အိုမီဂါအဖြစ် မွေးဖွားလာပြီးနောက် အားလုံးက ငါ့ကိုလိုချင်နေကြတယ်

Chapter 52

♎️Chapter 52

အသေအချာကိုနောက်ကျသွားခဲ့ပြီ။ ရှဲ့လင်က သူ့အားအထဲသို့ဆွဲခေါ်သွားခဲ့ပြီပင်။ ထိုင်ခုံတွင်နေရာယူလိုက်ကြပြီးသည့်အခါ ဖုယွမ်ကျိုးတစ်ကိုယ်လုံး ချွေးများဖြင့်ရွှဲနေလေပြီ။ တစ်နေ့တွင် သူယခုလိုရုပ်ရှင်မျိုးကြည့်ရလိမ့်မည်ဟု တစ်ခါဖူးမျှမျှော်လင့်မထားခဲ့မိပါချေ။

သူနှင့်ရှဲ့လင်မှာ ဘေးချင်းကပ်ထိုင်နေခဲ့ကြပြီး ပေါက်ပေါက်ဘူးကိုကိုင်ထားသည့် သူ့လက်များကတုန်ယင်နေခဲ့သည်။ နှစ်ယောက်တွဲခုံများမှာ အခြားခုံများလို ကြား၌လက်ကိုင်တန်းမရှိပေ။၎င်းကြောင့် စုံတွဲအချင်းချင်းပူးကပ်ကာ ပွေ့ဖက်ထားနိုင်လိမ့်မည်။ လောလောဆယ် သူ့ပေါင်များက ရှဲ့လင်၏ခြေထောက်နားတွင်ကပ်နေလေ၏။

ဖုယွမ်ကျိုးဘဝတွင် ယခုလောက်ထွက်ပြေးချင်စိတ်ဖြစ်ခဲ့ရသည့်အချိန်မရှိခဲ့ပေ။ သူ့ဘေးမှခုံတွင်မည်သူမှမရှိသည့်အခါ သူတိတ်တိတ်လေးသွားထိုင်ရန်စီစဥ်လိုက်သည်။ သို့သော်လည်း ရှဲ့လင်ကသူ့လက်ကိုကိုင်ကာ ငုံ့ကြည့်ပြီးပြောလာ၏။

"မသွားနဲ့..."

"....."

နှစ်ယောက်သား စက္ကန့်အနည်းငယ်ကြာသည်အထိ အကြည့်ချင်းဆုံနေခဲ့ကြပြီး ဖုယွမ်ကျိုးမှာ ကပျာကယာပြန်ထိုင်လိုက်ရသည်။ ထိုအချိန်အထိ ရှဲ့လင်ကလက်ကိုပြန်မရုတ်သောကြောင့် ဖုယွမ်ကျိုးသာစိတ်ပျက်လက်ပျက်ဖြစ်သွားခဲ့ရလေ၏။

ရုပ်ရှင်စချိန်မှ သူမျှော်လင့်ထားခဲ့သည်နှင့်ကွဲလွဲနေမှန်း ဖုယွမ်ကျိုးသဘောပေါက်လိုက်သည်။ ယခုကမ္ဘာရှိလူများက လိင်အမျိုးအစားအများအပြားရှိသည်ကို သူ့မသိစိတ်မှမေ့လျော့သွားမိခြင်းဖြစ်ပြီး လက်ရှိတွင် ရုပ်ရှင်ကလည်းလိင်တူကြိုက်ကြသည့်ရုပ်ရှင်မဟုတ်ပေ။ ဇာတ်လိုက်နှစ်ယောက်တွင် တစ်ယောက်ကဘီတာဖြစ်နေပြီး ကျန်တစ်ယောက်က အယ်လ်ဖာဖြစ်နေလေသည်။

ဇာတ်လမ်းကို ရာစုနှစ်အလွန်မှခေတ်ကာလတစ်ခုတွင်အခြေခံထားပြီး တိုက်ပွဲများဖြစ်ပွားနေချိန်၊ တင်းမာမှုများမြင့်တက်နေပြီး ပရမ်းပတာအခြေအနေအောက်တွင်ရှိနေသည်။ ပျားပန်းခတ်မျှလှုပ်ရှားနေသည့်မြို့တော်တွင်မူ သီဆိုကခုန်နေကြပြီး ညအချိန်တွင်မီးရောင်များဖြင့်စည်ကားနေဆဲပင်။ ဘီတာလူငယ်လေးသည်ကား ကပွဲခန်းမထဲတွင် စားပွဲထိုးအလုပ်လုပ်နေခဲ့၏။ သူ၏ချောမောသောရုပ်သွင်ကြောင့် ဧည့်သည်များကိုအဓိကဧည့်ခံရပြီး အဖျော်ယမကာငှဲ့ပေးရကာ စီးကရက်မီးညှိပေးရသူလည်းဖြစ်သည်။