﷽
الشيهانة والعاصوف
بقلمي ياسمين
لاتنسوني بتصويت وتعليق عالفقرات البارت استدعى التكريم لام وراث والبعده لام حسين لان الشفرة تنحل عالبارت الجاي ان شاء الله
✨بااااااارتين دمجججججج✨
من 6167 كلمة التكول قصير ادججها 🔪🔪🔪
النشر الاربعاء حضروا حبوب الضغط من هسة حاليا الدتقروه تحضيرات العيد
٠
٠
نور " بنت كميلة"
اكو مثل عدنا للماعدها حظ مثلي يگول
(الماعده حظ بالاول ماله حظ بالتالي)
انعجبت باكثم ابن الحجي وادري بيه مايصير نصيبي لو يگبلوني اهلي عالقبلة واتشاهد
وهوة انه منو.؟؟
والمن اجيت لهاي الدنيا؟!
اشوو اگعد من الصبح اكنس اطبخ انفخ وراسي وراس نورس بهالبيت المايخلص شغله
امي حاطه عباتها تحت كترها وتفتر بين الجوارين ياهاي ولدت وياا هاي جابت وادري بيها متقصدة تطشش سالفة زواج نهيوة من ابن الحجي الحارث الي دولبن عليه تدولب لما اخذنه..
والا هية وينها وين الواجبات...
اما حارث وماادراك ما الحارث كشخة وصيت وجاه ومال اخذنه بالحيلة والغدر وترصدلهم من سنين هو والاكثم بالخصوص جبير ولد الحجي وعضيده وين مايسري هو تحت خدمة ابوه هيبة ومرجلة لو من يتحزم بالسلاح ويلبس الچراوية يتهندم بكشخته محابسه ونظاراته وعطره ... يااابوية غير ابقى مدولبة عليه ايام وليالي عيني تفتر وراه اتحين الفرص اتحين حتى تشبع عيني منه شوف
الصدك تمنيته الي بس اعرفه مايشوفني وامي زايحتني من الاساس ماتگلبني مثله لان سمينة وبس اهرش اكل مو مثل نورس ونهيوة ضعيفات والظاهر من خضن مايه عرفنه موهين ماوصلن صوبه بعد واندارن لحارث تصيدله وهم خدمهن واجبه هناا بالبصرة واغلب ايام استقراره بيها ... مو مثل البقية مستقرين بعجمان
بقن شهور بحالها يحوكن ويخططن يوگعنه وبين ليلة وضحاها كترن نورس التحبه وتموت على طاريه
واستلمت المهمة نهيوة على سن ورمح..
الصدك بجيت على خيتي مدري بجيت على حظي مسكينة گطعت الزاد والشرب ايام
وحتى تمرضت تشوفهن گدام عينها يخططن ويحوكن لحارث ياخذنه وهية تتفرج
بس امي سكتت حلگها بغاوش ذهب من مهر نهيوة اذا صارت وبحجة انتي ماتدبريها مو مثل فطانتها وتالي نخسر نسب بيت الحجي مانحصل شي فـ قنعتها گعدت وسكتت بس الحسرة بقت بگلبها
كلما تشوفه وتشوفهن تحط دمعها وتبجي سكتة
وكلما يصد نهيوة يخليها تتشلوط نورس تطير فرح
تگول حتى لو موقسمتي المهم ما تاخذه هية
