قلوب بينها برزخ

ملخص

المعلومات الي اعرفها عن هالقصه
ميامي : مر اليوم الثاني وثمين ما مر عليه بدت الأفكار تروح وتجي براسي
شنو الي صاير وشنو هالشي الي شغله عني بحيث ماعنده وقت يطمئن عليه او يشوفني فقط مكالمه كم دقيقه على كد كلمتين ويروح
ليش صوته متغير
فكرت اخلي امي ترجعني لبيت عمي اخاف اخذ على خاطره مني
بس تذكرت اني بهاي حالتي منو يداريني
هنا خواتي عندهم عطله ومداريني  من امي بالدوام
منى منى  جيبيلي مي دا اخذ العلاج
بعد ما اخذت العلاج بديت احس بالتعب والنعاس من التفكير والقلق
_ ميامي
ميامي
_فتحت عيني بس تخيلت نفس بحلم راسي ثكلان ومصدعه
_ كومي حبيبتي خلي اشوفج حتى اروح
_ فتحت عيني على لمسات وصوت ثمين
ثمين انت اجيت
_ اي اجيت يله صحصحي گلولي انت مامتغديه گومي تغدي
_ ساعدني انهض بس لسى حاسه نفسي مو بوعيي بعده النعاس بعيني
_ تكومين اساعدج تغسلين وجهج
_ لا اكدر امشي بس انتظر خلي اكدر اركز احس عندي دوخه
_ طبعا يا عيني ماخذه العلاج ونايمه بدون اكل عمتي باقيه تكعد بيج وانت
تصحين وترجعين تنامين
_ ليش هسه شكد الساعه
_ الساعه خمسه وعشره
_ اخذني ساعدني اروح للمغسله غسل وجهي
وبطريقنا للمطبخ 
طلب من  مي تصب الاكل
_ عمه اخاف هاي الادويه جرعتها عاليه عليها تكول دايخه وصداع
_ والله ياعمه حجيت وياها لازم كل شويه تاكل هيه دتاخذ اكثر من علاج
ووهن الاجهاض تحتاج تاكل حتى ترد عافيتها وهي الله يسلمها لكمتين وكالت ما اكدر
_ ميامي انت صغيره شلون تتعافين وانت هذا وضعج 
_ يله اكلي بلكت من اجى ثمين تنفتح شهيتج 
_ رمقت مي بنظره بديت اكل وكأنه رجعت اركز وضغطي استعدل
سألت ثمين الي جالس بصفي  بهمس
_ شعجب مريت تشوفني صارت زحمه همسلي
_ ها صحصحتي لازم دكملي اكل ونروح نكعد وحدنا بالحديقه إذا تكدرين
_ثمين اصبلك شاي
_ اي والله ميو ..... عمي شوكت يرجع
_ والله عمه عمك ورا ال٨ يخلص دوامه المسائي
انت اليوم بات يمنا على الواهس باجر جمعه
_ عندي شغله ويا عمي باسم لازم اروحله بس اروح ورا ما يجي عمي
رمقتني ميامي بنظره زعل
_ مي تعالي ساعديني اروح اغسل وأغير ملابسي دا اطلع للحديقه
_ بنتي البسي جاكيت وجواريب أثخن من هاي انت مثل النفسه
_ يوم ترى والله اختنكت
_ اسمعي الكلام بنتي بعدين يبين بعظامج البرد
_ شفت ثمين ابتسم بتعب تفرست بوجهه حسيت اكو شي اكو حسبه متعبته
-ربع ساعه وطلعت لكيته كاعد بالحديقه يدخن انتبهت بيده نفاضه بيها مجموعه كطوف
_ هاي كلهن دخنتهن بين ما رحت واجيتك
_ دفوتي اخاف بارده عليج هنا هسه اكمل الجكاره وافتوت وراج
_ تحركت بأتجاه المرجوحه الي هو كاعد عليها
لا اريد اشتم هوا لبسوني هاي كدامك روب ابويه بهالحر
_ لا خلي ندخل خاف تحترين وتبردين بعدين تتمرضين وانت مناعتج حاليا ضعيفه امج كالت
_ ثمين انت ضايج مني
_ وكف كدامي ليش هالكلام
_ من دخلت لهسه انت تگلي ميامي وثكلان عليه
_ ما فهمت
_ انت بيك شي او زعلان مني انت دائما ماتسميني بأسمي لو ابويه انت
لو ابو الميش لو ميوش بس من عصبي وزعلان تگول ميامي
_ واني من دخلت لهسه ما كلت ولا اسم من ذولي
_ لا
_ والله تعبان واكو حسبه ببالي وهم قلق عليج انت عبالج هينه عندي اشوف
راسج مخيط وايدج مجبره وياها سالفه الاجهاض
ميامي ابويه انت لازم تفهمين ان من النوع الي من انهم اتحمل بس يطلع على وجهي وتصرفاتي تعب التفكير اني مو من النوع إلا ابالي
ويله خلي ندخل هاي اشتميتي الهوا  بس اريد نكعد وحدنا
_ تعال بالصاله
_ دخلنا  جلس قريب مني
ميامي من طلعلنا واجينا لاهلج قبل ٥ ايام بقيتي انت وامي شنو صار
من طلعنا لحد مارجعت ولكيتج بهالحاله
_ليش شنو صاير
_ ميامي جاوبي وبعدين احجيلج
_ بالاول بقا تحجي عليه وعلى موضوع خطوبه لهيب اتهمتني اني ورا السالفه تالي بينت كدامها اني رافضه سكتت وراها طلعتني اغسل الكراج
وهي يمي كاعده على الكرسي واني أصلا كلتلها الولد مايقبلون اغسل الكراج سمعتني كلام كملته طلبت مني اروح إجمع الملابس صعدت ونزلت اسألها المناشف ناشفه هم اجمعهم كالت اي
_يعني مو انت الي طلعتي تغسلين الكراج ولا انت الي صعدتي بدون علمها
تجمعين الملابس
_ لا والله ابد هسه اروح وياك واحلف على القرآن وهي خاله هم خلي تحلف
_ماكو داعي هي أصلا مو بالبيت طلعت لبيت خالي زعلانه
_ شنو الي صار لا هيج صار بيني وبينها كلام عصبت عاتبتها ما اجتي ويانا للمستشفى كالت اني من الهبطه ما اكدر اوكف ثاني يوم من رجعت
عرفت طلعتي لبيت عمي  حجت هذا الي سألتج عنه هسه
حجايه منا حجايه منا تعاركنا طلعت زعلانه واني ما ادري من طلعت زعلانه هم طلعت لبيت عمي باسل بقيت يمهم