﷽
الشيهانة والعاصوف
بقلمي ياسمين
لاتنسوني عمري بتعليق وتصويت البارت ممنونة منكم🧡🧡🧡
٠
٠
لسان حال الاكثم وية رؤى...:
اجيتك وأبد ماهمني انت موجــاي
كلبك مو وفي وجدمي على وعده
وأرد منك تعب وبوجهي للــــــنوم
واحن منك تلگتـــــــــــني المخدة
طول الفترة الفاتت تعايشت وياها بالغرفة غصب عني كابرت بس بالجذب متامل فترة وتطخ او حتى تايس وترضى نتمم زواجنا... عزلت فراشي عنها صرت انام جوة وهية عالجرباية انام وافز مرات احس بيها كاعدة تحوص لو مرات تبجي بسكتة احس بيها ومراقب انفعالها وحذرها كدامي تتغلف بيه حتى مااتقرب منها لو افكر بهالشي لمجرد فكرة ومن تبقى لوحدها ترجع تبجي بسكتة خانكة صوتها بالوسادة...
احس وراها شي سالفتها مو تايهة ابد ومو غبي واقنع بكلامها وحججها ماتريد تتزوج لان اشوف المثلي مابيه شبهه لو خلل وترفضني موغرور بس ثقة بنفسي ماناقصني شي حتى تتمرد علية بهاي الصورة....اذن شغلتها موخالية نهائي
جربت اسالها جم مرة بصورة سطحية سيطرت بيها گوة على اعصابي زايح غيرتي ودمي الحار على عرضي..... كله زحته على صفحة طاغية على عقليتي وتصرفاتي الصورة الغالبة بطباع عمي ابو القاسم اكثر من يشبهوني بيه رحمة وحنية عالكل مستعطف حالتها مااريد اصير سبب بتأجيج ذكرى قديمة ترجع تتجدد بتصرف متسرع مني تالي تروح بالرجلين بذنب او بلا ذنب
ونفت كلشي يدور ببالي بحجة رفضها للزواج جاي من عدم رغبتها ترتبط بكل شخص بيه او بغيري مثلها مثل غنوة ماتريد زواج
سالتها خاف تشكي من علة نفسية او جسدية واني ايدي بيدها اخذها اعالجها ولاتبقى بهذا حالها وياي ونفت كل توقعاتي برفضها هية ماتشكي من شي
بالاخير بزعتني كتلها من الاخير شوفي حل لنفسج لان اني مستحيل اصبر عليج هيج بلا سبب
كومت الدنيا ماكعدتها شتقصد وشتريد مني ومالك يمي شي مجلبة بكلمة طلكني واعتقني حفظتها عالغيب كد ماترددها بكل وكت
كتلها من النهاية حدي وياج بس الليلة باجر تحضرين نفسج نتمم زواجنا وتركتها ونزلت لجوة خليتها تفرفح
بالنهاية اني مو راهب ولا جماد اشوف مرتي حلالي كدام عيني وابقى اتفرج عليها وجنت مطول خلكي عليها عبالي ادمية وتعقلها امها لو اختها وطلع كل توقعاتي بيها صفر اليسرة
من تعشينا نزلت هية على حسب الاصول ومن كملنا صعدت بدون نقاش للغرفة مجرد تنفيذ لوصيتي تنزل وتحترم نفسها ونظام البيت ماتخربه هية من تالي
بوقتها الوالد جان معزوم عد واحد من ربعه
سويت اتصالاتي على حمولة البضاعة الجاية واتصلت بابو بسام اتاكد من امورهم كملت وتطمنت عليهم وشربت استكان چاي وصعدت فتحت باب الغرفة مالها اثر وباب الحمام مسدود نزعت دشداشتي وسحبت منشفة ناوي اغسل وانام ثاني يوم عندي زخم بترتيب نظام البضاعة دكيت عليها الباب حتى تطلع ماكو رد ردت ادكه مرة ثانية حتى تجاوبني سمعت صوتها تون وتتقيئ
