﷽
الشيهانة والعاصوف
بقلمي ياسمين
لاتنسوني بتصويت من اناملكم الحلوة وتعليقات تشجعني عالاستمرارية وغلسوا عن الاخطاء عمري ترة مادققت انشر باستعجال لخاطركم 🫣😭😭
٠
٠
بلسان حال الشهم...
آلَهّدٍنِ حًيَلَيَ کْلَهّنِ يَبًدٍنِ بًطِآريَکْ
طالع بسيارتي بالليل بشوارع ابو ظبي صافن بدنياي
ووضعي وية رؤى كلما انوي ابعد ودمعتها تكسرني الها جبر ترجعني اسايرها بالذات من انتحرت اخر مرة هددتني بيها ونفذت من يومها صارت عندي رد فعل بليلتها مانمت من وراها ومثل الطير المذبوح افتر مكاني لاطايل السما ولا لايح الارض
المن اشكي همي والمن اسولف مصيبتي وكلمة الياريت شالت من عيني النوم... ياريته مو اخوي وعضيدي الماخذها ياريته غريب جان تجازيت وياه بس العلة مني وبيه... اخخخ يايمة وينج عني،
بهالاثناء اتصل بيه الوالد جاوبته مرخم صوتي وجكارتي اطفيها بالمنفضة احتراما لحضوره وان كان غايب بشخصه كدامي
سالني بعد السلام عن وضع المشروع وين صفى وادري مو هاي غاية اتصاله جاوبته الافتتاح لكل الطوابق باقيله بس اسبوع ويجهز كلشي مابقى شي جاوبني بنبرة قلق اخفاها بين طيات برود اجابته
_ يصير خير انه هالاسبوع عندي سفر بعد مااخلص مشاويري وية خالك نواف اضيفك بشقتك واشوف المشروع بنفسي واذا كدرت ابقى للافتتاح اچيك امور شغلك وتنظيمك اله حتى ارجع لعجمان متطمن
كتله هلابيك وتنور ابو ظبي بزيارتك انتظرك
سحب نفس وزفره لحظات كانما بلسانه حجي خايف يسولف بيه كتله قلق
_ خيرك يابة صاير شي..... استغفر بصوت ناصي وحجى
_ بت عمك يبة............. بت عمك تحذر منها وانساها وامحيها من عقلك جن ماانولدت بيوم
عصرت عيني دايخ ومخنوگ من كلامه من جاب سيرتها.... اذا جنت اتنفس هوة الله گوة هسة بكلامه صار شحيح علة ريتي متكسرة الشهگة بصدري ماترهم اطلعها حتى بيني وبين روحي زحمة
_الحرمة يبوك بعقل جاهل واصبحت حليلة اخوك لا العشم ينفع بعد ولا كلمة الـ لو تعالج وضع انكتب عليكم تعيشوه واني متفرج حتى احفظ روح تلحگ ذنب الراحت بالگبور وجدتك ماتت ماتواطي لسانها لساني
اخوك هاويها وهالايام ياخذها يسفرها لخاطر الخلفة
اشوف روحه تحوم علة ريحة طفل من صلبه يركض ورة هالطفل ابن الحجي مخليه علة صدره يناغي بيه
ركنت السيارة على صفحة وگلبي فز لسالفته معقولة جانت تمثل عليه هو ماتقرب منها وما تحبه وهم بالاساس عايشين طبيعي.. !!!
طفيت المحرك مامتحمل السيرة كلها مو حتى اسمعها منه هو بالذات..... كتله الله يسعدهم واخرسيت ماكدرت اضيف بعد،
