﷽
الشيهانة والعاصوف
بقلمي ياسمين حـ42
٠
٠
مساء الخير عليكم يارب مشكورة وممنونة للكل بدون استثناء لدعواتكم لكلماتكم الحلوة الي اثلجت قلبي 🫶 واطمئنيت الدنيا بعدها طيبة بنفوس نظيفة مثل نفسياتكم قدرت وصبرت على انقطاعي عنكم
مشكورة وممنونة لصبركم علية
الي حبيت انوه عليه البارت دمج وكذلك مع انقلاب بتغيرات حياتي اني واطفالي وكثرة المسؤوليات والالتزامات احتمال يكون النشر مرة بالاسبوع لان الله يشهد الفراغ شح عليه ووضعي لحد الان مو مستقر وشبه هدوء مابعد عاصفة متوقعة ماعرف وين يرسي وضعي
وجنت اكتبلكم باوقات نفسيتي مستقرة اشرد بزاوية هادئة اكتب مجريات الاحداث التهي وانشغل من التفكير بسردها
واخيرا وليس اخرا لاتنسوني بتصويت عالبارت وتعليق عالفقرات حتى القصة تصعد اكثر ياريت تنشروها للعدها صفحات ترويج فيس وغيره قصصي تحتاج دعمكم حياتي لحد الان ماوصلت المليونيةللاسف.. وهالشي منوط بيكم مو بيه.................... 💔
٠
٠
صابرين..
ست اشهر عدت من حياتي وياه جانت شي اشبه بالموت البطيء حالته وانتكاسته على اخوه من غير لوعته على بت خالي يختفي بيها يوم يومين ويرجع ملابسه متربة والضيم حاله
منها واعرفه جان يزورها..............،
بعدها يعزل نفسه بغرفته ايام مايطلعله صوت اطبخ وجبات اله اخليها اله عالطباخ واختفي عن عينه
متجنبة احتك بيه قدر امكاني بالذات كلامه اخر مرة
ذبحني بيه بسچينة عمية ودار وجهه
المشكلة اني ماكرهته وبعدني احبه واموت بيه وگلبي لسة يفز لطگة صوت الباب من اسمع حس ايده عليها... احاول مااباوعله ولا ادير بال بس گلبي جان بكل مرة يعصي علية الكاه يفر قبلي لشوفته
الملل الجاي اعيشه والقهر والحسبات خله وزني ينزل بشكل واضح بعد ماجنت مليانة وصاحبة خدود ..
من اشوفه عازل نفسه وماطايقني اموت من القهر واكل بروحي اخلصها بجي وتنظيف لدرجة
الشقة كد ماعيد واسقل بتنظيفها احسها صدعت
ماردت هاي العيشة ولاتخيلتها هيج
وافكر مرات من اتصل بأمي احجيلها واصارحها،
بس من اسمع صوتها مرتاحة وجاي يجهزون فرحانين لعرس انتظار هالايام...... اسكت وابلعها ماريد اضيگ خاطرها
مشت الايام والشهور هو مايشوفني ولا يطلب مني لگمة اكل رغم اطبخله ومجهزة وجبات توالم سكره وحتى علاجه اراقبه ومن يطلع ارتب غرفته وملابسه اشمهن بسكتة واركض اغسلهن اله
لو من يدخل للشقة او يطلع غصب عيوني تتبعه بلهفة لحد مايختفي ويبقى سراب خياله يتراوالي بعدها تطلع من روحي تنهيدة تعب لاهماله
