﷽
الشيهانة والعاصوف
بقلمي ياسمين
مساء النور عمري اعتذر منكم عالتاخير البارحة خلص الاشتراك واليوم الا فعلنا والبارت كامل بس كلت مانزله واسويه بارتين الكم تعويض عالتاخير سلسوا بيهن للخميس لان عدنا هاليومين تحضيرات وطبخ وهاي ايام عزاء تعرفون بيهن ان شاء الله اكون عوضت التقصير وياكم مقدما 🥰🧡
ــــــــــــــــــــــــــــــــــــــــــــــــــــــــــــــ
غنى " غنوة"
راجعت اخر ورقتين من مادة الجغرافية والبس بشالي كدام المراية كتبت اخر نقاط تعريفية بدفتر الملاحظات حتى تبقى ببالي محفورة
دخلت يمي امي تباوعلي بقلق كالت
_ هاا يمة راجعتي موادج زين لو بعدج نص ونص
باوعتلها من عاكس المراية وكتلها
_ لا يمة زينة الحمدلله سهرت الليل كله ادرس المادة
ان شاء الله اجاوب عالاسئلة كلها لاتخافين ترة هاي اختبارات من ادارة المدرسة حتى نضبط المواد زين ان شاء الله اعديها بخير
_ الله يسهلج يايمة ويفتح عقلج ماتنسين.... اني شايلة هم تقي خاف مايجاوب زين امج فاطمة تگول ما درس زين ومستغل غياب اخوج وابوج صاير يطب ويطلع محد يحاسبه ويدري بيه
_ ليش يمة محد يحاسبه لعد شناقص كرم وآسر ايد رجل واخليهم يتوبوه والله
تنهدت مالها خلك وحجت
_ اخوتج هم طايح حظهم ايدهم والضرب تكول امج اشتكيتلهم وتورطت مراددهم ومجنزيه الكلاب تالي شارد من البيت زعلان ومضطرين يخابرون اخوج اكثم مرجعه للبيت
انداريت عليها اهز ايدي
_ الله يساعد يابة اكثم وين مايروح الطلايب تلحگه حتى وهو هناك خابروه شيصير قابل
_ لعد شيسوون امي يخابروه مايرد عليهم ولنص الليل هم دايرين المنطقة اربع مرات يردون يحصلونه مااندلوه بختهم باخوج يعرف جماعته واحد واحد متصل بيهم كايللهم هسة يرجع للبيت لو الي تصرف ثاني وية اهلكم الا راجع فوگاها يگلي زعلان وية ابنج شنو اني صغير ويخابر ربعي علية وهم مطنكر
عليه مايقبل يجي الجلب
سحبت حافظة اقلامي وموبايلي ونزلت وياها
طلعت ويانا بنفس اللحظة رؤى تعدل بشالها كاشخة
كالتلها امي رافعة حاجبها
_ خيرج رؤى وين تردين من صباح الله خير
_ اريد لاهلي امي خابرتني عدها عزيمة وطلبتني اجيها
_ ورجلج خابرتيه لو ميدري بيج
_ رجلي حاير بطلايب اخوته راسلته وماجاوبني عود من يشوفها احجي وياه
باوعتلي امي مقهورة منها نزلت كدامنا كالتلها امي تحذرها
_ رؤى خلي اكلج شغلة خاف انتي مامنتبهة عليها انبهج للامانة
اكو مثل يكول احذر الحليم اذا غضب
واكثم ابني مو دفاعا عنه بس شكد مااشوفه انسان محتوي عقلج تاليها بهاي تصرفاتج تخسريه وخلي يكون بعلمج الايام الجاية راح اسعى لزواجه خاف تكولين ماكلتوا لان اني مامستعدة اخلي يضيع شبابه وية وحدة مثلج مامعبرته
