﷽
الشيهانة والعاصوف
بقلمي ياسمين
٠
٠
صوتوا وعلقوا حبايب بارتين دمج مثل موعدتكم
النية جانت بس احبك
ومااحب كلشي يخصك
تالي حبيت المدينة الانت
بيها واهلك وناسك وعطرك
اكثم...
دست بانزين بكل حيلي وعروكي نطت كد ما ضاغط على اعصابي خايف لا النار وصلت للسرايا امي وغنوة رؤى بالي يمهم ليكون جاريلهم شي ضغطت اتصال على غنوة يرن وماترد اتصلت برؤى ماتجاوب هنا عقلي أكد عليه صاير شي بيهم بس نزلت المنطقتنا لاحت الدخانة من بعيد واصلة للسما وسيارة اسعاف عبرتني رايحة انسطرت منو بيها اتاذى ردت اندار اتبعها شفت كرم يتبعهم بسيارته لساني يبس بلهاتي اساله منو بيها ومنو اتاذى
اتوقف بنص الشارع وگالي يطمني
_ لاتجي ماكو شي عدت سلامات بس غنوة شوية صابتها حرارة من النار لان ركضت شمرت تراب عالسيارات قبل لايوصلهن اللهب خلصتهن من الانفجار وفزعت العالم سباعية والله ماتوقعت يطلع منها هيج
_ لاتهونها كرم ترة گلبي يلعب وين اتاذت وشكد نسبة الحروق بيها
_ والله العظيم مو قوية بس اختك تدري بيها جلدها طري ماتتحمل لسعات النار شوية واصل لايدها وصفحة من وجهها ، امك كلبتها علينا مناحة وهية تقنع بيها مابيها شي، صار الوضع بالمگلوبي اضطرينا ناخذها بالاسعاف للاحتياط وياها رؤى صاعدة
ارجع يم ابوي وامي خليته وية اخوتك ذولة صغار مايفتهمون...... احنا منطول هسة راجعين
باوعتله مامقتنع گالي
_ يابة وعلي داحي خيبر الي تحلف بيه مابيه مابيها شي احنا ساعة وتلكانا كدامكم واذا تريد اوصل وافتح وياك كامرا تشوفها بعد شتريد
هزيت راسي شبه مقتنع من حلف كتله
_ انتظرك.... لاتخليني بقلق عليها
_ صار وتدلل
حركت السيارة وايدي تبنجت عالستيرن من شفت اطفائية ثانية عبرتني للسرايا بس وصلت شفت الهوسة الجوارين واخوتي واصلين قبلي يسحبون بسيارات الكراج يطلعوهن برة وابوي واكف يم عالم غرب مگعديه بكرسي مبين ماكله القلق من معالم وجهه..... نزلت اركض صاح بيه تقي يطمني
_ ماكو شي اكثم محد انصاب بس البساتين النار مشت بيهن شوية بلشت تطفي بيهن الاطفائية...... كتله بقلق
_ وامي وينها شصار عليهن
_ ماعليهن شي عدت سلامات بس غنوة شوية صابتها حرارة من النار لان ركضت شمرت تراب عالسيارات ماقبلت تعوفهن لمن وصلنا
عبرنا لجهة مزرعة امي من البستان نركض لكيت الاطفاء يحاولون يخمدون النار ابو بسام وابو تحسين ينقلون سطول تراب ويشمرون عالنار هم وهيثم وباقي العالم بالتكدر عليه، الدجاج والطيور كله جوة يصيح
ردت اتقرب من الباب افتحه اخلص الحيوانات ماخلوني الامن وطلبوا منا مانتقرب اكثر اضطرينا نوكف متفرجين
