« القسم »
نزل تميم الخط بوجه فيصل بعد ما قاله بيفكر بطلبه ويرد له خبر ، التفت بابتسامه لثامر الي نطق: والله انك تخوف كيف وصلت للي تبيه
ضحك تميم يعتدل بجلسته: ما على تميم صعب ، مساله وقت وانهي لك فيصل بابشع طريقه واخذ حقي
هز ثامر راسه: ماعندي شك
قاطعهم دخول وليد ويزيد ومناف عشان يوقعون قبل يطلعون ، تقدمو الثلاث وبعد ما خلصو وقبل يطلع مناف ناداه تميم ، التفت مناف: هلا
اشر على الكرسي الي قدامه: ابيك اجلس
تقدم مناف يجلس قدام تميم ووقف ثامر: انا استاذن
التفت له تميم: على وين؟
ثامر وهو طالع: بجيب لي شاهي وراي شغل للصبح
التفت تميم على مناف: هذي عدت على خير وعساني اشوفك عايد ذا الحركات من حسن حظك ما لقو معكم شيء ممنوع
هز مناف راسه: معد تنعاد ان شاء الله
اعتدلت تميم في جلسته: بنت فيصل وش تسوي بالاستراحه؟
رفع مناف انظاره بسرعه لتميم ونطق بصدمه: بنت فيصل بالاستراحه؟؟؟
عقد تميم حاجبه من صدمه مناف ونطق: ومسوي نفسك مصدوم؟
وقف مناف بتوتر: والله اني مادريت انها معهم بعدين وش الي جابها
وقف تميم معه: هذا الي لازم اسالك عنه
مناف: وليد يحبها ومن سنه وهو يتقرب منها ومع انه يطلب يشوفها دايم الا انها تعيي حتى انه اخر مره طلبها وعيت وقالها انتي سفريات وطلعات بلحالك وقعد يقط عليها كلام وهي ابعدته عنها
هز تميم راسه وهو يفكر: اطلع
طلع مناف وجلس تميم يفكر بكلام مناف ، اذا هي رافضه رفض قاطع انها تشوفه وش الي خلاها تجيهم اليوم ، فجاه تذكر نظراتها وغضبها يوم شافها ، تنهد ووقف متجه لبيته ويحاول يتناسى كل الافكار الي داهمته
« بيت عائله سلطان »
كانو متجمعين في الصاله يتقهوون ومبسوطين برجعة وصايف من عند اهلها وجنبها سهم جالس ، وقفت ايلاف تصب لهم قهوة ونطقت بكل صدق: والله يا انك وحشتينا !
ابتسمت وصايف تاخذ الفنجال منها: وحشتك ولا وحشتك الطلعات معي
ضحكت ايلاف تمد الفنجال على سهم: كلهم
ثريا وهي ترتشف من فنجالها: توه نور البيت يا بنيتي
وصايف: ينور بوجود اصحابه يا عميمه
دخلت عليهم انفال بحماس وصينيه الحلا بيدينها: شوفو وش سويت
سهم بابتسامه: اسلم جابت لنا الي بيسممنا
خزته انفال بنظراتها: لو سمحت استاذ سهم لا تخرب سمعتي
ايلاف: سمعتك مخربه من الله
وصايف: معليش عاد ما ارضى على لولو وطبخها
التفت سهم لها: هو ما خربها الا تعزيزك لها
ضحكو كلهم وبدت انفال تقطع من الحلا وتوزع عليهم في صحون والتفتوا على صوت تميم ، عدلت وصايف حجابها ونطقت ثريا: حياك يامي
دخل تميم يسلم على سهم وجلس جنب امه على الكنب ونزل شماغه على جنب ، وقفت انفال تصب له قهوة وتعطيه من الحلا
سهم: عطنا علومك يابو عتب
تميم وهو ياخذ الفنجال من انفال: تسرك علومي
سهم: الله يجعله
التفتت ثريا على تميم: وينه مناف؟
عقد تميم حاجبه: ليه ما جاكم؟
هزت ثريا راسها بالنفي: من يوم اخذته ماطب البيت
احتدت ملامح تميم وطلع جواله: انا ابن ابوي
اتصل على مناف ورد عليه بسرعه: وين انت فيه؟
مناف: عند خويي
رفع تميم حاجبه: منهو خويك؟
مناف بحده: وش هو تحقيق؟ حتى اخوك الكبير ما سوا لي كذا
انصدم تميم من رده واحتدت نبرة صوته: مناف! تكلم زين خويك منهو
تنهد مناف ونطق: وليد
رص تميم على اسنانه بغضب: الان تجيني في البيت وان كان فيك خير اكسر كلامي
سكر جواله ورماه على الكنب ونطق سهم: صل على النبي يا تميم وش جاك
تميم بغضب: ابك اخوك ما يخاوي الا الردي
تنهد سهم: بسيطه خله يخاوي الي يبيه ويتعلم الدرس بنفسه ما يحتاج انت تفرض عليه كلمتك بعدين انت تعرف مناف زين عنيد وان عصيته عن شيء عطاه راسه
ضحك تميم بسخريه: اذا هو عنيد انا اعند منه وبكسر راسه وامشي كلمتي عليه مانيب محتريه لين يجيب على روسنا بلوه ثانيه
هز سهم راسه وكمل قهوته وطلعو البنات وصايف وايلاف وانفال لفوق عن ازعاجهم
