﷽
الشيهانة والعاصوف
بقلمي ياسمين
وما حچينا بس بچينا... وبقت ترجف بس ادينا
ومانسينا................... بس تجاهلنا.......... ومشينا
درة...
انولدت قبل اخر العنقود اخوي مصطفى وثاني بنية بالعائلة بعد اختي المتزوجة
اخوتي احمد ومهند وراها اختي علا واني ويتبعني مصطفى
مهند متزوج رغم اخوي احمد اكبر منه بس مهند جان مستعجل عالزواج ومحضر اموره وية بت خالتي وفعلا تم زواجهم الي منها وصارحني الحارث بحبه الي.... هالحجي تقريبا من تلث سنوات
بوقتها ماجنت منتبهة لنظراته ناحيتي وجان كلما يجي زيارة لاهلي اطلع بالصدفة يطلب مني ماي اجي اقدمله واسلم واطلع مااخلي عيني بعينه
وجان زحمة ابقى كاعدة وياهم فـ انشغل بالبيت وتنظيفه لحد ما يروح وهو اصلا كل جيته لخاطر احمد فما جنت ماخذة موضوع جياته النا كلها لخاطري ولا جنت محسبة طلبه للماي من ايدي اله بيها غاية حتى يشوفني قدر الامكان واطول وقت
اضحك عليه من يذكرني بتصرفاتي يگول
_ جنت اشرب شوية شوية من الكلاص حتى اشبع من طولج وادري بيج اسلمج الكلاص منا تشردين منااا
بعدين اكتشفت هو مصارح امي بوضعه وكايللها اني احب درة واريدها حليلة الي بس مااكدر افاتح اهلي بالموضوع لحد مايتزوج الاكثم.. وفعلا فاتحتني امي بكلامه قبل ليعترفلي.. بوقتها ارتبكت ورجفة صابتني وهية تحجيلي عنه وعن رغبته بيه ووصتني وايدها ملازمة ايدي فرحانة وتمدحلي بيه وباخلاقه ويوم السعد بالنسبة الها اذا صرنا من نصيب بعض
بيومها دخلت بموجة افكار قوية خلتني اسهر ليلي كله رجعتني لكل زيارة يجينا بيها من يطلب ماي مخصوص مني مو من غيري، ومن مرات المحه يكصني بنظراته ومن الاحظه يضيع عيونه لغير جهة لو من نجتمع فرد سفرة يصادف موجود بيها وارفع عيوني الكاه يباوعلي ومرات من يكومون اخوتي وابوي يغسلون يتعمد يتاخر يشرب من كلاص اللبن مالتي لو ياكل اللگمة الي محضرتها من ماعوني يگوم مبتسم واني مفهية لتصرفاته
عقلي الفاهي صورلي يحب يداهرني مثلي مثل اختي علا يشاقون مرات وميانة بينهم مثلها مثل اخوتي وياه وجنت ماانطي رد فعل مااعرف لسوالف الشقة مثلهم ابلع الموقف واسكت استحي منه شريد اكوله مثلا ليش تشرب من كلاصي لو ليش تاكل من ماعوني
لحد يوم حنة خطيبة اخوي ردت ارجع فستاني لان ماصار علية قياسه چبير وطلعنا عصرية اني وامي وعلا وشفناه واگف بسيارته برة يحجي وية احمد ردنا نعبره مسافة وصاح ورانا احمد گال لامي
_ اصعدوا حارث يوصلكم بطريقه
ماكالن لا فرج واجاهن للباب دغيت علا حتى ترفض لبستني وصعدت قبلنا صفنت عليها جسمي مختض
ومرتبكة منه
