ذنب عظيم واسمه (القذف) واذا كانت كذب يجلد القاذف ثمانين جلدة ويحرم من الشهادة بأي امر من الامور  ويهان بين الناس على أنه كذاب نسوا كل هذا ، الناس ابتعدوا عن الدين كثييير وصارت الناس ما تسلم بعضها من الاتهامات والاعتداءات /قال رسول الله صلى الله عليه وسلم: المسلم من سلم المسلمون من لسانه ويدة. /

باااك

أم صقر بحنية : يخسون يقولون عنك شي شين  ولا تزعلين الناس ما يخلوون لواحد حاله حتى لو ما سوى شي وانتي مو مهم ترضي الناس المهم أحنا مو مصدقيين عليك والناس يطقوا راسهم عالجدار لا تضليين تتبكبكين وتخلين العذال يفرحون ويتشمتون كذا بتثبتي كلامهم عنك قومي قومي مسحي دموعك وعلميهم انك مو مهتمه لكلامهم السم الله يأخذ الناس ما يخلوون عرض أحد
أم سارة: بعد أبو ساره يا أم صقر صرت محط الرذيلة يعني لأني ارمله يتهموني بعرضي حسبي الله ونعم الوكيل بس الله يحرق قلوبهم مثل ما حرقوا لي قليبي
أم صقر : قومي يالله قووومي لا تضليين متخبيه المهم إنا مو مصدقيين عنك ولا نفكر بك كذا ويخسى اللي يقول عنك كلمة واطلعي وكملي حياتك مثل أول وارمي كلامهم وراء ظهرك وعلميهم انك ما تهتميين بكلام مجانين قليلين حيا والله انك اشعلتيني ليتني ما اتصلت
أم سارة : لا الحمد لله اللي اتصلتي أقل شي اقدر اكلمك واشكي لك والا قدام البنات اسوي نفسي ثابته وأنا من داخلي ناار تشب صدري شب
ام صقر : وش رأيك اجي عندكم واخلي الناس تسكر فمها والله آني ناويتن على نية جعلهم للمقبرة هالناس اللي ما يخلون أحد فحاله  نسيتي وش قالوا يوم تزوجت ما خلوا  شينه إلا وحطوها فراسي  وراس  ابو سارة الله يرحمه وقال ايش قال مستفيد منه فلوس ونسيتي وش قالوا عن أبو صقر مو كانوا يقولون يمكن يتاجر بالمخدرات يمكن يشتغل بغسيل الاموال ماخلوا كلمة إلا ورموها عليه وكل هذا لأن ربي معطيه رزق اااه والله انك يا أم سارة شبيتيها بصدري وذكرتيني خلاص نويت بإذن الله اجيكم وادس رأس اللي يتكلم بالتراب وآخذ حقي وحقك واعلمهم كيف يتهمون باطل
أم سارة ابتسمت من بين دموعها على حمية أم صقر اللي فيها من الرجال : ههههههه إذا تجينا زايرة ويجيبك الشوق  ياهلا ومرحب واذا جاية عشان هالمشاكل السخيفة لا تجيين
أم صقر : ههههههه والله آني مشتاقة بس هالايام ماني قادرة اجيكم أنا كنت أقول بجي بس من الحمية والا ماكنت جاية
وبعدين دامك تقولين مشاكل سخيفة أجل ليش كل هالنواح غبية انتي  يكفي دمووع خلاص رح تظل الناس ترمي عليك كلام وانتي بتظلين تبكين كل مرة يعني بطلي هالعادة وتدري ما ودي أقول هالكلام بس والله أن كل كلامهم غيرة من زينك خايفين من رجالهم لا يحطون عينهم عليك وانتي اقهريهم وتدلعي وتبختري واقهريهم
أم سارة : اااه يا جهلك يا أم صقر مهما كبرتي حركاتك حركات مراهقين أما أنا يحرم علي اتزين عشان أحد بعد أبو سارة
مع السلامة أروح اشوف البنات لو اظل اكلمك ما تفكيني ياكثر هذرتك ههههههه
أم صقر بمزح : هذا وأنا أواسي خاطرك بكلامي زييين زيين الحق علي متصلة اسأل عن حالك وانتي ولا فيك علة حصان وجالسه تسبيين فيني ههههههه مع السلامة وسكرت
أم سارة لفت بتطلع من الغرفة وشافت سديم عند الباب
أم سارة : سديييم متى جيتي يمه
سديم قربت تحضنها وهي تبكي : يعني تسوين نفسك مو زعلانه قدامنا عشان ما نزعل الله يحرق قلوبهم الله يذوقهم اللي ذوقوك الله يلعن*هم
أم سارة تمسح على رأسها بحنية : لا يمه لا استغفري وحرام اللعن كم مره اقولك لا تلعنين يمه ولا تدعين يمه تعودي تصفحين وتسامحين اللي يأذيك ولك اجر يمه وأنا والله مافيني شي صح كان ضايق صدري بس لما كلمتني عمتك ارتحت كثيير الله يجزاها خير ويوسع صدري  مثل ما وسعت صدري لين حكيت لها ارتحت
سديم وهي تقوم من حضن امها وتمسح دموعها : وهي صادقه يمه عمتي ما كذبت هم يغارون من جمالك وانتي ليه ما تغيضينهم بهالجمال وتغيري رجالهم عليهم
أم سارة بحزم : وقص يقص لسانك وش ذا الكلام عمتك تمزح وبعدين حتى لو ما تمزح انتي تصدقي وتسوين كذا يعني حلوة بحقي ألعب بديني واضل رايحة جاية مغازلة بالناس وبآخر عمري أصير حركاتي حركات بنات شوارع وش ذا الهرج قومي قومي يالله
سديم بوهقة : اسفة يمه  اسفة والله ما قصدت انك قليلة ادب وكذا بس من حرة قلبي يمه
أم سارة : الله يهديك انتي وهالتفكير يابنتي نصيحة لك وخليها حلقة بإذنك لا تكوني تتهوري وتتسرعي بأشياء لما تعصبي ترا بتخسرين احباب واجد عدي للعشرة قبل أي شي يمه عشان لا تندمين بعدين لا فات الفوت ما ينفع الصوت لو راحوا عنك اللي تحبينهم وزعلوا بسبب تهورك ما يمديك ترجعينهم  سديم تشوف لامها وساكته
أم سارة كملت : يالله يالله نروح نشوف وين خواتك وش يسوون هالايام حال غدير مو بعاجبني
وقاموا وراحوا يجلسون سوا ويسولفون