﷽
الشيهانة والعاصوف
بقلمي ياسمين... صوتوا عمري انتم ولاتنسوني بتعليقاتكم وتخميناتكم الحلووة كوة نشرته النت شلع كلبي
٠
٠
لسان حال كيناز بهذا البارت تگول....
شُفُآيَدٍةّ هّآلَلَسِآنِ وٌکْلَ هّآلَحًجّيَ بًگلَبًيَ
٠
٠
باوعتله مترددة ماخلاني افكر لحظة فتح باب الصدر وگال لزيوني
_ اصعد يمي حبيبي... وافتح الباب لاختك خلي تصعد ترة راح وكتكم
ترك ايدي فرحان وراح يصعد يتسند بالكشن السيارة عالية عليه ركبها وكعد وسد الباب الجلب حتى ماانتظرني
فتحت الباب بنتر وصعدت ضربت الباب بقوة باوعلي من المراية ماحجى انصدمت ماعلق ولا بين ضاج شعجب.. !!! بالعادة الزلم مايقبلون على سياراتهم يدافعون عنهن اكثر من نسوانهم
حرك سيارته تجتفت عيني عالجام محتارة شلون اطلع نفسي من هاي الورطة
ارجع انكر واكله مو اني بس شلون توني كتله احجيلك كلشي...... غبية وثولة جان بقيتي مصرة على رايج واجحد رغم الادلة وخليه شيريد يسوي خلي يسوي
تحمحم مرخم نبرة صوته گال
_ اذا ناوية تنكرين انتي السبب بالحادث ترة اكو ادلة عليج مو دليل واحد
باوعتله مستغربة هذا شلون حس بتفكيري سحب سماعة انطاها لزيوني لبسها وشغله الراديو صفنت عليه هذا شديسوي گاله مبتسم
_ لاتنزعها حبيبي لمن نوصل...
عدل المراية الامامية وحجى ببرود...
شوفي يابت الناس مسالة الحادث استلمتها الشرطة من لحظتها وسوو كشف وبحث وتحقيق وصارت مقيدة بالوقت الحالي لحد مايجمعون ادلة كافية
عالجاني والمسالة مسالة وقت مو اكثر لان اني عطلت كلشي بالسر .. ومحاسن الصدف اني اعتبرها لجانبج مو جانبنا من شفت الدليل الي يدينج بنفسي مو احد غيري ،، والا لو غيري جان من الصبح انتي مشمورة بالاحداث او متجلية عليكم رحمة الله ويسفروكم للعراق مع دفع تعويضات الخساير الصارت وهذا احتمال ضعيف وابسط شي ممكن تتعرضوله اذا صار وانفتح ملف التحقيق ضدج
بكل الحالات تهديد استقراركم صار بيدي وبيدج تردين نحلها بالتي هية احسن لو نتوكل ونمشي باجراءات القانون
مسحت كصتي متوترة كلامه سوى عندي رد فعل كتله بثقة مهزوزة
_ شلون حلها بيدي مافهمت شتقصد..؟؟
هز راسه وحجى عينه بمراية جانبية يراقب الطريق
_ مدام سالتي يعني وصلتي..... شوفي يابة.. غنوة وكعت بهذا الحادث مصابة لاحها طشار منه وشوفة عينج ايدها اثنينهن ماتكدر تشرب بيهن مي هسة هاي احنا حليناها جبنا ممرضة الها بذيج الحسبة تشيلها وتساعدها وتداويها المسكينة ليلها ماتنامه من الوجع وحتى مرات توكلها بيدها
عصرني گلبي من كلامه الظاهر وضعها موهين ابد
المهم صارلها شهر على هذا الوضع ونفسيتها متازمة وتبجي بسبب وبدون اسباب اكلها قل ونومها تراجع بسبب القلق خايفة جلدها مايتحسن وتبقى التشوهات بجسمها
