﷽
الشيهانة والعاصوف
بقلمي ياسمين
حبايبي بارتين دمج من 6335 كلمة... تعبت بيه كلش
صوتوا وعلقوا عالفقرات الله يطهركم بماء زمزم ☺️
كيناز..
كعدت بيوم عطلتي متاخرة وشبعانة نوم تمغطت بفراشي استغربت زيوني ماكعدني هالمرة كمت اتثاوب متجاهلة فوضى الغرفة بكتبي ودفاتري البارحة تاخرت عد غنوة عدنا امتحانات وردت ارجع واستاد اكثم ماقبل اصر الا نبقى اني وزيوني للعشى صادفت عدهم عزيمة ضخمة... ماحبيت اتاخر .. وعاندت من باب المستحى ناس وزحمة عدهم دور جوانا ولا يمها لكيتها متحزمة وياهن خلصتها علية خزرات بخزرات شلون نرجع ونتركهم صارتلي ام واجب
من شافتني قافلة اتصلت ببابا كدامي وكالتله عالم عدهم عزيمة وفشلة الاستاد اكثم عزمنا واني حاليا ايدي بيدهن اساعدهن فشلة اتركهن ونطلع
وعلة هاي الحجج من لسانها وافق نبقى اضطريت اصعد وية غنوة نكمل دروسنا عالسريع وزيوني صاعد نازل يمنا
بس نقلوا العشى للخطار ماتاخرت وصعدت مليكا صينية عشى النا معتبرة ماشاء الله جانت عامرة بمالذ وطاب زيوني صعد يمي يبجي مصعدته جوانا بالغصب وضاربته على ايده لان شايف الصواني وماد ايده..
كتله تستاهل عيب هيج تسوي جاوبني مهضوم منها
_ دوعاااان كنووو دوعاان
كعدته بحضني بوسته ارضيه ووكلته لمن شبع وانتخم راد ينزل ماخليته الزلم داخلة طالعة عليهم خفت ليتعور ماارتاحيت جلبت بيه وانطته غنوة لعبة من عدها اتلهى بيها
كدرنا ندرس المهمات والباقي كتلها اني اراجعه بالبيت لازم نرجع كلش اتاخرنا
لبست الشال لفيته لف ونزلت كالتلي تهمسلي
_ اني اودعج من الدرج مانزل اكثر هذا قيصر صايرة عينه زايغة مرتين المحه يكصني كص بعيونه
_ وانتي شبيج فاهية... من يكصج بعيونه اخزريه الحقير مايستحي فوكاها عرضه لعد شخلى للغريب
_ يمعودة.... شخزر منه خلي يجفيني شره ماريد حتى شوفة وجهه وادعي بلكت يتزوج ويخلصني لان ذاك اليوم رؤى لمحتلي يريد يرجع يخطبني واني سديتها بوجهاا كتلها لايجي ولايوصل ماريد اتزوج ماتصدكين شكالتلي
انداريت عليها واني انزل كتلها بفضول...
_ شكالتلج بلة...... تقربت مني تهمس بصوت ناصي وحجت
_ تكلي والله الحجي موبكيفج وترفضين بكيف الكبار
وبعدين شبيه اخوي وترفضيه جنه العافية الغيرج تفرح جايتها قسمة براسها خير غيرج يتمننها.. والنبي اكلتني اكل بلسانها... تالي سكتت عنها
خزرتها مورث گلبي من فهاوتها وكتلها بعصبية
_ كليلها العافية خليها على گلبج عيني واخوج مايناسبني من الاساس حتى اتمناه.. ومابية نقص حتى اختاره اله ترة هية موجبر حبي
