﷽
الشيهانة والعاصوف
بقلمي ياسمين
بارت اضافي مثل موعدتكم عالتاخير ولاتنسوني بتعليق وتصويت من اناملكم الحلوة 🥰🥰
انا ابن الهلا الما تخلص بباب البيت
ومااسولفلك تگرب اعلينه وشوف
هلي وادم عرب من تجبل الطيبين
ومن ذيج الغنم نترس الشارع صوف
كيناز...
انگلبت احوالنا كلها وتغيرت من ذيج الليلة قبل مشية العشيرة الي تطلب بينا ثار اجتنا الحجية ام ظاهر نص الليل وطلبت نجمع غراضنا ونطلع بابا منتظرنا برة نسال شكو محد يجاوب نحجي ماكو ساكتين بس اسكتن واسكتن
جمعنا ملابسنا وغراضنا والاستاد اكثم ينقل بيهن خلوهم بسيارة مضللة داخل الحوش، سلمنا بخوف عالحجية وهية تدعي وتلهج وتطمنا بنفس الوقت بجملة رددتها اكثر من مرة
_ فضت ان شاء الله... فضت مابقى شي
طلعنا لبرة خايفات شفنا بابا وعمي جواد وزلم واكفين يمه انزاحوا يسوون مجال صعدنا بالسيارة وبابا كدامنا بالصدر.... وبليلة ظلمة طلعنا من بيت الحجي نقلونا لغير مكان بوقتها تبعتنا سيارتين جانوا ولد عم الاكثم وياه مسافة ربع ساعة نزلنا كدام بناية وصعدنا نتبعهم لحد ماوكفنا كدام باب شقة فتحها ودخل قبلنا باوعنالها جانت شقة شبابية مفروشة كامل ومهياة ومبين مسكونة لحد ماسمعت من بابا هاي شقة الحارث لان اكو ملابس اله بيها
اخذوا بابا لبرة حجوا وياه لدقايق وراها دخل بسام شمر روحه عالتخم ونام وزيوني خليته بغرفة بيها جرباية وطلعت سالته قلقة ليش انتقلنا هيج وفجاة
گالي وهو ينزع قميصه
_ احسن بابا عيب ضايقنا بيت الحجي بما فيه الكفاية منا وهيج ندبر نفسنا
سالته جوانا وعينها تدور بالمكان
_ زين بابا هاي الشقة اجرتها منهم لو بلاش
مارد عليها بس كاللها افرشيلي فراش وراي باجر غبشة اطلع لبغداد اجيت اساله ليش.... حجى مقاطعني
_ لحد بيكم يسالني شكو وليش ترة البيه كافيني فهمتن بابا لو اعيد لحد تسال
_ تمام بابا وصدك فرشناله ونام بقينا اني وجوانا مصفصفات افترينا بالشقة صالة ومطبخ على صفحة يجي كد مطبخ بيتنا القديم وغرفة متوجهه عالصالة وبصفها حمام والغرفة بيها بلكونة عالشارع
صغيرة مال عزابي من صدك دورنا الثلاجة لكينا بيها عصاير ومشروبات تايكر وغيره بس مو خمر وباقي مسواك ذبلان بيها
دخلنا للغرفة الجرباية ام نفر حشكت نفسي بصف زيوني ونمت وجوانا فرشت بالگاع ونامت بين كل فزة وفزة الكاها كاعدة على موبايلها تكتب بيه مدري شتسوي وارجع انام
كعدت الفجر سمعت صوت بالصالة وصوت باب انفتح وانسد كمت اشوف، شكو لكيت بابا دخل ويفرك بعيونه
