﷽
الشيهانة والعاصوف
بقلمي ياسمين
كلما تصوتون وتدعموني بتعليقاتكم انشر باجر من وقت واحتمال الفجر انزل حسب همتي وهمتكم 🥰🥰
كيناز...
دفعتني ودخلت للحمام تبجي وتصيح رجليه وگعت وگلبي انقبض شصاير وياها دخيلك ياربي صوت مرة هيثم اختفى وزيوني اجاني يركض حضن رجليه خايف وجهه كله تراب شلته مهبوطة اتنفس بسرعة ماطولت طلعت عيونها مطعونة للغرفة رگعت الباب وراها وقفلته بقيت مصفصفة شسوي هسة والمن اسال
نزلت زيون بالگاع وطلعت اباوع للشارع محد موجود رجعت دخلت اسمعها تخابر وتبجي
_ اكلج مالحكت اتفاهم وياه وهية عرفت من شافته يحوم عليه...... طلع الافندي ناوي يروح ومن شافني بطل شكت بيه
سكتت لحظات وصاحت منهارة
_ ولججج وين ارووح...... وين؟؟ هو بس بيتهم اكدر احجي بيه وياه ابوه 24 ساعة رجله على رجل ابنه مايتركه ماحصلت فرصة اقرب من هاي
انفتح سبيكر اتضح لي صوت نهى بت عمي تگلها
_ غبرة عدكم بساتين على كلامج يضيع بيها الجني الازرك ماينشاف ماعرفتي تلتقين بيه هناك
كتمت صوتي مصدومة ذني شوراهن صاحلي زيوني
باوعتله اسويله اششش انكتم السبيكر شلته وابتعدت گلبي لاعب منهن، طلعت ورة ثواني دخلت للمطبخ غسلت وجهها كتلها بهداوة متاملة تصارحني حتى لو بالجذب
_ شعدج جوانا... وشبيها مرة هيثم وياج؟؟
جاوبتني بنتر روحها طالعة
_ ماكو شي... وحدة حقيرة لسانها مشراع متعودة عالتلعلع والفضايح بس اني الها خلي يجي بابا واني اعلمها الدمغسزززز
سحبت نفس وزفرته كتلها
_ مرة هيثم ماطلع صوتها ابد وحبابة شخلاها هيج تتصرف وياج......... الا اذااا..... باوعتلي خزرتني وزمخت بيه
_ انجبي كيناااز انجبي وحيري بنفسج احسلج انتي وذاك المسوي روحه ثگيل عبالج ماادري بسوالف اللطلطة مالتج ومسوية نفسج گدام بابا شريفة وادمية وانتي حية من تحت تبن لمن خليتيه يركض وراج معمي عبالج يحبج مثلا.... ههه وهزت ايدها تغلي مني
رفعت زيوني من حضني وكتله روح اگعد بالباب احس رجليه صارت خيوط من الصدمات اليوم
بس طلع كتلها متخردلة
_ شبييج جوانا وعلى منو تقصدين..؟؟
_ تعرفين على منو اقصد كلش زين وترة مبين عليج انتي وياااه بس شسوي لبابا الي مايقبل يصدگني عباله انتي گد الثقة مايدري انتي لاعبة لعب وراه
صحت بيها صدري انقبض من اتهاماتها
_ اوكفي اوكفي... الله يخليج انتي اختي لو عدوتي
شبيييج بس فهميني شبيييج تخبلتي لو ماكو عقل ضل براسج.... وشعليه باستاد اكثم وشنو دخلي تتهميني عندي شي وياه
