حاولت تتصل في ابوها وميته خوف عليه بالعاده كل ساعه يطمنها عليها لين يوصل واليوم مر وقت طويل ما دق عليها ولا رد على اتصالاتها وزاد خوفها ، انتبهت ميثا على توترها: شمس يامي
رفعت شمس انظارها: هلا
اشرت ميثا على المكان جنبها: تعالي ابيك
وقفت شمس تجلس جنبها ونطقت ميثا: وش بلاك يابنيتي من اليوم وبالك مشغول تراني ملاحظه عليه
تنهدت شمس: خايفه على بابا ما يرد علي
ابتسمت ميثا تربت على يدها: ماعليه اكيد انه مشغول ولا باقي بالرحله ما وصل لا تشيلين هم
هزت شمس راسها بتفهم: ان شاء الله
فزو بخوف من صوت الصراخ الي جاي من المطبخ وراحت ميثا ركض ولحقتها شمس وهي ما تدري وش السالفه واول ما دخلو المطبخ شافو انفال ماسكه الكبده بتاكلها وايلاف تهددها: ياويلك تاكلينها بنقطعها فوق الغداء
هزت انفال راسها: اذا قربتي باكلها وخري عشان اوطيها على الطاوله وانحاش
عقدت شمس حاجبها وهي مو فاهمه شيء لكن سرعان ما فزت بخوف من صراخ ميثا جنبها: لعنبو بليسكم فضحتو بنا تتهاوشون على كبده!!!
ايلاف بحلطمه: يمه بتاكلها ووش يبقى للغداء!!
شهقت انفال: كذابه ماكنت باكلها كلها بس قلت باخذ لقمه وهي صارخت بوجهي واخذتها
التفتت ميثا على وصايف: وانتي ورا ما ناديتيني كم مره اقولك ان تهاوشو عندك تجين تعلميني
وصايف بتوتر: والله يا خاله ماشوف الموضوع يسوى اضايقك وازعجك عشانه تعرفينهم دايم كذا
تنهدت ميثا وتقدمت تاخذ الكبده من انفال وتحطها على الطاوله ورجعت تناظر لايلاف: عانيها قطعيها صغار وضبطي شغلك انتي وياهن وياويلكم اسمع صجه
كلهم بصوت واحد: ان شاء الله
التفتت ميثا بتطلع بس انتبهت ان شمس جايه معها ومن عصبيتها ما شافتها: اعذرينا يا بنتي ترانا موب كذا دايم
ابتسمت شمس: عادي شدعوه
طلعت ثريا ووراها شمس تفرجها على البيت ولفت ايلاف على وصايف وانفال: الحين امي ورا ماتخليها تساعدنا
وصايف وهي تقطع السلطه: عيب يا بنت تراها عروس
عقدت ايلاف حاجبها: واذا يعني ترا بتصير زي اختنا وزيك كلنا واحد وشوله الرسميات من اول يوم
ضحكت انفال تقعد على الكرسي: حبيبتي هذي بنت العز ماتدخل المطبخ المطبخ يجيها
ايلاف: اعقبي بس انتي وياها
ضحكو وصايف وانفال وكملو شغلهم الثلاث وتجهيزات الغداء
« استراحة العيال »
دخل مناف وشاف وليد جالس على الكنب ويزيد جالس جنبه وجسار يلعب سوني ، التفتو كلهم على دخول مناف: السلام عليكم
ردو جسار ويزيد السلام الا وليد وعقد مناف حاجبه باستغراب وقرب منه: صباحو ابو الوليد
وقف وليد وهو يحس انه فقد كل اعصابه ولعد يقدر يصبر اكثر واقترب من مناف وعيونه تطلع شرار ونطق بهسهسه: اخوك تزوج بنت فيصل وانا اخر من يعلم؟؟
مناف: وش تبيني اقولك ادق عليك واقول تعال تهاوش مع اخوي تراه تزوجها ولا وش بالضبط
شد وليد على قبضه يده وقام جسار يوقف بينهم ويبعدهم بيدينه: اهجد انت وياه
وليد بصراخ: كيف اهجد كيف علمني ذا الكلب لو فيه خير لي يعلمني قبل عرسها يعلمني عشان امنعها مايتستر ويجيني اليوم الثاني ولا كانه سوى شيء
جسار بحده: وش تبيه يقولك لا البنت تبيك ولا هيب من نصيبك انساها وفكنا من شرك
كان مناف واقف وماسك اعصابه من يوم قاله كلب وهو يشتعل لكنه ماوده يخربها ويخرب العشره الي بينهم عشان بنت وكان بيمر يجلس بس وقفه وليد يوم دق كتفه بكتفه ونطق: وقت اكلمك توقف زي الرجال قدامي وتسمع مني
التفت له مناف وقرب منه لين صار لاصق فيه: وش قصدك مانيب رجال؟
ضحك وليد بسخريه ونطق عشان يستفزه: انت وين انت واخوك والرجوله وين
كانت الكلمه كبيره وقويه على مناف وفيها اهانه له ولاخوه ولا قدر انه يسكت اكثر ورفع قبضته يلكم وليد بكل قوته وفز يزيد يقوم وليد ويتفقد وجهه وقرب جسار يدف مناف: مناف!!
اشر مناف بغضب على وليد ونطق بحده: انت لو انك رجال صدق رحت تخطبها من يوم قالت لك بس انك رخمه ترددت من خوفك من ابوها ، اخوي ارجل منك يالكلب ولعد تجيب اسمه على لسانك
وقف وليد ومسح الدم الي طلع من طرف شفته بقميصه وتقدم بسرعه متجاهل جسار وسدد لكمه قويه على وجه مناف ، حاول جسار ويزيد يفرقونهم بس ماقدرو الا بعد وقت مسك جسار مناف يدفه برا ويزيد جلس وليد على الكنب ، صرخ مناف بوجه جسار ويحاول يدفه عنه: وخر عني خل اعلمه مقداره
جسار بصراخ: استح على وجهك انت وياه اخوياء تتهاوشون عشان بنت
مناف: انت شايف وش يقول عن اخوي؟ معصي اسكت له
تنهد جسار ودفه معه للسياره: امش امش وامسح الدم الي على وجهك
تاكد جسار ان مناف حرك بسيارته ورجع للاستراحه شاف يزيد جالس وقدامه وليد يمسح الدم الي على وجهه بملامح متألمه ونطق جسار: عاجبك الي صار؟
رفع وليد انظاره: مانيب فاضي لك اسكت
ناظر فيه جسار باشمئزاز وتقدم ياخذ جواله: ماهقيتك سطحي وتخرب خوتك عشان وحده مادرت عنك
كانت اخر كلمه يقولها قبل يطلع ويضرب الباب وراه تارك وليد متنرفز منهم والتفت على يزيد يصرخ: قم انت معهم بعد ان كانك شاره علي
عقد يزيد حاجبه: وانا شدخلني فيكم طز فيك وفيهم بعد الزم ماعلي نفسي
