٥٦٠٠ كلمه ، اطول بارت اكتبه وما يمدي ادقق بالاخطاء الاملائيه تجاهلوها وانبسطوا بالنهاية
~
صباح يوم جديد ، ايطاليا
صحت من النوم متاخر على غير العاده والتفتت تشوفه مو جنبها ، وقفت تاخذ لها بجامه دافيه ودخلت الحمام تتروش وبعد ما خلصت طلعت تجفف شعرها وتحط كريماتها وختمتها بمرطب على شفايفها ورشة من عطرها ، التفتت على صوت فتح الباب ودخل بيده الفطور وما نسى ورد التوليب الي تحبه وتروق عليه: صح النوم يا حلوه
ردت بابتسامه وقربت منه: صح بدنك
انحنى يقبل خدها واخذت الورد منه: احلا توليب لاحلا شمس
التزمت الصمت تتامل التوليب الابيض وتراقبه يوم اتجه يحط الفطور على الطاوله ويرتبه: يا جمال الورد
تميم بابتسامه: موب اجمل منك والله
حطت الورد على الطاوله وجلست: جايب الاكلات الي احبها!
جلس تميم مقابل لها: اكيد ، كنت باخذك ونفطر برا بس شفتك نايمه ولا حبيت اعكر نومك قلت خل انزل واجيبه لها
ابتسمت بامتنان على مراعاته لها: تسلم
بدو يفطرون ويتبادلون اطراف الحديث ويخططون لطلعتهم الجايه وبعد ما خلصو تساعدو وهم يرتبون الطاوله ويتجهزون للطلعه ، لبس جاكيته الاسود فوق الهودي والتفت يشوفها تلبس جاكيتها الطويل وقرب يحط قبعته على راسها: عشان البرد ما يوجعك
ابتسمت بهدوء ونزلو للسياره واول ما ركبو سالها: تبين نروح اول شيء للتزلج ولا الرمايه؟
شمس بحماس: الرمايه!
ابتسم تميم وشغل قوقل ماب وحرك متجه لاقرب كوفي من الفندق الي هم فيه ونزل يجيب لهم قهوة وهي تتامل زخات المطر من فوقهم ورفعت جوالها تصور مع طرف شعرها وثواني جاء تميم وبيده كوبين من القهوة الايطاليه ، اخذتهم منه عشان يركب بسرعه وضحكت بخفه: غرقك المطر
تميم وهو يسكر الباب: فدى يا شمس دنياي
شمس بخجل: يووه صاير لسانك ينقط عسل
ضحك تميم وهو يحرك سيارته: من يومي بس ماكنتي تلاحظين
التفتت تتامله وهو يسوق ويدندن بسعاده ، انتبه لها واردف بمزح: انتبهي رقبتك لا تنكسر
ضحكت من تذكرت الموقف واخذت قهوتها بتشربها قبل تبرد: ياليل ما تنسى شيء انت
شغل المساحات عن المطر وشغلت اغنية لتايلور ورجعت تتكي على المرتبه وتسرق النظر له وهي ممتنه له ولكل شيء يقدمه لها
بعد وقت وصلو للمكان الي يبونه واخذ المظله من ورا: لا تنزلين لين اجيك
ابتسمت على اهتمامه وهي تشوفه يركض ويفك المظله من فوقه لين فتح لها الباب ونزلت تتخبى تحت المظله عن قطرات المطر ، دخلو وبعد ما حجزو التذاكر وجاء دورهم كانت الغرفه الي هم فيها فاضيه بطلب من تميم عشان ياخذون راحتهم ، نزلت شمس جاكيتها على الكنب ونثرت شعرها على اكتفاها: الحين اعلمك العب شلون
ضحك تميم وهو يعدل السلاح الي بيده: تتحديني يا بنت فيصل في مهنتي؟
تنهدت شمس ورفعت اكتافها: هذي لعبتي يا ولد سلطان قلت لك من قبل اني اهوى الرمايه
ماقدر يتحمل شكلها وطريقة كلامها وثقتها واقترب منها يطبع قبلته على ثغرها: ورينا اللعب يلا
ابتسمت باحراج واخذت مكانها واستعدت تصوب على هدفها وتميم واقف وراها يتامل كل حركه لها بحب وسعاده ، ثواني بس وقدرت تصوب الهدف لكنها ما جابته بالضبط ، صرخت بحماس والتفتت تنطق بثقه: شفتت؟؟ قلت لك لا تتحداني
ضحك وهو يسحبها وراه: اجل شوفي الحين من الي بيجيبها صح
تكتفت تناظره وتنتظره يصوب ، ما اخذ وقته حتى الا صوب بسرعه وجت بنص الهدف وكشرت شمس: يجي منك
التفت عليها: ها من الي توها تتحداني
صدت شمس تعشق سلاحها: ما اسمع
ضحك يقترب منها ويعيد كلامه: من الي توها تتحداني منننن؟
التفتت له وصوبت بسلاحها عليه: ترا بخلي الهدف هالمره براسك
تميم بصدمه: اوب اوب ، طلعت بنت فيصل الي بداخلك
ماقدرت تتحمل شمس وانفجرت ضحك: يا كريه مو وقته تضحكني خلني اكون جديه لو شوي
عطاها مجال تتقدم وتاخذ مكانها عشان تصوب واردف: تتذكرين يوم رفعتي سلاحك بوجهي بذاك اليوم
شمس وهي تحاول تصوب على الهدف: اكيد اتذكر مستحيل انسى ذاك اليوم
التفتت له براسها وكملت: حسبتك بتخاف مني بس كنت مبسوط
ابتسم وهو يتكتف جنبها: اعجبتني شخصيتك وقوتك وصمودك بوجهي وقتها
اطلقت شمس وقدرت تجيب الهدف ورجعت لورا تعطيه مجال واردفت: شعور غريب يا تميم
تميم باستغراب: اي شعور؟
شمس وهي تحط كفوفها بجيب بنطلونها وتناظر الفراغ: مين يصدق ان الشخص الي كرهته بحبه بهالشكل وبيكون كل دنياي وسعادتي وعوضي الجميل بهالحياه
رفعت انظارها تشوفه يتاملها بشرود وكملت: وسندي والشخص الي اجيه بكامل حزني وضيقتي وكسري ويجبرني ويزرع بدال الالم سعاده بداخلي
اقترب تميم يحضنها ويحتويها داخل صدره: صدقتي يوم قلتي ان الرمايه لعبتك ، صوبتي قلبي بحبك وجبتيني من اقصاي يا بنت فيصل
ابتسمت تشد على حضنه وتدفن راسها بصدره: احب ذا القب منك
ضحك بخفه وهو يعيده: قصدك بنت فيصل؟
هزت راسها وكمل: كنت اناديك فيه دايم عشان اذكر نفسي انك بنت عدوي وبنت الشخص الي كرست نص عمري عشان انتقم منه ولا كنت ادري اني بحب فيصل من حبي لبنته واتنازل عن كل شيء لعيونها
تنهدت براحه وهي تسمع كلامه ، كبير وجميل شعورها بهذي اللحظه ولا ودها تخلص ابداً تبي تسكن باحضانه دايم ويسمعها من كلامه العذب واعترافاته المعسوله والي تحب تسمعها دايم عشان تطمن قلبها انه جنبها ويحبها ولا يمكن انه يتركها بيوم
