﷽
الشيهانة والعاصوف
بقلمي ياسمين
✨بارتين دمج للحبايب✨
الاكثم...
توجهت للمطار وموبايلي بيدي اتصل علة حارث مغلق مايجاوب رجعت اتصلت علة ابوي يرن ومحد يجاوب احتاريت شسوي والدرب طويل شيوصلني الهم
كعدت بالانتظار تقريبا ساعتين الا صاحوا باسم طيارتي دكيت للمرة الاخيرة علة حارث جاوبني صوته منتهي
_ هاا اكثم اسمعك
_ شصاير حارث وشبيه ابوي متخربط
سكت لحظات وجاوبني ماله خلگ
_ انته وين..؟؟
_ راح اصعد الطيارة جاي الكم
_ ماشي من تنزل تعال للبيت احنا نص ساعة ونطلع من المستشفى
_ ايي غير افتهم شبيه ابوي وليش ابو علي يگلي سطيت على بته
_ ههه يصير خير تعال وتفتهم كلشي وهذا ابو علي الا حط رجلي بيه بس خل يصبرولي علما يصحى ابوي
سده بوجهي ضليت مدولغ من وراهم دخلت للطيارة علما اقلعت اني بالف حسبة وحسبة حتى كيناز مالحگت اشوفها هية وزيون
نزلت بالمطار ومناك توجهت بتكسي للبيت اتصلت بيه غنوة تتطمن امي يمها كتلها طمنيها ماكو شي ابوي طلبني اجيه احضر وياه جم دعوة مو اكثر وصيتها على كيناز ماتتركها علما اجي وغلقته
دخلت گدام البيت ونزلت فتحلي ظاهر ابن عمتي الباب انسطرت شجابه هنا !!
سلمت عليه مستغرب گالي مبتسم
_ ماصارلي من اجيت اخوك اتصل بيه خالي فتالته گابة جبت امي واجيت تهديه ادخل جوة كاعدين بالمجلس كلهم
دخلت عليهم سلمت ردت علية السلام عمتي سلمت عليها وبصفها لمحت ام علي كاعدة بالگاع وتبجي ومسافة عنهم ابو علي مدنگ راسه ماله خلگ.. كعدت بجهة الوالد منتجي وعكازته بيده ملامحه تسولف بانذار معدل
بست ايده وسالته عيني عليهم
_ خيركم يابة شصاير..؟؟؟
بس حجيت هيج غطت وجهها ام علي وبجت تنوح ورجلها گام يدگ برجله ويبجي.... اسمع ابوي يستغفر محتقن وعمتي تكلهم صلوا عالنبي صلوا عالنبي ماكو شي ماله حل
بقت نظراتي تفتر عليهم كالتلي عمتي
_ اگلك يمة لو مخابر اخوك تشوفه وين بالي يمه زبگ علينا وطلع عاد نفتهم منه هو الثاني مايصير احنا ناخذ الحجي من طرف واحد خاف السالفة ماتسوى كل هالشوشرة
عرفته بسمار منها مغتاضة منهم سحبت موبايلي اتصلت عليه طلع مغلق كتلهم مغلق موبايله يمته طلع منكم..؟؟
كالتلي ام علي دموعها تنزل على خدها
_والله يايمة مصيبة وطاحت على روسنا مصيبة مالها حل تنحل والبت ابوها جنزها وكسر ضلوعها تكسير ماخلصتها منه غير بقل هو الله احد
