﷽
الشيهانة والعاصوف
بقلمي ياسمين
صباح الخير عليكم يارب حبيت انوه عن تساؤلات انطرحت بالبارت السابق بخصوص طلاق الحارث والعصمة بيده راح اخليها الكم باخر البارت اقروها
حتى تفهمون مسببات الاحداث..
واخيرا وليس اخرا لاتنسون التصويت +التعليق والمتابعة حساب الانستا عالبايو تلكونه ويوزر التيك توك نهاية البارت
٠
٠
✨تنويه اقروا كلشي للاخير مو تكولون مانوهت
٠
٠
٠
فلاش باگ..................................،
بفترة سفر الاكثم للهند
غنوة..
لسة اتذكر الصار بذيج الايام محفور بعقلي حفر والعجيب جانت اكو تفاصيل واضحة وملموسة بس محد انتبه عليهن ومحد كدر يتخيل اكو هيج شي يصير
من اتذكر الصار تتكسر العبرة بصدري عالكل اخوتي وية الماعدهم ذرة رحم والمكان الي انگلب ساحة حرب كاتل ومكتول مانعرف المن نشاگف والمن ندفع ونحايز من يومها انفتح باب الثارات بس من جوة لجوة ولو ماروح رؤى الرفرفت بحبل يلوح رگبتها جان ماخمدت النار المشتعلة بالگلوب الكل.......
٠
٠
بوكتها ابوي جان يشتغل على زواج شهم بس ماحجى ولا نوه لاحد وسعى بيده ورجله حتى تكمل اوراق نقل اقامة صابرين لابو ظبي والعرفته بعدين دافع مبالغ قيامة حتى يستعجل بمعاملاتها وتكمل
شدد على اكثم يسافر وسافر ولاول مرة من سمع بحمل رؤى اتعنالها لفوگ وصعدلها بقى يمها ساعة تقريبا ونزل ماحجى ولا امي سالته
بس كلش استغربت امره
رؤى بقت يمنا فترة وراها گطعت الاكل والعلاج نهائي
امي ماخلت وياها ولا احنا نتوسل ونحرمص وهية لاحياة لمن تنادي لدرجة اتصلنا بيابة اكثم يحاول وياها وهم نفس النتيجة
لحد ما اضطرت امي تتصل بأمها واجت اخذتها وياها
وبقت امي يومية تتصل تسال عنها لو بين يوم ويوم تروحلها
بوكتها ابوي من عرف مارضى رؤى تروح لهناك وبقى يحجي على امي ويصيح لان اتصرفت من كيفها امي تگله ترخصت من رجلها وهو يگلها رجلها ياغافلين الكم الله ومشى بيومها اتعنى يرجعها وماجت وياه وهاي جانت الصدمة الثانية الي استغربتها منه ليش هالاصرار والقلق وهية يم اهلها
وحسب السمعته من كلام امي ابوي ماله خلگ وابوها واخوتها كايليله رجلها ماموجود من يرجع نرجعها ومنحرج ساكت منهم بس رايحلها لغرفتها وسائلها تروح وياه وهية رافضة ترجع
بقى ابوي فتالة گابة بس بينه لبين نفسه انصدمت ورة فترة باتصال من امي فاطمة لامي كايلتلها ابوي مسافر للبصرة ومنطي مهر صابرين كامل وكايللهم جهزوها احنا نعقد وناخذ بنفس الساعة
والكم مهلة مو اكثر من اسبوع تكملن كلشي بس عمتي رافضة وباقية تناقشه المدة گصيرة وماتلحك كايللها الج عشرة ايام تكفين بتج وتجهزيها غيرهن ماكو وراجع ثاني يوم لعجمان لبيت امي فاطمة
