﷽
الشيهانة والعاصوف
بقلمي ياسمين
مساء النور على عيونكم الحلوة المنتظرة البارت بحرارة.... مايحتاج اوصيكم عمري فدوة لاناملكم الي تصوت وتعلق عالفقرات ممنونة منكم 💋💋🥰
الاكثم...
اجت نسابتنا للعقد وولد عماتنا الكبار متوقعين العقد لبت خالي احتاريت اذا وصلت للصدگ بيش نرگعها والاسئلة راح تطيح رشگ على روسنا
خليتها سكتة لما دخل وصار العقد بحضور ابوها وطلع ، الوجوه تباوع من جوة لجوة محد سال بس العيون حجت كلشي فض ابوي بفطنته الشكوك كلها بجملة وحدة سكتت الكل
_ اليوم الزلمة البينا الحيد يثني ويثلث ماكو على عينه حاجب والحارث الله منطيه من عافية البدن والحال يفتح بيت وبيتين وبيت ابو علي ناس من الاجاويد ولاخيرهم بالگاعدين خطبتله منهم وانطوا بدون شروط والحمدلله على نعمة الحال الله انعم علينا بالذرية وطمعانين بالزيادة من خيره
الكل سكت واقتنع بكلامه يشجعون خطوته من الكبار والولد اخذوها بسالفة وضحكة مصدگين الفلم
وينه حارث والله ربه مثني من البداية
وايي عمي الله يزيده من خيره ويثلث ويروبع
ومن هاي سوالف الشباب ماشيتهم بالجذب اني وظاهر اغطي غياب الحارث وطلعته من البيت سالوا عنه وكتلهم طلع لدوامه عدهم استنفار وسترتها مثلها مثل عقده كدامهم
المشكلة السالفة مالها ايد ولا رجل يتسولف بيها شلون خاطب بت خاله وعقد على وحدة ثانية شنو السبب وشصار وتعال اگعد بين اثنين وسولفها وشوف منو اليصدگ بيك وفتالة امي اذا درت بالصار شيسكتها وتقتنع بالصار غير اهلها ودرة اذا عرفوا شنو ردهم الله اليستر
طلعت من فوضى تفكيري وسويت اتصال بغنوة عالسريع جاوبتني بثاني رنة كتلها مسطور
_ شلونج يابة شخباركم
_ هلو يابة احنا زينين انتم شلونكم
_ الحمدلله على كل حال... كيناز وزيوني شلونهم
رحتيلهم اليوم وشفتيهم
_ ايي يابة رحت العصر ورجعت منهم خطية متدمرة على ابوها وهذا زيوني شلع گلبها كلش متنحس حيل
_ فترة وتعدي ان شاء الله جيكتي امورهن خاف ماعدهن مسواگ لو مصرف
_ والله يابة امي ماخلت شي ماتسوگته الهم وحتى كيناز من رادت تحجي وياها ماخلتها امي تحجي كلمة وحدة كلتلها انتن مثل بناتي واذا تحجين كلمة وحدة احسبج طردتيني
_ اممم....... واختها وين وشنو وضعها..؟؟؟
_ اختها بالغرفة ماتطلع لبشر ومن تشوفني تقفل باب غرفتها لطش بوجهي حتى گمت استحي اروح بس اني شسوي انته اصريت عليه اروحلهم
_ زين موبايل كيناز وين ليش لسة مغلق
_ مااعرف ماسالتها عنه نسيت
_ باجر روحيلها ونبهي عليها تفتحه واذا مابيه رصيد حوليلها غصبا عليها وانطيني خبر حتى اتصرف
