قلوب بينها برزخ

ج٣

وبنفس الوقت طلع تعيين ثمين وصار اغلب الوقت مشغول الصبح لحد الظهر
بدوامه ورا الساعه ٥ لليل ويا الحجي اني التهيت بدراستي لان اخر سنه الي وثمين طلب مني ان اركز واكمل من الدور الاول حتى بعدها نخطط لموضوع الاطفال كان متلهف غير عن اي مره ان يكون عندنا طفل يمكن لان
وضعه المادي تحسن بصوره ملحوظه حتى عمتي بسبب تغير وضع ثمين المادي ودائما ينطيها ومتكفل بمصرف البيت تركتني بحالي برغم احس اكو حقد بداخلها من ناحيتي اطلعه بين فترات صارت بعيده ودائما اذكر موضوع طلاقها وتتهمنا اني  واهلي السبب بي
اما سلام فهذا الانسان جنت احس بي مو طبيعي فتره يتركني بحالي
وفتره يبقى متربصلي يراقبني وينتظرني كدام باب بيتهم لحد ما ارجع من المدرسه يله يدخل
الشي الي انتبهت اله ان هالانسان مشاعره حب من طرف واحد جنت بهالعمر الصغير مو واعيه تجيني حاله من الاحساس بتأنيب الضمير
ان هالانسان متعذب بسببي هالشعور كان يخليني بداخلي أسامحه على الي سوا بيه وخسارتي للطفل وبنفس الوقت ادعي رب العالمين يخلصني منه
برغم هو بطل يتعرضلي وكأنه حس اني بعد الحادث حاقده عليه لدرجه الكره
انسحب حتى ما يخليني أزيد بحقدي
الي زعجني بالفتره ان صار يجي على بالي وافكر بأمره من باب الفضول
واحلل وضعه لحد يوم نزلت وقت العصر من غرفتي صارت عمتي بوجهي ابتسمت ابتسامه غريبه سألتها احضر الجاي لعمي وللولد
جاوبتني وهي مبتسمه على ضحكه طالعه من قلبها كأنه واحد مستلم خبر يفرحه
( لا مو هسه لان ثمين ديحجي ويا وحده بالتلفون )
اني من سمعت هالكلام شعور بالغيره يغلي بداخلي وبنفس الوقت انقهرت
من حسيتها فرحانه وتتمنى هالشي يصير وتجي وخده بحياة ابنها
حاولت ابين نفسي واثقه من رجلي سالتها منو هاي الي متصله عليه
جاوبتني ما اعرف بس مبينه صغيره وحلوه لان صوتها يجنن روحي اسألي
وبدربج اسأل نسوي العصرونيه هسه لو مطول
تركتها وجسمي كله يرتعد بين غيره بين قلق بين شك اجتاحتني احاسيس
حسيت أطرافي ترجف واني افتح الباب لكيت ثمين جالس على كرسي ميز  الطعام ومخلي ايده على جبينه ساند بيها راسه يستمع والأيد الثانيه رافع بيها التلفون لاذنه
شفته ما انبه جان مركز بالاتصال
بس اجاني صوته وهو يهمس لهالانسانه
( اني لو ما اعزج  واعرف انت شنو ما أتقبل منج هالكلام الطلب الي دتطلبي 
صعب عليه ومايهون عليه اشوفج تترجيني وقلبج متأذي بسببي بس
الي حجيتي مستحيل يصير )
من سمعت طريقه كلامه بهمس والمصطلحات الي ليستخدمها بينت هالبنيه
يعرفها حق المعرفه وعنده تواصل وياها والها معزه ومقدار عنده
بلحظتها لو للقلب صوت كان كدر حتى ثمين يسمع صوت قلبي الي انكسر
وحس اني موجوده
ومع ذلك عنادي حضر باللحظه والدمعه الي حسيتها وصلت لطرف عيني
حبستها وجاوته بصوت مسموع
( العفو منك اخاف قطعت مكالمتك المهمه ويا الانسه الي خلتك حتى ما تحس
عليه من دخلت )
رد فعله وتعابير وجهه خلتني اقطع الشك ويصير يقين توتره وصدمته
وتشتت أفكاره وما يعرف يجاوب بين الي خايف اني سمعت وبين الي ليحضر رد فعل عدواني
خزرني وغلق السماعه بأيده جاوبني
( شنو هالاسلوب وهالكلام انت ما تستحين تحجين بهالطريقه ويا البنيه )
( العفو منك ومنها بلغها اعتذاري وهاي اني طالعه بس عمتي دزتني حتى اسألك نسوي الشاي بس خلص عرفت الجواب
التفتت دا اطلع همس بخجل حضروا الشاي  هسه جاي
رجعت نظرتله نظره نديه تمام لعد اروح احضر اموري حتى توديني لاهلي
شفته فز وتوتر وبنفس الوقت دماغه تشوش
رجعت التفتت سمعته همس دكتوره من رخصتج رايديني  الاهل
بطأت خطواتي اريد اسمع
سمعته غلق السماعه صاح بإسمي
ميامي اوگفي اني ما التفتت كملت طريقي ويا ما خليت ايدي على
مقبض الباب دا افتحها
سمعت اني مو دا احجي وياج
جاوبته بدون ما التفت
نعم
شنو هالتصرف الي صار قبل دقايق مو عيب
التفتت حاسه نفسي راح انهار بس متماسكه لاخر لحظه ومدعيه إلا اباليه
العيب لمن انزل وتتلگاني عمتي مبتسمه وتگلي رجلج ديحجي ويا بنيه
وادخل عليك الگاك تتهامس ويا العزيزه الي تعزها وميهون عليك قلبها يتأذى بسببك
ليش انت شنو فهمتي من هالكلام
ماكو داعي افهم مفهوم وواضح واني هم ماعندي طول بال بهالمواضيع
وادخل بنزاعات ومشاكل فنحلها كل واحد يرجع لمكانه
_ يعني شلون
_ يعني ترجعني لاهلي وكلشي ينتهي
_ تمام دروحي حضري غراضج
_ هنا بدون وعي عيوني نزلت دموعها المحبوسه لكن من دون تعبير حزن
تعبير جدي صعدت لغرفتي  توجهت لخزانة الملابس فتحتها
حسيت خلص بدت الدموع تفرج عن الألم الي بقلبي
ثواني وانفتح الباب
دخل
_ حسيت بي ورايه
_ استهدي بالله واسمعيني زين
اظفر رجلج ما ابدله بنسوان الدنيا ومن گتلج اصعدي حضري امورج
حتى تصعدين واجي وراج نحجي وحدنا بدون ما احد يسمعنا لو باقي أجادل وياج حيسمعون ويفتهمون اكو شي غلط
( هاي البنيه دكتوره واني اعرفها وكلش بنيه محترمه ومن عائله بس رادت مني شغله اساعدها بيها واني ما اكدر اساعدها ودتتوسل بيه واستحيت
افشلها گلت الكلام الي سمعتي )
( ثمين انت تعرف اني مرتك ومتعلمه عليك واعرف هالمره تصرفاتك ووضعك وكلامك غير لا تزعل مني بس انت كذاب
بدليل قلبها الي ميهون عليك تأذي )
ابتسم خجلان  والله ظالمتني وداعتج وحق كلام الله
وكل الي اريده منج خلي عندج ثقه بيه )