﷽
الشيهانة والعاصوف
بقلمي ياسمين
صباح الخيرات عليكم حبايبي البارت تكريم لكل الداعمين لروايتي بدون استثناء لاسيما الست روعة الطائي صاحبة بيج قصص حقيقة ممنونة منكم حياتي 🫶🫶🥰🧡
لاتنسوني بتعليقاتكم الحلوة عالفقرات والتصويت ومتابعة حسابي انستا mgyth529
وتيك توك um_ghaith33
✨بارتين دمج✨ من 6648 كلمة
بلسان الاكثم....
لون لوحتك ورد الحياة الوان
خلص عمرك لوحتك ملت الداكن
ولا ترسم جبل.. ارسم نهر بيه روح
وارسم ريح بلكي تحرك الساكن
بلكي من النهر يطفح ركاد الغيظ
ويطگ زود ويهدم سدة اللاكن
وعلگ عالوجه ضحكة وامل بالروح
بزوايا العين كافي الچم حزن راكن
وفك باب القفص خلي الاحلام تطير
وانت من الطفولة چم حلم ساجن
ووخرها الستارة الشمس خل تفوت
ولتخلي الجروح تبين الباطن
كلها تموت صفرة الموت هم بيه لون
عاجبني الگطن للموت ميهادن
اشتري وبيع بحياتك واخسر ولتخاف
المهم سوي التريده وجازف وراهن
وسرك لاتودعه البير مايخفيه
دلو من يمر عليه يطلع جدافهن
٠
٠
كيناز.. اقتباس
كان عليك ان تغادر منذ انقباضة صدرك الاولى
................................... ولكنك غامرت،،،
اتذكر قريتها بمرة من المرات بس ماتذكر وين بالضبط مقولة من كلمات معدودة وحروف ماتتعدى
الـ44 بالرقم بس معناها بليغ واثرها عميق من تحس نفسك وصلت نقطة النهاية لابيك رجعة لورة تصلح الفات
ولابيك تتقدم وتخلص بروحك وتنقذ الراح
اعترف بذنبي اخذت الامور من زاوية عاطفية ضيگة
اخذتني لحظات غيرة ورد اعتبار كدام انسانة تافهة جانت تتحداني بحقد وغيرة وتبث سمها كدامي في سبيل تعكر عليه حياتي
اعترف بذنبي جنت متقوية بقربه مني سنده وحمايته وحرصه وخوفه وقلقه وهواجسه عليه جنت اشوفه حصن منيع كدامي
خلاني احجي واتصرف بثقة متناسية حياتي القديمة
ببيئة تداخلت بيها شوائب وعقبات ومطبات ومصايب من عمايل اخوتي دفعت ثمنهن من يوم الطلعت من بغداد شاردين بروحنا العزيزة من ثار يطارد ورانا
ماجنا مستوعبين حجم غبائنا وتغافلنا ماخذين ويانا وحوش جنت اشوفهم اخوة ولو جان بالاسم بس اسمهم اخوة ويجمعني بيهم دم ورابط اب وام تركونا يتامى وراحوا لدار حقهم
خلوني لوحدي بنصهم وياي طفل محتمي بيه واني محتمية بانسان غريب لذت لركنه شاردة من عواصف دنيا جنت مخمنة بلشت تضحكلي
باخو عالج ادمانه ورجع ويانا مثل النسمة الحلوة يلاطف ويهتم ويراعي كانما انسان تبدل عقله ورجع بعقل جديد خلاني اصدگ ذيل الجلب بيه مجال ينعدل ويستعدل
