THE ROYAL OF SHINE ACADEMY

Chapter 3: Ang Pagtuklas ng Nakaraan

Amara's POV

Ang araw ay nagsimula nang mas maliwanag kaysa sa inaasahan ko. Matapos ang nangyari kahapon sa hardin, parang nagbago ang aking pananaw. Bagaman hindi pa ganap ang pagkaintindi ko sa aking kapangyarihan, alam kong may malalim na koneksyon ako sa lupa-isang sinaunang kapangyarihan na iba sa mga karaniwang elemento na alam ng mga estudyante rito. Bilang prinsesa ng Twilight Sand, isang kaharian na kilala sa oras at buhangin, iba ang inaasahan ng mga tao sa akin.

Ngayon, patungo kami sa klase tungkol sa kasaysayan ng akademya. Tila mas kakaiba ang araw na ito dahil sa kakaibang sigla na nararamdaman ko. "Bakit kaya ang saya mo ngayon?" tanong ni Presley habang naglalakad kami papunta sa silid-aralan. "Mukhang may alam ka na hindi ko alam."

Ngumiti ako. "May nararamdaman ako. Parang may malaki akong matutuklasan ngayong araw."

Pagdating namin sa klase, sinalubong kami ni Professor Elysia, ang guro ng kasaysayan. Siya ay kilalang eksperto sa kasaysayan ng mahika at sa mga sinaunang kaharian na nagtatag ng Royal of Shine Academy. Ang mga mata niya ay tila puno ng mga lihim mula sa nakaraan, na parang may alam siya na hindi niya agad sinasabi.

"Ngayong araw," nagsimula si Professor Elysia, "pag-uusapan natin ang mga sinaunang pinagmulan ng mga kaharian at ang kanilang koneksyon sa mga kapangyarihan na natatagpuan natin ngayon."

Nabighani ako agad sa simula ng lektura. Bawat kaharian na tinalakay ay may kanya-kanyang natatanging kapangyarihan-ang mga naunang tagapagmana ng mahika na nagpasimula sa mga ito ay mga dakilang bayani na kilala sa kanilang koneksyon sa mga elemento. Sa Twilight Sand, kami ay may kapangyarihan sa oras at buhangin, ngunit ang mga sinaunang alamat ng aming kaharian ay nagsasabing may mas malalim pa kaming ugnayan sa mga misteryo ng oras na hindi pa ganap na natutuklasan ng kahit sinong prinsesa.

"Hindi lahat ng kapangyarihan ay madaling matutuklasan," sabi ni Professor Elysia habang iginuguhit ang simbolo ng isang sinaunang kaharian sa pisara. "May mga kapangyarihang itinatago ng oras at ng mundo, mga kapangyarihang kailangang tuklasin at pag-aralan ng mabuti. Isa sa mga pinakakilalang halimbawa ay ang mga Tagapagmana ng Lupa-mga piniling indibidwal na may direktang koneksyon sa lakas ng kalikasan at sa mga ugat ng mundo."

Nagulat ako sa aking narinig. Tagapagmana ng Lupa. Parang may kumikislap na liwanag sa aking isipan. Ang boses na narinig ko kahapon, at ang reaksyon ng lupa nang hawakan ko ang puno... Ito kaya ang ibig sabihin nito?

"Ang mga tagapagmanang ito ay bihira at kadalasan ay hindi agad natutuklasan ang kanilang tunay na kapangyarihan," patuloy ni Professor Elysia. "Kailangan nilang mahanap ang tamang koneksyon-ang Ugat ng Mundo, isang sinaunang pinagmulan ng kanilang lakas, para ganap na magising ang kanilang kapangyarihan."

Dahan-dahan akong napaupo. Alam ko na, sa isang paraan, may koneksyon ako sa tinutukoy niyang mga tagapagmana. Pero paano ko matutuklasan ang tungkol dito? May paraan kaya upang malaman ang aking tunay na pinagmulan?

_________________________________________

Matapos ang klase, hindi ko na napigilang lumapit kay Professor Elysia. Kailangan kong malaman ang tungkol sa mga Tagapagmana ng Lupa. Kailangan kong malaman kung may kinalaman ito sa akin.

"Professor," sabi ko nang makalapit ako sa kanya, "Maaari ko po bang itanong ang tungkol sa mga Tagapagmana ng Lupa? May nararamdaman po kasi akong koneksyon sa kanila."

Tumingin siya sa akin na parang sinusuri ang bawat detalye ng aking pagkatao. "Bakit mo nais malaman, Amara?"

"Nararamdaman ko po na may kapangyarihan ako, pero hindi tulad ng iba. Hindi ko pa ito lubusang nauunawaan, pero parang may ugnayan ako sa lupa." Sabi ko

Tumango si Professor Elysia, ngunit may kakaibang lungkot sa kanyang mga mata. "Kung ang iyong pakiramdam ay totoo, Amara, kailangan mong maging handa. Ang landas ng isang Tagapagmana ng Lupa ay hindi madaling daanan. Maraming pagsubok, at hindi lahat ay nakakaabot sa kanilang buong potensyal." Professor Elysia said

"Handa po ako," sabi ko nang may buong loob. Alam kong kailangan kong malaman ang katotohanan.

"Ipagpaumanhin mo, ngunit ang mga sinaunang lihim ng mga Tagapagmana ng Lupa ay hindi madaling makuha. Subalit may isang lugar dito sa akademya na maaaring makatulong sa iyo."

Napalunok ako sa kaba ngunit na-excite rin sa kanyang sinabi. "Saan po iyon?"

"Ang Silid ng Mga Sinaunang Alaala," tugon ni Professor Elysia. "Isa itong lugar kung saan nakatago ang mga alaala at kasaysayan ng mga naunang tagapagmana. Ngunit mag-ingat ka, Amara. Ang mga sagot na maaari mong makita doon ay hindi laging simple."

_________________________________________

Kinagabihan, nagpunta ako sa Silid ng Mga Sinaunang Alaala. Sa bawat hakbang papunta roon, ramdam ko ang panginginig ng aking katawan-halong kaba at pananabik. Nang makarating ako sa harap ng malalaking pintuan ng silid, nagdalawang-isip ako sandali. Ngunit alam ko, ito na ang susi sa aking kapangyarihan.

Binuksan ko ang pinto, at pumasok ako sa isang malaking silid na puno ng mga lumang libro, kristal, at mga sinaunang simbolo. Sa gitna, may isang malaking salamin-ang Salamin ng Nakaraan. Lumapit ako rito, at sa sandaling tumingin ako, may nagbago sa loob ng salamin.

Nagpakita ang isang imahe-isang sinaunang kaharian, puno ng luntiang kagubatan at malalim na mga kuweba. Nakita ko ang mga tao, mga tagapagmana ng lupa, na gumagamit ng kanilang kapangyarihan upang hubugin ang mga bundok, kontrolin ang mga puno, at alagaan ang kalikasan.

At doon, sa gitna ng lahat, nakita ko ang isang babae. Ang kanyang mukha ay malabo, ngunit ang kanyang presensya ay malakas. Ang kanyang mga kamay ay nakahawak sa lupa, at ang kapangyarihan mula rito ay dumadaloy sa kanya. Tumingin siya sa akin, at bigla, parang may narinig akong boses sa aking isipan.

"Amara... Ikaw ang susunod."

Napaatras ako, nanginginig ang buong katawan. Alam ko na ngayon-ako ay hindi isang ordinaryong estudyante. Isa akong Tagapagmana ng Lupa, at ang aking kapalaran ay nakatali sa sinaunang kapangyarihan ng mundo.