﷽
الشيهانة والعاصوف
بقلمي ياسمين
لاتنسوني بتصويت وتعليق من اناملكم الحلوة
كتبته كوة التفاعل مايسوي واهس ابد واحتمال اسحب عليكم 😫😫😫
ومثل نار البخيط الشمع بيه
السوالف تفتر....
ومو بالريح انة بنفخات الشفايف
ممكن اتطشر.....
رماد رويحتي وبأي نسمة تتبعثر...
ما ضل شط بجروفه اترجى الامان
ولا ضل خدر يلم بية شكو مكسر....
مرات احس مخلوقين حتى نضيع
ومرات الـ الله كريم هواي تجبر......
٠
٠
ساعة 1:30 بالليل
نزل من سيارته بنهاية السوگ وعيونه تتلفت يمنة يسرة رفع موبايله وضغط على اول اسم بالواردة رن عليه وعيونه تراقب محيط المكان بحذر اول ماجاوبه گاله بهمس
_ هاا قحطان وين وصرت؟؟
_ جاي استادي قريب منك هسة اوصل
_ استعجل ماضل وكت بسررعة
_ وصلت استادي هذا انته كدامي شفتج
اندار للخلف شاف سيارتهم ركنت مسافة عنه ونزلوا اربعة متلثمين قفل موبايله وتقرب منهم بثقة
_ اسمعني قحطان انت وربعك زين تنفذون كلامي بالحرف ومثل ماعلمتكم تمشون على خطواتي ايي ثغرة تصير اطيح حظكم واشمر التهمة بروسكم ترة
مامستعد اتحمل ثمن غبائكم فهمتوا لولا
_فهمنا استادي بسس........ وتلفت لربعه وحجى
ترة احنا ماستلمنا المبلغ كامل ولاانته انطيتنا موعد
عليه
_ واني اتفقت وياكم تتم العملية وتنجح اسلمكم الباقي تخرب العملية كلشي ماتقبضون...... يلة تعالوا وراي... تبعوه متلثم مثله مثلهم للاحتراز من تصوير الكامرات خارج اسوار المحلات...
تسلل هو وياهم بدقة وحيطة وحذر متجنبين شاشات الكاميرا اللاقطة ودخل وياهم من فرع لفرع لحد ماوصلوا لسوك الاقمشة اشرلهم بيده على محل
"ابراهيم الـ***** للاقمشة الرجالية والنسائية"
_ ذاك المحل شفتوه لولا.؟؟
_ ايي شفناه محل ابراهيم **** للاقمشة
_ عفية عليكم احفظوه زين بلحظة اتصالي بيكم
تتحركون تشوفون شغلكم بيه ومثل ماوصيتكم غلطة وحدة تدفعون ثمنها غالي..... مااشي
_ ماشي استادي اعتبر كلامك تم
ضرب على جتفه يشجعه وگاله
_ يلة توكلوا خلي نرجع منين اجينا وابقى وياكم على اتصال
ركب سيارته نازع اللثام شمره بالچكمچة وشغل سيارته عالبصمة وطلع من المنطقة بالكامل اجاه اشعار رنين لموبايله ورث جكارة وطلعه من جيبه غيمت ملامحه من شاف اسمها صار يستغفر يهدي اعصابه لاتنفلت تالي لسانها يشتغل رشاش عليه
جاوبها يتافاف ماله خلگها
_ هااا خيييير شعندج داگة؟؟
_ وينك لسة ماجيت ترة ماصايرة هاي كلما اتصل بيك ترفضني...... قاطعها لعبانة نفسه من سوالفها
_ جااي بالطريق وحضريلي عشى ميت جوع
_ هذا ياعشى تريده بنصاص الليالي بلة
_ مشكلتج هاي مو مشكلتي مو ترديني اجي وميتة على شوفتي يلة استلمي اوامر وطلبات
