﷽
الشيهانة والعاصوف
بقلمي ياسمين
ان شاء الله اكون وفيت وياكم صوتوا وعلقوا عالفقرات حبايبي 🥰🥰🥰 وبالنسبة لحساباتي راح انزلهن اخر البارت،، البارت بدون تدقيق اخلصه منا انشر منا 😂😂😂😂
كيناز... كتلها مسطورة
_ وشلون يخطبج غير الرجال متزوج وعنده كومة جهال كالتلي روحها طالعة
_ والله حبيبتي محد دگ بابنا غيره عندج احسن منه جيبيه ماعندي مانع بس اني شسوي لحظي نايم بالخيسة
طلع بابا من الحمام صفنت عليه مامرتاحة كتله استفسر منه
_ بابا صدك هيثم راح يخطب جوانا
_ ايي بابا صحيح الولد طلبها على سنة الله ورسوله
واني وافقت الولد درة مالت الله مايعيبه شي
_ شلون مايعيبه شي غير متزوج ومرته وجهاله شلون بيهم
_ مرته مصيرها توافق بابا الرجال مامسوي حرام ترة واهله يدرون اليوم راح تجي الحجية وابو تحسين يخطبون اختج حسب الاصول
_ زين والمشكلة الصارت ذاك اليوم شلون صار هيج
_ سوء فهم وانحل بابا تصير وتعدي المهم ساعدي اختج لاتخليها لوحدها وجبت مواد كيكة وعصير قدمنه ضيافة للحجية والحجي من يجون
تركني ودخل صافنة عليهم اذا جنت دايخة بامرهم قبل هسة انسطرت اكثر رحتلها جانت بالغرفة تختار ملابس للخطبة صفنت عليها منتجية عالباب كتلها
_ مرته تدري لو متدري.... قصدي تعرف اهله راح يجون يخطبوله اليوم لولا
جاوبتني وهية تنفض بالملابس دور شريط الثوب
_ لا متعرف ناوين للعقد ونصدمها خوش صدمة هههه
راح ياخذها هو اليوم للسوگ يلهيها علما يخطبون ويتم كلشي ....... بلعت ريگي خايفة من عواقبها كتلها متوترة
_ التقيتي بيه انتي صح؟؟
بدون متباوعلي جاوبت
_ اكيد التقيت بيه وشايفته لو حلال عليج حرام عليه كيناز افندي
غلست عن بسمارها كتلها
_ ووين راح تسكنون اذا تزوجتيه؟؟
_ عدهم غرفة الحجية گالي راح يفرغوها ونزوج بيها
وهمة ينامون بالصالة خاف الج نية تسالين عنهم وين يرحون طبعا
_ الله يسهل حجيتها وطلعت مخنوكة شهالقسمة ياربي شجاها هيج مستعجلة والعالم حتى مكان ماعدهم وشلون بابا وافق بسهولة عليه خليتها محتارة بروحها ودخلت يمه بالغرفة جان يصلي دمعتي تلالي بعيني من شافني اشرلي بيده اجيه
كعدت كدامه گالي يجاوبني بدون مااسئله
_ خليها تمشي قسمتها بابا لاتحجين وياها كلمة ولاتغثيها..... ترة اختج كبرت ومن حقها تفكر بزواج وطفل تاسس عائلة الرجال جان هاويها بس قلة الحيلة منعته يتقدم
والمشكلة الصارت قبل ايام رب ضارة نافعة الها
المرة من غيرتها عليه شايفته يركض علمود يسال وظيفه لاختج مامتحملة وسوت ذيج البلبلة
