﷽
الشيهانة والعاصوف
بقلمي ياسمين حلقة 19
لاتنسوني بدعمكم بالتصويت والتعليق بين الفقرات
غنى...
متنا من الخوف صوت طلق وتكسير وصياح انكلبت
الدنيا علينا كمت اصرخ من الرعب مااعرف منو الضارب من المضروب لحد دخلوا بينهم عمامي الا هدوا ابوي ضرب آسر وقيصر وعمي صاح لامي تسلمه السلاح
مد ايده لآسر وگاله صوبه بالمكان التريده عمتي ام قيصر صاحت وكامت تلطم رادت تجي بنصهم منعتها امي فاطمة
بقى الهدوء سيد الموقف دموعي نزلت خايفة من تاليها شفته صفن عليه لحظات ينفث نار من العصبية كاله
_ ماتسوى عمي اخذ سهمه وزيادة مني
_ دامك حجيت هيج يعني عقلك براسك شوف انته وياه واسمعوني زين لو هسة وكدامنا ينرد العايل وتاخذ حكك منه او واحدكم يحضن الثاني تتراضون وتخمدون نار الزعل بينكم ماتنفتح السيرة دوم
باوع آسر لقيصر محتقن ماعلق بس صدره يصعد وينزل من القهر دفع يابة اكثم قيصر لكدام كام ينافخ
منفعل اتدخل بينهم عمي ابراهيم دفع آسر عليه گاللهم بنتر
_ خلصونا وواحد خلي يحب الثاني زمايل خزيتونا كدام ام محمد شبيكم
تحاضنوا وكلمن زاح على صفحة صاح ابوي بيهم وتخطى للمجلس
_ تعالوا وراي للمجلس عندي حجايتين للباقين
تبعوه... ركض يابة اكثم كدامنا صاعد لغرفته دشداشته انملخت من الذراع حتى الدكم طاكات غيرها ونزل وامهاتي نصبها مناحة هنة ومرة عمي ركضت مرة عمي ابراهيم الجبيرة صفية جابتلهن ماي وصاحت بضرتها تجيب قياس الضغط تقيسلهن
كمت اسمع قريب المجلس شيريد منهم اجت وراي رؤى هم خلت اذنها وياي اسمع رزالة ابوي للبقية على دگتهم شلون تدخلوا بينهم بدل مايحلوها شربكوها غسل شراعهم غسل الوحيد الي نط من بينهم بكر عود يبرر تالي زمخ بيه ابوه يسكت وسكت
اخذهم عمي ابو القاسم محاضرة طويلة عريضة وشيد بموقف تقي نفخه نفخ كتلها اهز بيدي
_ بعد شيخلصني منه هذا هسة ياكل گلبي اكل على بطولته المشرفة
ضرربتني بجتفي تريد تسمع سكتت مفتشلة حسينا ماطول شوية وطلع يابة اكثم يصرفن بردانه اتخردلنا من شفناه ردنا نتحرك لايزمخ بينا لطمتها بوجهها ولطمتني بشفتي صاح
_ الله الله شبيجن بوية ليش واكفات هناا
لزمت شفتي وهية لزمت گصتها تمشينا گدامه دخل ورانا گال لامهاتي يهديهن
_ ماكو شي يابة عدت سلامات وتراضوا الولد العشى راح يوصل همن ايدجن حتى نفرش
شافني لازمة شفتي متوجعة صاحلي يشوفها ابتسم ومسح على راسي
_ عدت سلامات اليوم كلها جرحى متصوبة لازم نذبح فدى تطرد الشر مابيها بعد مجال
ورة دقايق اندك الباب وصل العشى استلمه هو وتقي وخلدون وصلوه للمطبخ وبقى اكثم يوجه بالولد يركضون يجهزون السفرة واحنا نجهز لسفرة النسوان
