﷽
الشيهانة والعاصوف
بقلمي ياسمين
لاتنسوني بتصويت +تعليقاتكم الحلوة عالاحداث جنت ناوية اكمل البارت اللاخ الا انزل ورة بعض بس اصراركم عليه خلاني اتراجع البارت التعويضي قيد الكتابة بمشيئة الله لو العصر لو بداية الليل انزله ادعولي بالتسهيل وممنونة لسعر صدوركم علية 🧡
٠
٠
البصرة....احدى القرى الريفية
الله اكبر الله اكبر....الله اكبر الله اكبر
اشهد ان لا اله الا الله... اشهد ان لا اله الا الله
٠
٠
فزيت مثل عادتي بهيج وقت افتح بعيوني منعسة على صوت اذان الفجر من الجامع بصوت الشيخ عبدالله جارنا وصديق ابوي بنفس الوقت
باوعت لاخواتي نايمات ومتدثرات بالبطانيات اليشوفهن يكول عدنا "المربعانية" بعز الشتا ولا جنا دخلنا الصيف
خليت وطلعت اجمع بعطوب شعري حتى مالي نفس اباوع للمرايا اعرف روحي طالعة شمس لبنان بعز الفجرية لميتهن گوة وطلعت اسمع صوت ابوي يستغفر وامي تسبح وتناجي رب العالمين بتراتيل من الحافظته عالفطرة السليمة وبلهجة اهلنا تدعي :
_ الهي اصبحنا واصبح الملك لك لاشريك لك الهي ارزقنا وافتحها على راعي بيتي بالرزق الحلال واچفيه شر الهافي والمتعافي ترة راعي بنيات ماله بهالدنيا سند غيرك ولا النا غيره .
تصبله بدلة ماي نحاسية مخصوصة الهم للتوضى شايلته بيدها اليسرى والخاولي بيدها اليمنى... علما يفرش سجادته تتبعه هية متوضية باحرام الصلاة وراها تستعجل بالريوگ يفتح ريگه بخبزة ومجعة چاي ويتوكل على باب الله يبيع بالعلوة القاسمه الله من جنايين الزرع والمخضر يشتري منهم وياخذ الربح عالبيع
صبحت عليهم ورحت للحمام اتوضى حتى اصلي وراها اكعد اخواتي كلهن يكومن يصلن بعدها نلتهي كلمن بشغلها الي تجهز الريوگ تخدر الچاي والي تغسل الحوش والي تجمع البيض من گنون الدجاج والي تعجن حتى تخبز على برودة الجو
قبل لاتحمى علينا الشميسة والي تنظف داخل البيت وترتبه وامي تكشف الروبة تصبلنا منها نتريك وتروب خاثر جديد للغدة...متعودين نشتري الحليب من ام حميد وامي تسوي منها الجبن والزبد واللبن نبقى نتعلل بيها وية الوجبات نحبها بالذات اذا سوت السياح ودهنته النا بالزبد ماينشبع منها
احنا سبع بنات خلفتنا امي ومارزقها الله بولد من تعبت من الخلفة وابوي رجال مؤمن بقضاء الله ورزقه منعها تخلف بعد مكتفي بينا.. اخر العنقود ميمونة واني اكبرهن صابرين وراي اجت
انتظار
وانتصار
وبيان
وتقوى
وبهية....... ومثل ماذكرت فوك اخرنا
ميمونة
بزرة الگعدة وحلاوة البيت ماخذة عقل ابوي بلسانها ومسودنته بسوالفها ولاجنها طفلة عمرها عشر سنين امي تكول طالعة على خالتي ام ظاهر تلاسن زلم مشوربة وتكعد بمحضر شكبره من تسولف بميزان ومعدلة بالحجي تسكت اكبر شارب
